Monday 26th of February 2024

English Tamil
Advertiesment


ව්‍යවස්ථා සභාව සහ විධායකය අතර ගැටුම රටට හානි කරයි 


2024-02-05 1163

 

මේ ගැටුම වහාම සමථයකට පත් කර ගනු 

 

රට පත්ව ඇති අභාග්‍යයෙන් ගොඩගැනීම සියලු දෙනාගේ වගකීමක් 

 

රට වෙනුවෙන් කරූගෙන් සැර ප්‍රකාශයක් 

 

ව්‍යවස්ථා සභාව මඟින් ගෙන ඇති තීන්දුවක් පදනම් කර ගනිමින් විධායකය සහ ව්‍යවස්ථා සභාව අතර මතුව ඇති ගැටුම නොපමාවම සමථයකට පත් කර ගන්නා ලෙස ඉල්ලා සිටින්නේ යැයි සාධාරණ සමාජයක් සඳහා වන ජාතික ව්‍යාපාරයේ සභාපති දේශබන්දු කරු ජයසූරිය මහතා විශේෂ නිවේදනයක් නිකුත් කරමින් කියා සිටින අතර එම එම නිවේදනයේ මෙසේ ද සඳහන් වේ. 

ආණ්ඩුක්‍රම ව්‍යවස්ථාවේ 4 (අ) වගන්තිය යටතේ ශ්‍රී ලංකා ජන රජයේ ජනාධිපතිවරයා වෙත ලැබී ඇති බලතල සහ ආණ්ඩුක්‍රම ව්‍යවස්ථාවේ 17වන සංශෝධනය මගින් ඇති කරුණු ලැබුවාවූ ද, 19 සහ 21 ව්‍යවස්ථා සංශෝධනය මගින් තහවුරු කරනු ලැබුවාවූ ද ව්‍යවස්ථා සභාවට ඇති බලය පිළිබඳව කිසියම් මත භේදයක් මතුව ඇති බවට පෙනෙන්නට තිබීම එවැනි ගැටුමකට හේතුවක් වී ඇති බව දැක ගත හැකිය.

මෙහිදි අප අවධාරණය කරන්නේ 17වන ආණ්ඩුක්‍රම සංශෝධනය මගින් ලබා දුන් බලතල, 18 සහ 20 වන සංශෝධන හරහා අකර්මණ්‍ය කරන ලද්දේ වුවත් 19 සහ 21 වන සංශෝධන හරහා ව්‍යවස්ථා සභාවේ සාමාජිකයින් තම හෘද සාක්ෂියට අනුව බුද්ධිමත්ව සහ ස්වාධිනව  තීරණ ගැනීමට හැකියාවක් ලබාදී ඇති බව අප ඉහළින්ම විශ්වාස කරන බවය.

ඒ අනුව දේශයේ නාමයෙන් අප ඉල්ලා සිටින්නේ රටේ ප්‍රජාතන්ත්‍රවාදය තහවුරු කරමින් සහ ජනතාවගේ අභිලාෂයන්ට ගරු කරමින් මේ රටේ සිවිල් සමාජය මූලිකත්වය ගෙන සටන් කර අත්පත් කර ගත් ජයග්‍රහණයක් දුර්මුඛ කිරීමට කටයුතු නොකළ යුතුව ඇති අතරම එම තත්ත්වය මූලික කර ගෙන කිසිඳු පාර්ශවයක් ගැටුමකට යොමු නොවිය යුතුය යන්නය.

1999 වර්ෂයේ දී පැවැත් වූ දුෂිත වයඹ මැතිවරණයෙන් පසුව සිවිල් සමාජය සහ එක්ව 17 වන සංශෝධනය හරහා ස්වාධීන කොමිෂන් සභා ස්ථාපිත කර ගැනීමට ක්‍රියාකාරී වූ පාර්ශ්වයක් ලෙස මෙම අර්බුදය පිළිබඳව අපට ඇත්තේ බලවත් කණගාටුවකි.

එමෙන්ම ව්‍යවස්ථා සභාව මුල් කර ගනිමින් ස්වාධින කොමිෂන් සභා ස්ථාපිත කර ගැනීම සඳහා වූ සමාජ මැදිහත්වීමට තුඩු දුන් සහ එම අවශ්‍යතාවය හේතු වූ කරුණු පිළිබඳවද අප කිසිවෙක් අමතක නොකළ යුතුව ඇතැයිද සඳහන් කරනු කැමැත්තේමු.

එදා පැවැති ජනතා විමුක්ති පෙරමුණ, පොදු පෙරමුණු රජය සමඟ සන්ධානගත වූයේද 17 වන සංශෝධනය කිරීමේ අවශ්‍යතාවය මුල් කර ගනිමිනි. ඒ හේතුවෙන් ර‌ටේ පරිපාලනය බොහෝ දුරට නිර්දේශපලනීයකරණය වීම ඉතා වැදගත් සිදුවීමක් විය. මැතිවරණ කොමිසමට එදා යෝජනා කළ විශ්‍රාමික ශ්‍රේෂ්ඨාධිකරණ විනුසුරුවරයා පත්කිරීමට එදා සිටි රාජ්‍ය නායකත්වය අකමැති වූවද අනෙකුත් ස්වාධීන කොමිෂන් සභා ස්ථාපිත කිරීමට එම තත්ත්වය බාධාවක් නොවීය. එහි ප්‍රතිඵලයක් ලෙස රාජ්‍ය සේවා සහ පොලිස් වැනි කොමිෂන් සභා සක්‍රීය වීම නිසා ඉන් පසුව පැවැති මැතිවරණ බලපෑම්වලින් තොරව, ස්වාධීනව පැවැත්වීමට හැකි වූ බව අප අමතක නොකළ යුතුය. ඒ බව එකල සිටි මැතිවරණ කොමසාරිස්වරයා ප්‍රසිද්ධියේ ප්‍රකාශ කර තිබේ.

