වර්තමාන තේරීම් — ඔබගේ අනාගත ආදායමේ රහස

පළමුවෙන්ම ඔබ සිහින දකින එම ජීවන තත්ත්වය මේ මොහොතේ කැප කිරීම, නුදුරු අනාගතයේදීම එම සුඛෝපභෝගී ජීවිතය ළඟා කර ගැනීමේ 'යතුර' බව කිවහොත්, ඔබ විශ්වාස කරනවාද..?

මෑත කාලයේ චීනයේ දී ඉතා වැදගත් පර්යේෂණයක් සිදු කරනු ලැබුවේය. ඒ පුද්ගලයෙකුට ආර්ථික වශයෙන් දියුණු වීමට අත්‍යවශ්‍යම ගති ලක්ෂණය කුමක්දැයි සොයා බැලීමටයි. එහිදී හොඳ ශාරීරික සෞඛ්‍ය, උත්සාහවන්ත භාවය, නිර්මාණශීලීත්වය, වැනි විවිධ ගති ලක්ෂණ විශාල ප්‍රමාණයක් පිළිබඳව සලකා බැලූ අතර එම පරීක්ෂණයේ ප්‍රතිඵලය පුදුම සහගත විය.

එනම් ඉහත සඳහන් කරන ලද සියලු ගති ලක්ෂණ අඩු වැඩි වශයෙන් ආර්ථික සංවර්ධනයට අවශ්‍ය වුවද, ඒ සඳහා අත්‍යවශ්‍යම ගති ලක්ෂණය එය නොවීමයි. එම ගති ලක්ෂණය බවට පත් වූයේ 'නිවැරදි වර්තමාන තේරීමයි'. එනම් අනාගතය වෙනුවෙන් වර්තමානයේ කැපකිරීමට යම් පුද්ගලයකුට ඇති හැකියාවයි.

මෙහි ඇති වැදගත්ම දේ වන්නේ "ඉතුරුම්" වේ. ව්‍යාපාරික ඩඩ්ලි සිරිසේන තමාගේ ෆේස්බුක් පෝස්ටුවක් අවසානයේ සඳහන් කර තිබූ ඉතා වැදගත් වාක්‍යයක් මේ පිළිබඳව මොනවට පැහැදිලි කර ඇත. එනම් "වියදම් කරන්න දන්නේ නැතිනම්, හම්බ කරන්න එපා" යන්නයි. මෙය සරල ප්‍රකාශයක් ලෙස පෙනුනද, සාර්ථක ආර්ථික තත්ත්වයක් ගොඩනගා ගැනීමට ඉතා වැදගත් ප්‍රවේශයක් පෙන්වා දෙයි.

එනම් කොයි තරම් හම්බ කරත් එම සියලු ආදායම වර්තමාන පරිභෝජනයටම කැපකර දමන්නේ නම්, ඔහුගේ ජීවන මට්ටම කිසි දින වැඩි නොවන බවයි. 

අප කුඩා කල සිට ඉගෙන ගෙන ඇත්තේ,

ආදායම - වියදම = ඉතුරුම් 

ලෙස වේ. මෙය ගණිතමය වශයෙන් සත්‍ය සමීකරණයක් වුවද, ඔබ සිහින දකින පුද්ගලයා බවට පත්වීමට නම් එම සමීකරණය තරමක් වෙනස් කළ යුතු බව පෙන්වා දිය යුතුය. ඔබ දන්නා ආර්ථිකමය වශයෙන් ඉහළට ගිය සියලුම පුද්ගලයින් ඒ බව පසක් කර ඇත. 

එනම්, 

ආදායම - ඉතුරුම් = වියදම 

යන්න වේ. 

විවිද ආර්ථික විශේෂඥයන් මෙම සංසිද්ධිය ආයෝජනය පිළිබඳ පොත පතේ නිතරම සඳහන් කර ඇතත් මා දන්නා පරිදි මෙය පළමුවෙන්ම ලෝකයට හඳුන්වා දෙනු ලැබුවේ ලොව්තුරා බුදුරජාණන් වහන්සේ විසින් වේ. ඒ අප කවුරුත් දන්නා පරිදි සිඟාලෝවාද සූත්‍රයේදීය.

