Saturday 20th of July 2024

English Tamil
Advertiesment


හිටපු නාවික හමුදාපති සහ ආරක්ෂක මාණ්ඩලික ප්‍රධානි දයා සඳගිරි සජබයට එක් වෙයි 


2024-02-07 13978

 

සජබයේ සමුද්‍රීය-නාවුක ප්‍රතිපත්ති උපදේශකවරයා ලෙස පත් කෙරේ

 

රට වෙනුවෙන් විපක්ෂ නායක කරන සටනට ශක්තිය ලබා දීම අරමුණයි 

 

 

ශ්‍රී ලංකා නාවුක හමුදාවේ 14 වැනි නාවුක හමුදාපතිවරයා වූ විශ්‍රාමික, දයා සඳගිරි මහතා (VSV, USP rcds, MSc (DS), psc, FCMI) විපක්ෂ නායක සජිත් ප්‍රේමදාස මහතා හමු වී සිය දේශපාලන ගමනට සහයෝගය පළ කිරීමේ අරමුණින් සමගි ජන බලවේගය හා එක් විය.

සමුද්‍රීය සහ නාවුක ක්ෂේත්‍රය සම්බන්ධයෙන් ඔහුට ඇති හසල දැනුම සේම පළපුරුද්ද නිසා විපක්ෂ නායක සජිත් ප්‍රේමදාස මහතා විසින් ඒ මහතාව සමගි ජන බලවේගයේ සමුද්‍රීය සහ නාවුක ප්‍රතිපත්ති පිළිබඳ උපදේශකවරයකු ලෙස පත් කිරීමට පියවර ගත්තේය.

දශක තුනක යුද්ධය වෙනුවෙන් දයා සඳගිරි මහතා නොමසුරුව ලබා දුන් දායකත්වය නිසා 2001 ජනවාරි මස 01 වැනි දා සිට ශ්‍රී ලංකා නාවුක හමුදාපතිවරයා ලෙස පත් කරන ලදී. වසර 53ක නාවුක හමුදා ඉතිහාසයේ වඩාත් පළපුරුදුම නාවුක හමුදාපතිවරයා ලෙස ද ඔහු ඉතිහාස ගත වේ. 

වයිස් අද්මිරාල් දයා සඳගිරි මහතා නාවික හමුදාපතිවරයා ලෙස පත්වීමෙන් අනතුරුව වසර හතරකට ආසන්න කාලයක් ශ්‍රී ලංකා නාවික හමුදාව ප්‍රශංසනීය ලෙස මෙහෙය වූ අතර දකුණු ආසියානු කලාපයේ දූපත් රාජ්‍යයක් ලෙස ශ්‍රී ලංකාව මුහුණ දෙන අභියෝගවලට මුහුණ දිය හැකි ප්‍රබල බලවේගයක් බවට තම භට පිරිස් පරිවර්තනය කිරීමට කටයුතු කළේය.

ඔහු නාවික හමුදාපතිවරයා ලෙස උසස් කර වසර හතරකුත් මාස අටක් එම තනතුරේ කටයුතු කළේය. විශ්‍රාම ගැනීමෙන් පසු ඔහු 2005 සැප්තැම්බර් 01 වැනි දින අද්මිරාල් නිලය සහිත ආරක්ෂක මාණ්ඩලික ප්‍රධානියා ලෙස පත් කරන ලදී. ඔහු 2005 ජුනි 12 වැනි දින එම තනතුරෙන් විශ්‍රාම ගිය පසු 2015 නොවැම්බර් 9 වැනි දින ජෙනරාල් ශ්‍රීමත් ජෝන් කොතලාවල ආරක්ෂක විශ්ව විද්‍යාලයේ සිව්වැනි කුලපතිවරයා බවට පත් විය.

වේයන්ගොඩ දී උපත ලැබූ අද්මිරාල් දයා සඳගිරි මහතා වේයන්ගොඩ ශාන්ත මරියා මහා විද්‍යාලයෙන් සහ කෑගල්ල කෑගලු විද්‍යාලයෙන් සිය පාසල් අධ්‍යාපනය ලබා 1966 නොවැම්බර් මස 14 වැනි දින එවක රාජකීය ලංකා නාවික හමුදාවට බැදී 1969 ජූලි 01 වැනි දින ත්‍රීකුණාමලයේ නාවික සහ සමුද්‍ර විද්‍යාපීඨයට බැඳෙන පළමු නාවික ශිෂ්‍යභට කණ්ඩායමට ඇතුළත් විය. ඉන් අනතුරුව 1972 ජූලි 01 වැනි දින ඔහු නාවික හමුදාවේ උප ලුතිනන්වරයකු ලෙස සේවයට එක්විය.