ඉන් පසු 18 වන සංශෝධනය ගෙන ඒ්ම හේතුවෙන් නැවතත් ප්‍රජාතන්ත්‍ර පාලනයක පැවැති අවකාශය ද බරපතළ ලෙස බාධා ඇති කළ අතර, ගෞරවණීය මාදුළුවාවේ සෝභිත හිමිපාණන් වහන්සේගේ නායකත්වයෙන් සාධාරණ සමාජයක් සඳහා වන ජාතික  ව්‍යාපාරය 2013 වසරේ ස්ථාපිත කරන ලද්දේ එකී අභියෝගයන්ට මුහුණ දෙමින් ප්‍රජාතන්ත්‍රවාදය මේ රට අභ්‍යන්තරයේ නැවත තහවුරු කර ගැනීමේ පරම පවිත්‍ර චේතනාවෙනි.

2015 වර්ෂයේදී 19 වන සංශෝධනයේ උපතත් සමඟ ශ්‍රී ලංකාව නැවතත් සමස්ත ලෝකයේම ගෞරවයට පාත්‍රවෙමින් ආදර්ශමත් රටක් ලෙස ඉදිරියට ගමන් කිරීමට ආරම්භ කරන ලද්දේ ඒ අයුරිනි. මේ කාලයේ දී එනම් 8 වන පාර්ලිමේන්ත්‍රවේදී ද විවිධ හේතු මත විධායකය විසින් යෝජනා කරන ලද ඇතැම් නම් පිළි නොගන්නා ලද අතර, සමහර එකඟත්වයන් ප්‍රමාද කළ අවස්ථාද තිබුණි. එසේ කරන ලද්දේ ඒ සඳහා වැදගත් හේතු තිබූ බැවින් බව කිසිවකු අමතක නොකළ යුතුය. එහෙත් 8 වන පාර්ලිමේන්තුවේ ව්‍යවස්ථා සභාව ගනු ලැබූ සෑම තීරණයක්ම ගන්නා ලද්දේ, පූර්ණ එකඟත්වයෙන් වන බවද මෙහිදී සිහිපත් කිරීමට කැමැත්තෙමු.

එහෙත් 2019 වසරෙන් පසු ගෙන එන ලද 20 වන සංශෝධනය හේතුවෙන් පිළි ගත් ප්‍රජාතන්ත්‍රවාදී මූලධර්ම විනාශ කළ අතර, නැවත යම් ප්‍රමාණයකට සතුටු විය හැකි අයුරින් ප්‍රජාතන්ත්‍රවාදය ස්ථාපිත කරමින් 21වන ව්‍යවස්ථා සංශෝධනය ගෙන ඒ්මට ජනාධිපතිවරයා මුල්වීමත් ඊට අධිකරණ අමාත්‍යවරයා ලබා දුන් සහයෝගයත් අප අගය කරන්නේ ඒ මත අප ඇති කර ගත් අපේක්ෂාව  ඉතා පවිත්‍ර වන නිසාය.

17 වන සංශෝධනය ගෙන ඒ්මට දායක වූ අය බොහෝ දෙනකු ජීවතුන් අතර නැත. ඒ් වෙනුවෙන් ඔවුන් කැප කළ ශ්‍රමය, කාලය සහ ලබා දුන් බුද්ධිමය දායකත්වය අවුරුදු 23කට පසු විනාශ වන තත්ත්වයකට යොමු කිරීමට කිසිවකු හෝ උත්සහ කරන්නේ නම් එම තත්ත්වය මහත් වූ වේදනාවකි. එමෙන්ම පවිත්‍ර අරමුණකින් ක්‍රියා කළ එකී පිරිසට කරන්නා වූ අපහාසයකි.

එබැවින් අප නැවතත් ඉල්ලා සිටින්නේ විධායකය සහ ව්‍යවස්ථා සභාව අතර, කිසිඳු ගැටුමක් ඇති නොවීමට වග බලා ගනිමින් රටේ දැවෙන ප්‍රශ්නවලට හේතු සපයා ඇති ආර්ථික දුෂ්කරතා අවම කරමින් ජනතාවගේ සුභ සිද්ධිය සඳහා පෙරමුණ ගන්නා අතර, මහා පරිමාණ ඝාතන, මංකොල්ලකෑම්, මත්කුඩු ව්‍යාප්තිය සහ රට පුරා ඉහවහා ගොස් ඇති දූෂණ සහ අක්‍රමිකතාවයන් අතුගා දැමීමට එක්ව ක්‍රියා කිරීමට කටයුතු කරන ලෙසටය. රට මුහුණ දෙමින් සිටින මෙම අභාග්‍ය සම්පන්න තත්ත්වයෙන් මුදවා ගත හැකි එකම මාර්ගය වන්නේ එම ක්‍රියා පිළිවෙතයි. ඒ සඳහා කටයුතු කිරීම සියලු දෙනා වෙත පැවැරී ඇති වගකීමකි.

Advertiesment