රට වැනසූ හොර රැල රකින කණ්ඩායම එක්ක සජබය එකතු වන්නේ නැහැ

විපක්ෂ නායක සජිත් ප්‍රේමදාස මහතා මේ බව කියා සිටියේ, මාතලේ දඹුල්ල දේවහුව මුස්ලිම් මහා විද්‍යාලයට සක්වල සුහුරු පන්ති කාමර ලබා දීමේ වැඩ සටහනේ 112 වැනි අදියර යටතේ රුපියල් ලක්ෂ 10ක් වටිනා සුහුරු පන්ති කාමර උපකරණ ලබා දීමේ අවස්ථාවට එක්වෙමිනි. මෙම පාසලේ වසර 35ක් පුරාවට ගණිත ගුරුවරයකු නොසිටින බව ද විපක්ෂ නායක සජිත් ප්‍රේමදාස මහතාට මෙහි දී දැන ගැනීමට හැකි විය.

වසර දෙකහමාරක් පුරා නොකඩවාම තමා පාර්ලිමේන්තුවේ කතා කිරීමේ ප්‍රතිඵලයක් ලෙස ක්ෂුද්‍ර, කුඩා සහ මධ්‍ය පරිමාණ ව්‍යාපාරිකයන්ට බලපෑමක් සිදු කළ පරාටේ නීතියට තාවකාලික විරාමයක් ගැනිමට හැකියාව ලැබුණු බවත් විපක්ෂ නායකවරයා මෙහි දී පැවසීය.

රටේ පවතින ක්‍රමයේ වෙනස ඇති කිරීම ආරම්භ කළේ සමගි ජන බලවේගය සහ සමගි ජන සන්ධානය බවත් බොරුවට කයිය ගගහ යන පිරිසක් සිටින නිසා ලක්ෂ 220 ජනතාව ඇසිය යුත්තේ තව දුරටත් රටට අවශ්‍ය කයිය ගැසීම ද, නැති නම් සංවර්ධනය ද යන්න බවත් සජිත් ප්‍රේමදාස මහතා සඳහන් කළේය. 

බංකොලොත් අප රට ගොඩ ගත හැක්කේ විපක්ෂයේ සිට පවා ජනතාවට සේවය කරන පුද්ගලයන්ට ද, එසේ නොමැති නම් රට වටේ කයිවාරු ගගහ යන පුද්ගලයන්ට ද කියා ජනතාව සිතිය යුතු බවත් මේ මොහොතේ රටට අවශ්‍ය කයිය ගැසීම නොව වැඩ කිරීම බවත් විපක්ෂ නායකවරයා පෙන්වා දුන්නේය. 

සමගි ජන බලවේගය විසින් ක්‍රියාත්මක කරන හුස්ම වැඩසටහන යටතේ මේ වන විට රෝහල් 56කට රුපියල් ලක්ෂ 1719ක් වටිනා ඖෂධ සහ රෝහල් උපකරණත්, සක්වල බස් රථ වැඩසටහන යටතේ පාසල් 80 ක් සඳහා රුපියල් ලක්ෂ 50ක් වටිනා බස් රථ 80ක් ලබා දී ඇති අතර ඒ සඳහා රුපියල් ලක්ෂ 3892ක් ද සක්වල තොරතුරු තාක්ෂණ වැඩසටහන යටතේ පාසල් 112ක් සඳහා සුහුරු පන්ති කාමර උපකරණ ලබා දී ඇති අතර ඒ සඳහා රුපියල් ලක්ෂ 1115ක් වැය කර තිබේ.