මාළිමවේ අලුත්ම බොරුව-සජබයේ මහා ඇමති අපේක්ෂකයා නීතීඥ සංගමයේ සභාපතිලු

ජවිපෙ බොරු කියන්නේ ස්ථාවර නියෝගවලට මුවා වෙලා

ජවිපේ මන්ත්‍රීවරයකු පාර්ලිමේන්තුවේ දී තමා විසින් නීති සංගමයේ සභාපති රජිව් අමරසූරිය මහතාට මහ ඇමති අපේක්ෂක ධුරය ලබා දෙන බවට පොරොන්දු වී ඇති බව පවසන බවත් එම අපේක්ෂක ධුරය දෙන්නේ ගරු උපරිමාධිකරණ විනිශ්චයකාරවරුන්ගේ විශ්‍රම යන වයස් සීමාව වෙනස් කිරීමට අදාළ විරෝධය දැක්වීමට බවත් එම මාලිමා මන්ත්‍රීවරයා පාර්ලිමේන්තුවේ වරප්‍රසාදවලට මුවා වී බොරු කියන බවත් විපක්ෂ නායක සජිත් ප්‍රේමදාස මහතා පැවසීය.

ජවිපෙ මැතිවරණය වේදිකාවේ දුන් පොරොන්දු කිසිවක් ඉටු කළේ නැහැ  

වරායේ ගොඩබාන මිලට තෙල් දෙනවා කිව්වත් බදු පිට බදු ගසා ඉන්ධන වැඩිම මිලට ලබා දෙන රට බවට අප රට පත්ව ඇති බවත් ලෝකයේ සෙසු රටවල් කලාපයේ රටවල් තෙල් මත සහන දුන්නත් මේ අය ඒ කිසිදු සහනයක් නොදෙන බවත් 33%කින් විදුලි බිල අඩු කිරීම සේම වී සඳහා රු.150ක සහතික මිලක් දෙනවා කිව්වත් අද ඒ කිසිවක් නොමැති බවත් වී සඳහා රු. 17ක් පාඩු කළේ මේ රජය බවත් විපක්ෂ නායකවරයා පැවසීය. 

මාලිමාව හදන්නේ අධිකරණ බලයත් පැලවත්තෙන් පාලනය කරවන්න

ඒ සියල්ල කරමින් අධිකරණයෙ ස්වාධීනත්වයට මරු පහරක් එල්ල කර උපරිමාධිකරණවල විනිසුරුවන්ගේ විශ්‍රාම වයස් වැඩි කිරීමට රජය උත්සාහ කරන බවත් රජය මේ අධිකරණවල බලය පලනය කරන්න බලහත්කාරයෙන් උත්සාහ කරන බවත් අදටත් උපරිමාධිකරණවල පුරප්පාඩු තිබ්බත් ඒවා සම්පූර්ණ නොකරන බවත් විපක්ෂ නායකවරයා වැඩිදුරටත් පැවසීය.

සජබය කිසිවෙකුට දේශපාලන අල්ලස් දුන්නෙත් නැහැ-දෙන්නෙත් නැහැ 

සමගි ජන බලවේගය කිසිදා මාලිමාව කියන දේශපාලන අල්ලස් දී නැති බවත් මෙරට ජනතාව මේ බොරුවෙන් මුසාවෙන් මුලාවෙන් ඇන්දවිල්ලෙන් රැවටිල්ලෙන් රටක් ගෙන යා නොහැකි බවත් සමගි ජන බලවේගය සෑම විටම රට වෙනුවෙන් යුතුකම ඉටු කරන බවත් පක්ෂයක් ලෙස කොන්ද කෙළින් තියන් ස්වාධීන අපක්ෂපාතී අධිකරණය ගැන කතා කරන්න අයිතිය ඇත්තේ සමගි ජන බලවෙගයට බවත් ශිරානි බණ්ඩාරනායක මහත්මියට කළ බලපෑම් සේම ගරු විනිසුරුවරුන් පාර්ලිමේන්තුවේ තේරීම් කාරක සභාවට ගෙනවිත් බලපෑම් නොකළ බවත් අදටත් කොන්ද කෙලින් තියන් ජනතාව ඉදිරියේ සිටගත හැක්කේ අධිකරණය වෙනුවෙන් පෙනී සිටිය හැක්කේ සමගි ජන බලවේගයට බවත් විපක්ෂ නායකවරයා වැඩිදුරටත් පැවසීය.