ඇමෙරිකාවෙන් සමුගන්නට මහින්ද සමරසිංහ තීන්දු කළේ ඇයි..?

1989 දී පාර්ලිමේන්තු ඒමට තැත් කළ ද  නාමයෝජනා ලැබීමේදී අදිසි හස්තයක ගිලටීනයකට ඔහු ලක්විය.  එහෙත් 94 දී ඔහු එම ජයග්‍රහණය කරා ලගා විය. එහිදී කැපී පෙනෙන විපක්ෂ කාර්ය භාරයක් ඉටුකළ ඔහු අන්තර් පාර්ලිමේන්තු සංගමයේ මානව හිමකම් කමිටුවේ ප්‍රධානියා ලෙස ජිනීවාහිදී පත්වූයේ  රටවල් 168 ක ඡන්ද ලබමිනි. රටවල් රැසක මානව හිමිකම් ගැටලු හා ලොවපුරා ප්‍රබල දේශපාලකයන්ට එල්ලවූ තාඩන පීඩන වලදී මැදිහත්වීම් කරන්නට ද මහින්ද ක්‍රියා කළේය.

ආණ්ඩුවේ හා විපක්ෂයේ ප්‍රධාන සංවිධායකකම් හා කැබිනට් ඇමතිකම් 08 ක් දරා ඇති මහින්ද යුද සමයේ රටේ ප්‍රතිරූපය බේරාගැනීම සඳහා ජිනීවා මෙහෙයුම් දියත් කළ අයුරු හා ලබාගත් ජයග්‍රහණ කාගේත් පැසසුමට ලක්වේ. එහෙත් ගෝටාභය මහින්ද ගෙන් වැඩ ගත්තේ නැත. කලකිරුණු ඔහු ඇමෙරිකානු තානාපති වුයේ රටට ඒ හරහා යමක් කරන්නටය.

2022 රටට අසීරුම වූ සමයේ ලංකාවට රු කෝටි 1700 ක පොහොර කෝටි 2400 ක ඖෂධ නැව් හෙලිකොප්ටර ගුවන් යානා මෙන්ම IMF හා ලෝක බැංකු සහාය ලබා ගැනීම හා ඇමෙරිකානු ට්‍රම්ප් තීරුබදු අවම කිරීමට පවා මුලික වුයේ මහින්දය. ආණ්ඩු 03 ක් සමඟ ක්‍රියාකළ එකම රාජතාන්ත්‍රිකයා ද ඔහුය. ඇමෙරිකාව හා ලෝකය සමඟ ඔහු ගොඩනගා ඇති සබදතා ජාලය ද අසාමාන්‍යය.ඇමෙරිකානු තානාපතිකමේ කාලය නිමවීමට පෙර ඉන් ඉවත්වී ජූලි 31 දා ඔහු ඇමෙරිකාවෙන් සමුගැනීමට නියමිතය.

ලොව අසීරුම වැඩ කරලා පෙන්වූ මහින්ද වැනි දක්ෂ අවංක අත්දැකීම් බහුල හා චෝදනාවට  ලක් නොවූ අයෙකු බිළිබා ගැනීමට විපක්ෂයේ බොහෝ පක්ෂ මෙන්ම ආණ්ඩුව ද දැල එළා තිබේ. මහින්ද සමරසිංහ ගේ කරණම කුමක්දැයි රටම බලා සිටින්නේ එවැනි පසුබිමකය.