දුර්දාන්ත පාලනයට එරෙහිව විපක්ෂය එකට එක් විය යුතුයි

එක් පුද්ගල බලාධිකාරයක් මගින් රටේ සමස්ථ ප්‍රජාතන්ත්‍රවාදී ආයතන පද්ධතියම ගිල ගෙන තිබෙනවා. ඔවුන් ඒ සඳහා අවකාශය ලබා ගත්තේ 20 වන ආණ්ඩුක්‍රම ව්‍යවස්ථා සංශෝධනය සම්මත කර ගැනීම මගිනුයි. ඒ මගින් 19 වන සංශෝධනයෙන් සීමා කරන ලද විධායක ජනාධිපති ධූරය සතුව පැවති අත්තනෝමතික බලය නැවත බල ගන්වා තිබෙනවා. අධිකරණයට සහ රාජ්‍ය සේවයට ලබා දුන් ස්වාධීනත්වය කණ පිට හරවා තිබෙනවා. වර්තමාන පාලනය අද සිදු කරන මේ ජනතා විරෝධී ක්‍රියා මාර්ග සියල්ලම ඉදිරියට ගෙන යමින් සිටින්නේ ඔවුන් විසින් නීතිය බවට පත් කර ගත් අනීතිය පදනම් කර ගෙනයි. එබැවින් මේ රටට යහපතක් උදා කර ගැනීම සඳහා ජනතාව අපේක්ෂා කරන්නා වූ රජයක පළමු වගකීම වන්නේ එම විසකුරු බලය අතුගා දමමින් 20 වන සංශෝධනය සියල්ලටම පෙර අහෝසි කිරීමයි.
 
එමෙන්ම අද වන විට ශ්‍රී ලංකාවේ ආර්ථිකයෙහි සිදු වෙමින් පවත්නා නාය යාම ඉතාමත් බියකරු ලෙස වර්ධනය වෙමින් පවතිනවා. අද වන විට මේ රටේ ආර්ථිකය විනාශ කරමින් සිටින්නේ එක් පවුල් සංධානයක ආශිර්වාදය සහ සබඳතා මත යැපෙන ආර්ථික ඝාතක කල්ලියක් විසිනුයි. රටේ සියලුම සම්පත් උරා බොමින් සිටින්නේ ඔවුන්. අද මේ රටේ වාණිජ්‍ය ව්‍යාපාර ගමන් කරමින් සිටින්නේ මරණ මංචකයන් වෙතයි. සුළු සහ මධ්‍යම ප්‍රමාණයේ ව්‍යාපාරිකයන් සියලු දෙනාම අද මුහුණ දී ඇත්තේ බරපතළ ඛේදවාචකයකටයි. බිහිසුණු ණය උගුලක රට හිර කර තිබෙනවා. එහිදී වර්තමාන පාලකයන් ඒ සඳහා වන එකම විසඳුම ලෙස සලකන්නේ රටේ ජාතික සම්පත් කුණු කොල්ලයට විකුණා දැමීමයි. මේ තත්ත්වය මඟින් ජාත්‍යන්තර බලවතුන්ගේ කෙළි බිමක් බවට ද ශ්‍රී ලංකාව පත් කර තිබෙනවා. අපේ සාම්ප්‍රදායික මිතුරු රාජ්‍යයන් ශ්‍රී ලංකාව කෙරෙහි ඈත් කරවමින් සිටිනවා. ජාතියක් ලෙස අපගේ ස්වාධීනත්වය දුර්වල කර තිබෙනවා. ඒ හේතුවෙන් රටේ ජනතාවගේ පරමාධිපත්‍ය බලයද බිහිසුණු ආගාධයක් වෙත තල්ලු වෙමින් තිබෙනවා. යුරෝපියානු සංගමයේ රටවල් 675ක් අපට විරුද්ධව GSP+ බදු සහනය ඉවත් කරන ලෙස යෝජනා කළේත්, අපගේ වැරදි විදේශ ප්‍රතිපත්තිය නිසයි.
 
ඒ සමගම රටේ ජනතාවගේ දුක සහ වේදනාව තව තවත් උග්‍ර කරවමින් සිදු කරන දැවැන්ත සම්පත් විනාශය කෙරෙහිද අපගේ අවධානය යොමු කළ යුතුයි. අද වන විට මේ රටේ ගොවි ජනතාවට වගා කිරීමට අවශ්‍ය පොහොර නැහැ. අනාගත පරම්පරාවට නිසි අධ්‍යාපනයක් ලබා දීමේ වගකීම ආණ්ඩුව මග හරිමින් සිටිනවා. ධීවරයා අසරණ කර තිබෙනවා. පාලකයින්ගේ වැරදි තීන්දු තීරණ හේතුවෙන් රට අභ්‍යන්තරයට කැඳවා ගත් කොරෝනා වසංගතය ජනතාව බිලි ගන්නට තරම් මාරාවේශ වී සිටිනවා. ඒ සියලු ව්‍යසන අතරේ ආණ්ඩුවේ ගජ මිතුරන් වන, පස් සහ වැලි ජාවාරම්කරුවන් ගොඩබිමද ඇතුළු ගංගා ඇළ දොළ පවා සූරා ගෙන කද්දී විෂ රසායන පිරුණු නැවක් අපගේ සාගර සම්පතද බරපතළ ඛේදවාචකයකට ගොදුරු කළා. 
 
