රාජ්‍ය ආයතන හයක කෝටි ගණනක දූෂණ වාර්තා රහස් පොලීසියට 

රාජ්‍ය ආයතන හයක දූෂණ වංචා සහ අක්‍රමිකතා සම්බන්ධයෙන් සියලු තොරතුරු සාක්කි-සාධක ඇතිව හෙළිදරව් කර ගෙන සිටින පොදු ව්‍යාපාර පිළිබඳ පාර්ලිමේන්තු කාරක සභාව ඊට නීතිමය මාර්ග ගැනීම සඳහා ඒ සියලු තොරතුරු අපරාධ පරීක්ෂණ දෙපාර්තමේන්තුවට ළඟදීම භාර දීමට තීරණය කර ඇත.

මෙසේ හෙළිදරව් වී ඇත්තේ ජාතික මැණික් හා ස්වර්ණාභරණ අධිකාරිය, ජාතික ඖෂධ නියාමන අධිකාරිය, සබරගමුව විශ්ව විද්‍යාලය, ඉඩම් ප්‍රතිසංස්කරණ කොමිෂන් සභාව, මහපොළ භාරකාර අරමුදල සහ ශ්‍රී ජයවර්ධනපුර රෝහල යන ආයතනවල දුෂණ, වංචා සහ අක්‍රමිකතා වන අතර ඒ සියලු තොරතුරු මෙසේ  à¶…පරාධ පරීක්ෂණ දෙපාර්තමේන්තුවට භාර දෙන බව පොදු ව්‍යාපාර පිළිබඳ පාර්ලිමේන්තු තේරීම් කාරක සභාවේ සභාපති වෛද්‍ය නිශාන්ත සමරවීර මහතා පවසයි. 

ඉහත ආයතනවල සිදුව ඇති දූෂණ, වංචා සහ අක්‍රමිකතා අතරින් බරපතළ කොටස් වෙන වෙනම තෝරා ගෙන මෙසේ අපරාධ පරීක්ෂණ දෙපාර්තමේන්තුව භාර දෙන අතර එම දෙපාර්තමේන්තුව එම සිද්ධීන් පිළිබඳව විමර්ශන ආරම්භ කරනු ඇතැයි ද හෙතෙම පෙන්වා දෙයි. 

මේ අතර විවිධ ඉඩම් අක්‍රමිකතා සම්බන්ධයෙන් ලැබී තිබෙන තොරතොරුවලට අදාළව කරුණු විමසීම සඳහා ඉඩම් ප්‍රතිසංස්කරණ කොමිෂන් සභාවේ ප්‍රධානීන් 2025.07.17 වැනිදා පොදු ව්‍යාපාර පිළිබඳ පාර්ලිමේන්තු තේරීම් කාරක සභාව හමුවට කැඳවීමට ද එම සභාව තීරණය කර ඇත.

මීට අමතරව කාබනික පොහොර ගනුදෙනුවට අදාළ වාර්තාවක්ද පොදු ව්‍යාපාර පිළිබඳ පාර්ලිමේන්තු තේරීම් කාරක සභාව මගින් මේ දිනවල සකස් කරමින් පවතින බව ද එම සභාවේ සභාපති නිශාන්ත සමරවීර මහතා වැඩි දුරටත් සඳහන් කර සිටියි..