විපක්ෂ නායක සහ ඇමරිකානු මන්ත්‍රී මණ්ඩල දූත පිරිසක් අතර හමුවක්

විපක්ෂ නායක සජිත් ප්‍රේමදාස මහතා සහ ප්‍රජාතන්ත්‍රවාදී පක්ෂයේ සාමාජික, ඇමරිකානු එක්සත් ජනපද නියෝජිත මන්ත්‍රී මණ්ඩලයේ සාමාජික සහ එම මන්ත්‍රී මණ්ඩල බුද්ධි කමිටුවේ සාමාජික (Member of the Democratic Party, member of the House of Representatives and member of the house intelligence committee) ක්‍රිසි හවුලාහන් මහත්මියත් ඇයගේ දූත පිරිසත් අතර කොළඹ පිහිටි විපක්ෂ නායක කාර්යාලයේදී විශේෂ හමුවක් සිදු විය.

මෙම හමුවේ දී ආර්ථික සහයෝගීතාව, පාලනය, අධ්‍යාපනය සහ කලාපීය ස්ථාවරත්වය කෙරෙහි විශේෂ අවධානයක් යොමු කරමින් ශ්‍රී ලංකාව සහ ඇමරිකා එක්සත් ජනපදය අතර ද්විපාර්ශ්වික සබඳතා තව දුරටත් ශක්තිමත් කිරීම කෙරෙහි දෙපාර්ශ්වය අතර සාකච්ඡා පැවැත්විණි. ශ්‍රී ලංකාවේ ආර්ථික ප්‍රකෘතියට සහ දිගු කාලීන සංවර්ධනයට සහාය වීම සඳහා අඛණ්ඩ සහයෝගීතාවයේ වැදගත්කම මෙහි දී විපක්ෂ නායක සජිත් ප්‍රේමදාස මහතා ඇමෙරිකානු එක්සත් ජනපද දූත පිරිස හමුවේ අවධාරණය කළේය.

දෙරට අතර දිගු කාලීන හවුල්කාරිත්වය පිළිබිඹු කරමින් පසුගිය කාලයේ ඇමෙරිකා එක්සත් ජනපදය, ශ්‍රී ලංකාවට ලබා දුන් අඛණ්ඩ සහයෝගය සම්බන්ධයෙන් විපක්ෂ නායක සජිත් ප්‍රේමදාස මහතා සිය කෘතඥතාව පළ කළේය. එසේ ම දිවංගත ජනාධිපති රණසිංහ ප්‍රේමදාස මහතාගේ පාලන සමයේ දී ලබා දුන් "කෝටා" ප්‍රවේශය ශ්‍රී ලංකාවේ ඇඟලුම් කර්මාන්තය පුළුල් කිරීමට, රැකියා උත්පාදනය කිරීමට සහ අපනයන ආදායම් වැඩි කිරීමට සැලකිය යුතු ලෙස දායක වූ බව සඳහන් කරමින් ඔහු ඇඟලුම් අංශය ගැන විශේෂයෙන් මෙහි දී සඳහන් කළේය. ශ්‍රී ලංකාවේ ඇගලුම් අංශයේ සංවර්ධනයට සහාය වීමේ දී එක්සත් ජනපදය ඉටු කළ වැදගත් කාර්යභාරයට ඔහු මෙහි දී සිය කෘතඥතාව පළ කළේය.