ශ්‍රී ලංකාවේදී ඔහුගේ පුහුණුව සාර්ථකව නිම කිරීමෙන් පසුල ඔහු උප ලුතිනන් තාක්ෂණික පාඨමාලාව සහ තුවක්කු ශිල්පය පිළිබඳ විශේෂඥතාව සඳහා ඉන්දියාව වෙත යන ලදී. 1984 වසරේ ඉන්දියාවේ වෙලින්ටන් හි ආරක්ෂක සේවා මාණ්ඩලික විද්‍යාලයෙන් උපාධිය ලබා ගත් ඒ මහතා නාවික සහ සමුද්‍ර විද්‍යාපීඨයේ අණ දෙන නිලධාරියා ලෙස කටයුතු කිරීමේ ගෞරවය හිමි කර ගත්තේය. ඔහු එක්සත් රාජධානියේ ලෝකයේ කීර්තිමත් රාජකීය ආරක්ෂක අධ්‍යයන විද්‍යාලයේ පශ්චාත් උපාධි අධ්‍යයනයට සහභාගී වූ පළමු නාවික නිලධාරියා ද වේ. 

එසේම උතුරු, නැගෙනහිර, බස්නාහිර සහ දකුණු නාවික විධානයන්හි ප්‍රදේශයේ ආඥාපතිවරයා ලෙස කටයුතු කිරීමේ ගෞරවය ද ඔහුට හිමි විය. ඔහුගේ සේවා කාලයේ දී ගජබාහු නෞකාව, නෞකා වික්‍රම නෞකාව, ලංකා නැව් සංස්ථාවේ ලංකා කාන්ති වෙළෙඳ නෞකාවේ සහ ලංකා ඛනිජ තෙල් සංස්ථාවේ මෝටර් ටැංකි මහවැලි නෞකාවේ ද සේවය කර තිබේ.

1985 ජනවාරි 01 වන දින ආඥාපති නිලයට උසස් කරන ලද ඔහු නාවික හමුදා මූලස්ථානයේ නියාමනය සහ ආරක්ෂක නිලධාරියා, මාණ්ඩලික සුභ සාධන නිලධාරි, මාණ්ඩලික සන්නිවේදන නිලධාරි, මාණ්ඩලික බුද්ධි නිලධාරි සහ නියෝජ්‍ය අධ්‍යක්ෂ නාවික මෙහෙයුම් වැනි ප්‍රධාන මාණ්ඩලික පත්වීම් දරමින් සිටියේය. පසුව ඔහු පිළිවෙළින් 1989 අප්‍රේල් 01 සහ 1994 මාර්තු 01 යන දිනවල දී කපිතාන් සහ කොමදෝරු නිලයට උසස් කරන ලදී. 

එසේම ඔහු 1997 මාර්තු 08 වැනි දින රියර් අද්මිරාල් නිලයට උසස් කරන ලද අතර 1998 අප්‍රේල් 01 වැනි දින මාණ්ඩලික ප්‍රධානියා ලෙස පත් කරන ලදී. ඔහුගේ සේවා කාලයේ දී පෙන්වූ දක්ෂතා නිසා විශිෂ්ඨ සේවා විභූෂණ පදක්කමෙන්, උත්තම සේවා පදක්කම, ශ්‍රී ලංකා ජන රජ සන්නද්ධ සේවා පදක්කම, ශ්‍රී ලංකා නාවික හමුදාවේ 50 වැනි සංවත්සර පදක්කම, ශ්‍රී ලංකා සන්නද්ධ සේවා දිගු සේවා පදක්කම, ජනාධිපති පදවි ප්‍රාප්ති පදක්කම, 50 වැනි නිදහස් සංවත්සර සැමරුම් පදක්කම සහ උතුරු නැගෙනහිර මෙහෙයුම් ඇතුළු පදක්කම් රැසකින් පිදුම් ලැබීය.
 

Advertiesment