වාමවාදී දේශපාලනයේත් දක්ෂිණාංශික දේශපාලනයේත් හොඳ ලක්ෂණ පමණක් ලබා ගත යුතුයි

විපක්ෂ නායක සජිත් ප්‍රේමදාස මහතා මේ බව කියා සිටියේ සමගි ජන බලවේගය විසින් බුදු සසුනේ උන්නතිය උදෙසා ක්‍රියාත්මක සසුනට අරුණක් වැඩසටහන යටතේ පොළොන්නරුව ඇලැහැර අත්තනකඩවල ශ්‍රී පුන්‍යවර්ධනාරාම ප්‍රභාෂ්වර බුද්ධගයා මහා විහාරස්ථානයේ ඉදිවන විශාලතම භූමි ස්පර්ශ සියක් රියන් සමාධි ප්‍රතිමා වහන්සේගේ තීන්ත ආලේපනය කිරීම සඳහා රු. ලක්ෂ 18ක් වටිනා තීන්ත ලබා දීමේ අවස්ථාව හා එක්වෙමිනි.

ගොවි ජනතාව ගැන කතා කරන විට සමගි ජන බලවේගය පුනපුනාම ගොවි ජනතාව හා ඔවුන්ගේ අයිතිවාසිකම් වෙනුවෙන් පෙනී සිටි බවත් රජය මැතිවරණ සමයේ ගොවි ජනතාව වෙනුවෙන් කරනවා කියු දේවල් අදටත් මතක් කරන්නේ සමගි ජන බලවේගය බවත් අද වන විට ⁣රජය ගොවිජනතාවට පොරොන්දු වුණු කිසි දෙයක් ඉටු කර නැති බවත් වී කිලෝවට රු. 150ක් දෙනවා කියා ගොයම් කකා කිව්වත් අද දෙන්නේ රු. 120ක සහතික මිල බවත් වී කිලෝවක් නිෂ්පාදනයට රු. 137ක් වැය වුවත් හිතාමතාව ගොවියාට වී කිලෝවකින් රු. 17ක් පාඩු කර ඇති බවත් විපක්ෂ නායකවරයා පැවසීය.

අමූලික බොරු කියා ගොවි ජනතාව රැවටුවා

අමුලික බොරු කිය කියා ගොවි ජනතාව රැවටු බවත් ඡන්දය ගන්න කියපු දේවල් ඉටු කළ යුතු බවත් කයිවාරුව පසෙකලා වී ගොවියාට කරනවා කිව්ව දේවල් කළ යුතු බවත් ලක්ෂ 21ගොවි පවුල් 2019ත් 2024ත් රැවටුණු බවත් දැන්වත් නිහඩ ප්‍රේක්ෂකයන් ලෙස බලා නොසිට ජීවත්වීමේ අයිතිය වෙනුවෙන් ගොවි අයිතිය වෙනුවෙන් හඩ නගන්න දැන්වත් ප්‍රජාතන්ත්‍රවාදීව සාමකාමීව මහපාරට බහින ලෙස ඉල්ලා සිටින බවත් විපක්ෂ නායකවරයා පැවසීය.

අපි ගොවි ජනතාව සමඟ ප්‍රඥප්තියක් අත්සන් කරනවා

ගොවි ජනතාවට සාධාරණයක් කරන ගොවි ජන ප්‍රඥප්තියක් සමගි ජන බලවේගය එළි දක්වා ආහාර සුරක්ෂිතභාවය වෙනුවෙන් ගොවි ජනතාව රැකගන්න කතාවෙන් මෙන්ම ක්‍රියාවෙන්ද සමගි ජන බලවේගය සුදානම් බවත් විපක්ෂ නායකවරයා වැඩිදුරටත් පැවසීය.

ක්ෂුද්‍ර කුඩා හා මධ්‍ය පරිමාණ මෝල් හිමියන් රැකගත යුතුයි

ක්ෂුද්‍ර කුඩා හා මධ්‍ය පරිමාණ මෝල් හිමියන් වෙනුවෙන් සහන සලසන්න වෙන් කළ රු. මි. 7500 ප්‍රමාණවත් නොමැති බවත් බොහෝ මෝල් හිමියන් අසාධු ලේඛනගත වී ඇති බවත් ද මොවුන්ට වෙන් කළ මුදල් ප්‍රමාණවත් නැති බවත් දැන්වත් ගොවියා වෙනුවෙන් දුන් පොරොන්දු ඉටු කරන ලෙස යෝජනා කරන බවත් විපක්ෂ නායකවරයා පැවසීය.

එල්නීනෝ ලානීනා තත්ත්වයට අප සාර්ථක ලෙස මුහුණ දිය යුතුයි

ඉදිරියේ දී ඇති විය හැකි තවත් බරපතළ තත්ත්වයක් ගැන ජනතාව දැනුවත් විය යුතු බවත් ජාත්‍යන්තර කාලගුණ වාර්තාවට අනුව එල්නීනෝ ලානීනා තත්ත්වය ඉතිහාසයේ වෙන කිසිදු දවසක ක්‍රියාත්මක නොවු ආකාරයට කාලගුණ දේශගුණික තත්ත්වයක් විය හැකි බවට අනාවැකි පළ කර ඇති බවත් අප රටේ කාලගුණ ක්ෂේත්‍රයේ විශේෂඥයන් ද මේ තත්ත්වය බරපතළ ලෙස ක්‍රියාත්මක විය හැකි බවට ද අනතුර අඟවා ඇති බවත් විපක්ෂ නායකවරයා තවදුරටත් පැවසීය.

එල්නීනෝ ලානීනා තත්ත්වය ගැන රජය මීට වඩා අවධානය යොමු කළ යුතුයි

 අප රටේ දශලක්ෂ ගණනක් ජනතාව දුප්පත්කම නැතිබැරිකම නිසා ණයබ⁣රතාව නිසා දැවැන්ත සාගින්නකට මුහුණ දිය හැකි බවට ද ජාත්‍යන්තර ආයතනයක් අනතුරු අගවා ඇති බවත් එල්නීනෝ ලානීනා තත්ත්වය තුළ රටේ ජනතාවට සෘණාත්මක අගතිගාමි බලපැමක් විය හැකි බවට අනතුරු අගවා ඇති නිසා රජයට එය මගහැර යා නොහැකි බවත් විශේෂිත වැඩසටහනක් ක්‍රියාත්මක කළ යුතු බවත් විපක්ෂ නායකවරයා පැවසීය.

දේශපාලන භේදයෙන් තොරව ඒකාබද්ධ වැඩපිළිවෙළක් කරා යා යුතුයි

එසේම රජයත් සමග එකට එකතු වී සිවිල් ප්‍රජාව පුරවැසියන් එකට මුහුණ දෙන වැඩපිළිවෙළ ඒකාබද්ධව සැලසුමක් ලෙස කටයුතු කළ යුතු බවත් පක්ෂ දේශපාලනයට වඩා මිනිස් ජීවිත වැදගත් බවත් වාරි, කෘෂිකර්ම මහවැලි සෞඛ්‍ය අධ්‍යාපන ඇතුළු සියලු ආයතන එකට එකතු කර සම්බන්ධීකරණය කර මේ භයංකාර තත්ත්වයට මුහුණ දිය යුතු බවත් මේ සඳහා ජාතික වැඩපිළිවෙළක් අවශ්‍ය බවත් දේශගුණික විපර්යාස පාර්ලිමේන්තු සංසදය මේ ගැන විශේෂ අවධානයක් යොමු කර ඇති බවත් විපක්ෂ නායක සජිත් ප්‍රේමදාස මහතා පැවසීය.