ප්‍රජාතන්ත්‍රවාදී සමාජයක අතාවශ්‍ය අංග ලක්ෂණයක් වන  සිවිල් පරිපාලනය බිඳ වට්ටවමින් මිලිටරි පාලනයකට අවශ්‍ය පදනම කෙමෙන් කෙමෙන් සම්පූර්ණ කරමින් සිටිනවා. එමෙන්ම ප්‍රජාතන්ත්‍රයේ පැවැත්ම තීරණය කරන නිදහස් මැතිවරණ පිළිබඳව තව දුරටත් අපේක්ෂා තබා ගැනීමට නොහැකි වන ආකාරයේ ක්‍රියාවලියකටද වත්මන් පාලනය පියවර තබන ආකාරයක් දැක ගත හැකියි. සියලුම කොමිෂන් සභාවන්හි පැවැති ස්වාධීනත්වය අහිමි කර තිබෙනවා. මැතිවරණ කොමිෂන් සභාව ඇතුළු සියලුම කොමිෂන් සභාවන් හි සාමාජිකයන් ලෙස ආණ්ඩු හිතවාදී සුවච කීකරු දේශපාලන ක්‍රියාකාරිකයන් පත් කර තිබෙනවා. මෙම තත්ත්වය කෙරෙහි මේ මොහොතේ දී හෝ නිසි අවධානයක් යොමු කර සියලුම කොමිෂන් සභා ස්වාධීන කිරීමට අවශ්‍ය මැදිහත්වීම සිදු නොකළ හොත් ශ්‍රි ලංකාවේ නිදහස් සහ සාධාරණ මැතිවරණයන් හි අවසානයද එමගින් සටහන් කරනු නියතයි. 
 
එපමණක් ද නොව වත්මන් පාලනයේ ඊළඟ පියවර වනු ඇත්තේ මේ රටේ විරුද්ධ පක්ෂයට අයත් ක්‍රියාශීලී නායකයන් ගණනාවක් දේශපාලන භූමියෙන් ඉවත් කිරීමයි. ඔවුන් ඒ සඳහා පිඹුරුපත් සකසා ඇත්තේ දේශපාලන පළි ගැනීම් පිළිබඳව සොයා බලන්නට යැයි කියමින් පත් කරන ලද ඊනියා ජනාධිපති කොමිෂන් සභාවේ විසකුරු වාර්තාව පදනම් කර ගෙනයි. අනෙකුත් සියලුම කරුණු කාරණා සේම උපාලි අබේරත්න නිර්දේශ වහා පරාජය කරන්නට මේ රටේ දේශපාලන බලවේග පෙරමුණ නොගත හොත් එම ක්‍රියාව සමස්ත විපක්ෂය දේශපාලන ක්‍රියාකාරීත්වයෙන් අතුගා දැමීම සඳහා ලබා දෙන දායකත්වයක් වන බව මෙහිදී අප සියලු දෙනාම තේරුම් ගත යුතුයි. 

එබැවින් අද වන විට මේ රටේ විරුද්ධ පක්ෂය නියෝජනය කරන තමුන්නාන්සේලා වෙත ඉදිරිපත්ව ඇත්තේ හුදු ජනතා විරෝධී පාලනයක් පෙරළා දැමීමේ ඇති වගකීමට පමණක්ම නොවේ. මේ රටේ ප්‍රජාතන්ත්‍රවාදය ආරක්ෂා කර, සුරක්ෂිත කර අනාගත පරපුර වෙත නිදහස් සහ සාමකාමී සේම සමෘද්ධිමත් රටක් උරුම කර දීමේ වගකීමද ඒ අතර තිබෙනවා. එහිදී රටේ ආර්ථිකය ඇද වැටී ඇති අගාධයෙන් ගොඩ ගෙන පුනර්ජීවයක් ලබා දීමේ දැවැන්ත වගකීමද ඔබ ඉදිරියේ ඇති බව පැහැදිලියි. ඒ සඳහා නිවැරදි දැක්මක් මත නිසි ක්‍රමෝපායන් අනුගමනය කිරීමේ කාර්ය භාරය පැවරී ඇත්තේද ඔබ වෙතයි. එකී ජාතික අරමුණු උදෙසා වන එක්සත් භාවයක අවශ්‍යතාවය අද වන විට ඉතිහාසයේ අන් කවරදාකටත් වඩා දැනෙමින් තිබෙනවා. ඒ සඳහා ඔබ සියලු දෙනාම එකාවන්ව පෙරමුණ ගනු ඇතැයි යන්න අපගේ පැතුමයි. 
 
එම උදාර කටයුත්තේ දී කිසිදු පුද්ගල ප්‍රතිලාභයක් පිළිබඳව හෝ කුමන හෝ බල දේශපාලනික අරමුණකින් තොරව අපගේ දායකත්වද නොමසුරුව සහ නොපැකිලව ලබා දෙන බව අප මේ මොහොතේ සඳහන් කරන්නේ එම ක්‍රියාව අද දවසේ රට වෙනුවෙන් ඉටු කළ යුතුව ඇති ඉහළම කාර්ය භාරය වන බව අප තේරුම් ගෙන ඇති නිසායි. එහිදී ඔබ අතරෙහි ද, ඔබ ඉදිරියේ සහ ඔබ පසු පසද අප සිටිනවා. 

මේ අවස්ථාවට විපක්ෂ නායක සජිත් ප්‍රේමදාස සහ එක්සත් ජාතික පක්ෂයේ නියෝජ්‍ය නායක රුවන් විජයවර්ධන යන මහත්වරුන් ප්‍රධාන විපක්ෂයේ දේශපාලන පක්ෂ නායකයින් රැසක් එක්ව සිටියහ.