මෛත්‍රී යටතේ තිබූ කෝටි තුනක තාක්ෂණික උපකරණ අතුරුදන්

මෙම විගණන වාර්තාවට අනුව ජනාධිපති ලේකම් කාර්යාලයේ මාධ්‍ය අංශය ඒකක 2019 දක්වා පවත්වා ගෙන ගොස් තිබෙන්නේ ඒකක හතරක් යටතේය. එහෙත් 2019 නොවැම්බර් මාසයේ මාධ්‍ය අංශය ආරම්භ කර තිබෙන්නේ නව මාධ්‍ය අංශය යන නාමය යටතේ වන අතර ඊට භාර ගත් භාණ්ඩ පිළිබඳවද නිසි ලේඛනයක් පවත්වා ගෙන ගොස් නැත.

මාධ්‍ය අංශයේ භාණ්ඩ සම්බන්ධයෙන් ඉංජිනේරුවන් විසින් ජනාධිපති ලේකම් වෙත යොමු කරන ලද වාර්තාවකට අනුව එම ඒකකය සතුව තිබු රුපියල් කෝටි තුනහමාරකට ආසන්න වටිනාකමින් (3,41,89,688) යුත් භාණ්ඩ රැසක් අස්ථාන ගතව ඇතැයිද එම විගණන වාර්තාවේ සඳහන් වේ.

එම වාර්තාවට අනුව අස්ථාන ගත වු භාණ්ඩවලට 2015 සිට 2020 ජනවාරි දක්වා කාලයේ දී මාධ්‍ය අංශය වෙත ලැබුණ 1,77,86,325 විටනා ලැප්ටොප් සහ මැක් බුක් එයාර් වර්ගයේ පරිගණක 78ක් ද, 1,03,80,423ක් වටිනා ඩෙක්ස්ටොප් පරිගණක 52ක් අතරින් 48ක්ද මාධ්‍ය අංශයේ නිලධාරීන්ට නිකුත් කරන ලද රුපියල් 34,70,742ක් වටිනා ජංගම දුරකථන සහ අයිපෑඩ් 45ක් අතරින් 28ක්ද ඇතුළත් වේ.

මාධ්‍ය අංශයේ නිලධාරින් වෙත ලබාදුන් ජංගම දුකරථන සහ අයිපෑඩ් 45න් ආපසු ලබාදී තිබු ජංගම දුරකථන 14 කින් නවයක්ද අය්පෑඩ් තුනෙන් දෙකක්ද අක්‍රීය බවද එම වාර්තාවේ සඳහන් වේ.

මීට අමතරව කතරගම ජනාධිපති මන්දිරයේ අයිතම 12කට අයත් භාණ්ඩද, අනුරාධපුර ජනාධිපති මන්දිරයේ රූපවාහිනි යන්ත්‍ර දෙකක්ද අස්ථාන ගතව ඇතැයිද එම වාර්තාවේ සඳහන් වේ.

මේ කිසිදු භාණ්ඩයක් සම්බන්ධයෙන් 2022 මාර්තු 25 වන විටත් කිසිදු විමර්ශනයක් සිදු කර නොමැති බවද විගණනයට වාර්තා නොවුණ බවද එම වාර්තාවේ සඳහන් වේ