ඉරුවාරදය (Migraine) නියැන්ඩර්තාල් ජානවලින් ලැබුණු හිසරදයක් ද..?

නිකමට අහන්නෙ, ඔයාටත් මිග්‍රේන් තියෙනවද..?

නියැන්ඩර්තාල් මානවයන්ගේ හිස්කබලේ හැඩය සමකාලීන මිනිසුන්ගේ හිසරදයට, විශේෂයෙන් ඉරුවාරදයට (migraines) හේතු විය හැකි බවට නව අධ්‍යයනයකින් තොරතුරු අනාවරණය වී තිබෙනවා. මෙය අපේ මුතුන් මිත්තන්ගේ ජානමය උරුමය නූතන මිනිසුන්ගේ සෞඛ්‍ය තත්ත්වයන්ට බලපාන ආකාරය පිළිබඳ සිත්ගන්නා සුළු සොයාගැනීමක්. New Scientist සඟරාව වාර්තා කරන ආකාරයට, පර්යේෂකයන් මේ සම්බන්ධය සොයාගෙන ඇත්තේ මානව හිස්කබල් වල සුවිශේෂී හැඩයක් විශ්ලේෂණය කිරීමෙන්.

නියැන්ඩර්තාල් මානවයන්ගේ හිස්කබල නූතන මිනිසුන්ට වඩා තරමක් වෙනස් හැඩයකින් යුක්තයි. විශේෂයෙන්, ඔවුන්ගේ මස්තිෂ්ක කෝඨරක (cerebellar fossa) පිහිටා ඇති හිස්කබලේ පහළ පිටුපස කොටස වඩාත් කැපී පෙනෙන ලෙස පුළුල් හා පැතලි බවක් දක්වනවා. මස්තිෂ්ක කෝඨරක කියන්නේ මොළයේ පිටුපස පිහිටා ඇති අනුමස්තිෂ්කය (cerebellum) පිහිටා ඇති හිස්කබලේ අවකාශයයි. අනුමස්තිෂ්කය ශරීරයේ චලනයන්, සමබරතාවය සහ ඉගෙනුම් ක්‍රියාවලීන් පාලනය කරන ප්‍රධාන මොළයේ කොටසක්.

මේ අධ්‍යයනයට අනුව, සමහර නූතන මිනිසුන්ගේ හිස්කබලේ මේ මස්තිෂ්ක කෝඨරක කොටසත් නියැන්ඩර්තාල් මානවයන්ගේ හිස්කබලට සමාන පුළුල් හා පැතලි හැඩයක් ගන්නවා. නමුත් නූතන මිනිසාගේ මොළයේ අනෙකුත් කොටස්වල වර්ධනය සහ ප්‍රමාණය අනුව, මේ ආකාරයේ හිස්කබල් හැඩයක් ඇති විට, අනුමස්තිෂ්කයට හිස්කබල තුළ ප්‍රමාණවත් ඉඩක් නොලැබෙන තත්ත්වයක් ඇති වෙන්න පුලුවන්.

අනුමස්තිෂ්කයට නිසි ඉඩක් නැති වුනාම, එය අවට ඇති මොළයේ පටක සහ ස්නායු පද්ධතියට පීඩනයක් ඇති කිරීමට ඉඩ ඇති බවත් මේ පීඩනය හිසරදය, විශේෂයෙන් ඉරුවාරදය වැනි තත්ත්වයන් ඇති කිරීමට හේතු විය හැකි බව පර්‍යේෂකයන් විශ්වාස කරනවා.

මේ අධ්‍යයනය මගින් යෝජනා කරන්නේ, නූතන මිනිසුන් තුළ දක්නට ලැබෙන මේ නියැන්ඩර්තාල් හැඩැති හිස්කබල, ඔවුන් අප්‍රිකාවෙන් සංක්‍රමණය වී යුරෝපය සහ ආසියාව වැනි ප්‍රදේශවලට ව්‍යාප්ත වීමේදී නියැන්ඩර්තාල් මානවයන් සමඟ අන්තර් අභිජනනය කිරීමේ ප්‍රතිඵලයක් ලෙස ලැබුණු ජානමය ලක්ෂණයක් විය හැකි බවයි. එනම්, අපේ සමහර මුතුන් මිත්තන්ට නියැන්ඩර්තාල් ජාන උරුම වීමෙන්, ඔවුන්ගේ හිස්කබලේ හැඩය වෙනස් වී, එය ඉරුවාරදය වැනි රෝග තත්ත්වයන්ට ගොදුරු වීමේ අවදානම වැඩි කර ඇති බවයි.

මේ සොයාගැනීම, ඉරුවාරදය වැනි ස්නායු ආබාධවලට හේතු වන ජානමය සහ ව්‍යුහාත්මක සාධක තේරුම් ගැනීමට නව මාවත් විවර කරනවා. අනාගතයේදී, මෙවැනි පර්යේෂණ මගින් ඉරුවාරදය සඳහා වඩාත් ඵලදායී ප්‍රතිකාර ක්‍රම සහ වැළැක්වීමේ ක්‍රමවේදයන් සොයා ගැනීමට හැකි වනු ඇතැයි අපේක්ෂා කරනවා. මෙය, අපේ පැරණි මුතුන් මිත්තන්ගේ ජීවන රටාවන් සහ ඔවුන්ගේ ජානමය දායකත්වය නූතන මිනිසුන්ගේ සෞඛ්‍යයට බලපාන ආකාරය පිළිබඳ විද්‍යාවට ඇති ගැඹුරු අවබෝධය තවත් පුළුල් කරනු නොඅනුමානයි.

- Timeline Tales -