ජවිපෙ නන්නාඳුනන තුවක්කුකරුවන් යළි හිස ඔසවයි
ජවිපෙ සූදානම් වන්නේ 88-89 සෙල්ලමටයි ලාල් කාන්තගේ ප්රකාශය අතිශය බරපතළයි-භයානකයි ජනතාව අවධානයෙන් සිටිය යුතුයි ජනතා විමුක්ති පෙරමුණ නැවතත් නන්නාඳුනන තුවක්කුකරුවන් සමග සන්නද්ධ අරගලයකට යන්න කුමන්ත්රණය…
ජවිපෙ සූදානම් වන්නේ 88-89 සෙල්ලමටයි
ලාල් කාන්තගේ ප්රකාශය අතිශය බරපතළයි-භයානකයි
ජනතාව අවධානයෙන් සිටිය යුතුයි
ජනතා විමුක්ති පෙරමුණ නැවතත් නන්නාඳුනන තුවක්කුකරුවන් සමග සන්නද්ධ අරගලයකට යන්න කුමන්ත්රණය කරන්නේ දැයි යන සැකය මතු වන බව සමඟි ජන බලවේගයේ ප්රධාන විධායක නීතිඥ අජිත් පී පෙරේරා මහතා පැවැසීය.
ජනතා විමුක්ති පෙරමුණේ රජයක් යටතේ නීති හදා ගැනීමේ බලය-නීති ක්රියාත්මක කිරීමේ බලය සහ යුක්තිය පසිඳලීමේ බලය එම පක්ෂයේ සාමාජිකයන්ට ලබා දෙන බවට කේ.ඩී ලාල්කාන්ත මහතා එම පක්ෂයේ මැයි රැලියේ දී සිදු කළ ප්රකාශයෙන් සැකය මතු වන්නේ යැයි පෙන්වා දුන් අජිත් පී පෙරේරා මහතා එම ප්රකාශය රටේ ප්රජාතන්ත්රවාදයට බරපතළ තර්ජනයක් යැයි ද සඳහන් කළේය.
සමඟි ජන බලවේගයේ ප්රධාන විධායක නීතිඥ අජිත් පී පෙරේරා මහතා මේ බව පැවසුවේ, කොළඹ විපක්ෂ නායක කාර්යාලයේ දී පැවැති මාධ්ය හමුවට සහභාගි වෙමින් වන අතර එහිදී වැඩි දුරටත් අදහස් දැක්වූ ඒ මහතා මෙසේ ද කීය.
දැන්වීම
"88-89 කාල වකවානුවේ දී දස දහස් ගණනක් ඝාතනය කළ දේශපාලය නැවත මතු වෙමින් තිබෙනවා. ජනතා විමුක්ති පෙරමුණට සුළු සාමාජිකයන් පිරිසක් සිටින කාල වකවානුවේ දී ජනතා විමුක්ති පෙරමුණේ ග්රාමීය කමිටු හරහා යුක්ති පසිඳලීම සිදු කළා අපට මතකයි. ඒ හරහා පුද්ගල ඝාතන රැසක් සිදු වුණා.
ඔවුන් නඩු අහල පුද්ගලයන්ට දඬුවම් නියම කළා. සමහර පිරිස් ඝාතනය කළා. මයිකල් රොද්රිගෝ පියතුමා, මොරටුව සරසවියේ උප කුලපතිවරයා සහ කොළඹ විශ්ව විද්යාලයේ උපකුලපති ස්ටැන්ලි විජේසුන්දර වගේ පුද්ගලයන් ඝාතනය කිරීමට තීරණය කළා. ඔවුන් යුක්තිය පසඳලීම කළේ එහෙමයි. ජනතා විමුක්ති පෙරමුණේ ත්රස්තවාදි ක්රියාදාමයට සහ මතවාදයට විරුද්ධ පිරිස ඔවුන් ඝාතනය කළා.
ජනතා විමුක්ති පෙරමුණේ රජයක් යටතේ නීති හදා ගැනීමේ බලය-නීති ක්රියාත්මක කිරීමේ බලය සහ යුක්තිය පසිඳලීමේ බලය එම පක්ෂයේ සාමාජිකයන්ට ලබා දෙන බව කියා සිටින්නේ, එම පෙරමුණේ ඒ ත්රස්තවාදි ව්යාපාරයේ නායකයෙක්ව සිටී කේ ඩී ලාල් කාන්තයි. ජනතා විමුක්ති පෙරමුණේ මැයි රැලියට පැමිණ සිටී ජනතාව දැක ඔහුට සිය සිත අභ්යන්තරයේ සැඟව තිබූ අදහස කියැ වුණා.
මේ ප්රකාශය ඉතා බරපතළයි. ඒ වගේම අතිශය භයානකයි. ජනතාව මේ ගැන අවධානයෙන් සිටිය යුතුයි. නැවත මේ රටේ භීෂණයක් ඇති වීමට ඉඩ තබන්න බැහැ. සමගි ජන බලවේගය මේ අතිශය භයානක සහ බරපතළ ප්රකාශය තරයේ හෙළා දකිනවා."