එහිදී උන්වහන්සේ ගිහි ජීවිතය ගත කරන පුද්ගලයෙකුට අවශ්‍ය ආර්ථික හා සමාජ ජීවන උපදේශ ලබා දී ඇත.

එහි විශේෂයෙන් සඳහන් කරන්නේ:

01) ආදායම බෙදා භාවිතා කිරීම

බුදුන් වහන්සේ උපදෙස් දෙනවා, උපයාගත් ආදායම භාග 4කට බෙදාගන්න කියලා:

2 කොටස් — දෛනික වියදම් සහ ව්‍යාපාර/රැකියාවට
1 කොටස — ආයෝජනයට
1 කොටස — ඉතිරිකිරීමට (අනාගත අවශ්‍යතා සඳහා)

මෙය අද අපි කියන financial planning (මුදල් සැලසුම්කරණය)ට ඉතා සමානයි.

02) ධනය නාස්ති කරන ක්‍රියා 6

සුරාපානය, අයථා විනෝද, අසංයම, අලසභාවය වැනි ක්‍රියා ආදායම නාස්ති කරන බවත් උන්වහන්සේ පැහැදිලි කරනවා.

3) සුරක්ෂිත අනාගතයක්

සිගාලෝවාද සූත්‍රය මුළුමනින්ම සඳහන් කරනුයේ,

ධර්මවත් ලෙස උපයන්න
බුද්ධිමත්ව භාවිතා කරන්න
කොටසක් සුරකින්න
අනාගතය සුරක්ෂිත කරගන්න යන්නයි. 

ඒ අනුව පැහැදිලි වනුයේ අපි බොහෝ දෙනා සිහින දකින අනාගතයේ සාර්ථක වීමට, සුඛෝපභෝගී ජීවිතයක් ගත කිරීමට, ආර්ථික නිදහසක් ලබා ගැනීමට අවශ්‍යනම් ඒ සඳහා අඩිතාලම දමා ගත යුත්තේ “හෙට” නොව — "අද" ය  යන්නයි. ඔබ අද ගන්නා තේරීම්, ඔබ හෙට සිටින ස්ථානය තීරණය කරයි. ඔබ අද කරන වියදම්, ඔබ හෙට ඇති සුරක්ෂිතභාවය තීරණය කරයි.ඔබ අද කරන ඉතිරිකිරීම්, ඔබ හෙට ලබන ආදායම නිර්මාණය කරයි. අද ඔබ කරන තේරීම — හෙට ඔබේ ජීවිතය ගොඩ නගයි.

අද ඔබට ලැබෙන රුපියල් 1,000ක් සිතා බලන්න. ඔබට එය සම්පූර්ණයෙන්ම විනෝදයට වැය කළ හැක. නමුත් එයින් රුපියල් 200ක් හෝ 300ක් ඉතිරි කරන්නේ නම්, ඔබ හෙට ඔබ වෙනුවෙන් තීරණයක් ගත් පුද්ගලයෙකු වේ.

බොහෝ දෙනා කියනවා: “මට ඉතිරි කරන්න මුදල් නැහැ”.  සත්‍යය වන්නේ, ඉතිරි කිරීම මුදලේ ප්‍රමාණයට සම්බන්ධ නොව, චින්තනයට සම්බන්ධ වීමයි.

පුද්ගලයන් දෙදෙනෙක් වෙනස් තේරීම් වලින් ගොඩ නැගෙන ආකාරය ගැන අපි සිතා බලමු. දෙදෙනාම එකම වැටුපක් ලබති. එකම නගරයේ ජීවත් වෙති.
එකම අවස්ථා ඔවුන්ට ලැබේ.

පළමු පුද්ගලයා සෑම මසකම තම වැටුපෙන් 20%ක් ඉතුරු කරයි. ඔහු මුදල් සුරකිමින්, දැනුමට ආයෝජනය කරමින්, නව කුසලතා ඉගෙන ගනිමින් ඉදිරියට යයි. දෙවන පුද්ගලයා “අද ජීවිතය භුක්ති විඳිමු” කියමින් සෑම මුදලක්ම වැය කරයි.

