අනවසර ඉදිකිරීම්වලින් උල්පත කන්ද ආරාමය හන්තානය වනසයි

මහනුවර උල්පත කන්ද ආරණ්‍ය සේනාසනාධිපති ආරිය ගවේෂී නා හිමියන්, හන්තාන රක්ෂිතයේ මෙම අනවසර සහ නීති විරෝධී ඉදි කිරීම් සිදු කරමින් සිටින්නේ 2007 වර්ෂයේ සිට බව ද, භාවනා කුටි ලෙස මවා පාමින් ඊට මුවා වී ඉදි කර ඇති මෙම විශේෂ කුටි විදේශීය සංචාරකයින් සඳහා කුලියට ලබා දෙන බවට පැමිණිලි ලැබී තිබෙන බව ද සභාපතිවරයා පැවසීය.

පාරිසරික නීති රීති අමු අමුවේ උල්ලංඝණය කරමින් සිදු කර තිබෙන මෙම අනවසර සහ නීති විරෝධී ඉදි කිරීම් සම්බන්ධයෙන් තමා පාරිසරික අධිකාරිය, ඉඩම් රෙජිස්ටාර් කාර්යාලය, ස්වාභාවික සම්පත් කළමනාකරණ ආයතනය, ගඟ වට කෝරලයේ ප්‍රාදේශීය සභාව සහ මහනුවර දිසාපති කාර්යාලය ඇතුළු සියලු බලධාරීන්ට බ්‍රහස්පතින්දා (17) පැමිණිලි කළ බව ද සුභාෂ් යටවර මහතා "lankanewsweek" සමග පැවසීය.

හන්තාන රක්ෂිතයේ ඉදිකිරීම් සිදු කිරීම, හන්තානය සුරැකීමේ නීතියට අනුව සපුරා තහනම්ව තිබියදී, මහනුවර උල්පත කන්ද ආරණ්‍ය සේනාසනාධිපති ආරිය ගවේෂී නා හිමියන් එම රක්ෂිතයේ මෙම අනවසර සහ නීති විරෝධී ස්ථිර ඉදි කිරීම් සිදු කළේ කෙසේද යන ප්‍රශ්නය මතු වන අතර පාරිසරික නීති රීති උල්ලංඝණය කරමින් මෙම ඉදි කිරීම් සිදු කරද්දී පරිසර අධිකාරිය, මහනුවර දිසාපතිවරයා සහ හන්තානය සුරැකීමේ සංවිධානය මුණිවත රකිමින් ඊට අනුබල දීම සැක සහිත යැයි ප්‍රදේශවාසීහු පෙන්වා දෙති. මේ ක්‍රියාවලිය සම්බන්ධයෙන් එම සියලු බලධාරීන්ට ඉදිරියේ දී අධිකරණය හමුවේ උත්තර බැඳීමට සිදු වනු ඇති අතර ජනතාවට වග කීමට ද සිදු වනු ඇතැයි ද ඔවුහූ වැඩි දුරටත් කරුණු දක්වමින් "lankanewsweek" සමග පැවසූහ.