වසර 5කට පසු, පළමු පුද්ගලයාට හදිසි අවස්ථාවකට සූදානම් මුදල් තිබේ. ඔහුට කුඩා ව්‍යාපාරයක් ආරම්භ කිරීමට හැකියාව ඇත.ඔහුට ආදායම් මාර්ග එකකට වඩා ඇත. දෙවන පුද්ගලයාට ණය, ආර්ථික පීඩනය සහ අවිනිශ්චිත අනාගතයක් ඇත.

වෙනස..? ආදායම නොවේ. වසර 5කට පෙර කරන ලද තේරීම්වල ප්‍රතිඵලය පමණකි.

ඉතිරිකිරීම ඔබගේ අනාගතයට දෙන වාග්දානයයි. ඔබ ඉතිරි කරන සෑම රුපියලකම අදහස “මම මගේ අනාගතය ගැන වගකීම ගන්නවා” කියන අදහසයි. ඉතිරිකිරීම වියදමක් නොවේ. එය ඔබගේ අනාගත ආදායමට බීජයක් වේ. කුඩා බීජයක් වසර කිහිපයකින් විශාල වෘක්ෂයක් බවට පත්වනවා සේ,
කුඩා මුදල් ප්‍රමාණයක් නියමිත කාලයක් තුළ විශාල ආර්ථික ශක්තියක් බවට පත්වේ.

දැනුම මත පදනම් වූ තිරතුරු යුගයක මෙන්ම කෘතීම බුද්ධි යුගයක ජීවත්වන අපට ආදායම වැඩි කරන බලවත්ම ආයුධය දැනුමට කරන ආයෝජනයයි. මුදල් සුරැකීම පමණක් නොව, ඔබ ඔබටම කරන හොඳම ආයෝජනය වන්නේ දැනුමට කරන ආයෝජනය ය.

නව කුසලතාවක් ඉගෙනීම, ව්‍යාපාරික අදහසක් සංවර්ධනය කිරීම, තමන්ගේ හැකියාවන් වැඩි කිරීම, මේ සියල්ල අදවන විට ඔබගේ ආදායම වැඩි කරන ප්‍රබලතම මාර්ග වේ. 

අද ඔබ ඉගෙන ගන්නා කුසලතාව, හෙට ඔබට අමතර ආදායමක් ලබා දිය හැක. අද ඔබ කරන උත්සාහය, හෙට ඔබේ පවුලේ සුරක්ෂිතභාවය බවට පත්වේ.

මෙම ලිපිය මගින් මා බලාපොරොත්තු වන්නේ සුරක්ෂිත අනාගතයක් ඇති සමාජයක් බිහි කිරීමට අවශ්‍ය සරල සත්‍යයක්  ජනතාවට මතක් කර දීමයි. “අනාගතය වෙනස් කිරීමට නම්, අදම වෙනස් විය යුතුය.”

අපේක්ෂා භංගත්වයට පත් තාරුණ්‍යයක් වෙනුවට ඉතිරි කිරීම පුරුද්දක් කරගත් පවුල්,ණයවලින් නොව ආයෝජනවලින් ජීවිතය ගොඩනගන තරුණ පරපුරක්,ආර්ථික නිදහසක් අරමුණ කරගත් සමාජයක් බිහි කිරීමට මෙම ලිපියෙන්ද යම් දායකත්වයක් ලබා දීමට බලාපොරොත්තු වේ. 

අවසාන වශයෙන් අදම ආරම්භ කරන්න. ඔබට විශාල මුදලක් අවශ්‍ය නැත. ඔබට පරිපූර්ණ තත්ත්වයක් අවශ්‍ය නැත. ඔබට අවශ්‍ය වන්නේ එක් නිවැරදි  තීරණයක් පමණයි. අද ඔබ ගන්නා කුඩා පියවරක්, වසර 5කට පසු ඔබේ ජීවිතයේ විශාල වෙනසක් විය හැක.

අද ඉතුරු කරන්න .
අද ඉගෙන ගන්න.
අද ආයෝජනය කරන්න.

ඔබේ අනාගත ආදායම ඔබේ වර්තමාන තේරීම් වලින් නිර්මාණය වේ. ඔබේ ජීවිතය වෙනස් කරන දිනය “හෙට” නොවේ. එය "අද" ය.