අල් කයිඩා නායකයා අමෙරිකානු ඩ්‍රෝන ප්‍රහාරයකින් මරුට

අල් කයිඩා ත්‍රස්ත සංවිධානයේ නායක අයිමාන් අල් සවාහිරි අමෙරිකාවේ නියමුවන් රහිත ඩ්‍රෝන යානා ප්‍රහාරයකින් මරණයට පත් වූ බව  අමෙරිකානු ජනාධිපති ජෝ බයිඩන් තහවුරු කර ඇත. 
 
ප්‍රහාරයට ලක් වෙද්දී අල් කයිඩා නායකයා ඇෆ්ගනිස්තානයේ කාබුල් අගනුවර ස්ථානයක සිටි බවත් සිදු කළ ත්‍රස්ත විරෝධී මෙහෙයුමකදී ඔහු මෙලෙස ඝාතනය වී ඇති බවත් බීබීසී පුවත් සේවය වාර්තා කරයි. 
 
අමෙරිකන් සී.අයි.ඒ. බුද්ධි අංශයේ තොරතුරු පාදක කර ගනිමින් 71 හැවිරිදි අල් සවේරී ඝාතනය සිදුවූයේ නියමුවන් රහිත ඩ්‍රෝන යානා ප්‍රහාරයක් එල්ල කිරීමෙනි.
 
අමෙරිකන් හමුදා සවාරී ඉලක්ක කර ගනිමින් ඩ්‍රෝන ප්‍රහාරය එල්ල කර ඇත්තේ පසුගිය ඉරිදා (31) ය. ඔහුට මිසයිල ප්‍රහාර දෙකක් එල්ල කරන විට සවාහිරි ආරක්ෂිත නිවසක බැල්කනියේ සිටි බව වාර්තාවේ. 
 
ජනාධිපති ජෝ බයිඩන් මේ පිළිබඳ අදහස් දක්වමින් කියා ඇත්තේ." සවාහිරි අමෙරිකානු පුරවැසියන්ට එරෙහිව මිනීමැරුම් සහ ප්‍රචණ්ඩත්වයේ මාවතක් දියත් කර සිටියා” යනුවෙනි.
 
2011 වසරේදී ඔසාමා බින් ලාඩන්ගේ මරණයෙන් පසු අයිමාන් අල් සවාහිරි අල්කයිඩා සංවිධානයේ නායකත්වයට පත්විය.  
 
2001 වසරේ සැප්තැම්බර් 11වැනිදා අමෙරිකාවේ ලෝක වෙළඳ මධ්‍යස්ථානයට එල්ල වූ ත්‍රස්ත ප්‍රහාරය සැලසුම් කළ අයෙකු ලෙස අමෙරිකාවට වඩාත් අවශ්‍ය කර සිටි ත්‍රස්තවාදී නායකයෙකු ලෙස අයිමාන් අල් සවාහිරි හැදින්වුණි.
 
අල් සවාහිරි ඝාතන මෙහෙයුම සම්බන්ධයෙන් සියලු විස්තර ජනාධිපති ජෝ බයිඩන්, මාධ්‍ය හමුවක් හරහා ප්‍රසිද්ධියට පත් කරනු ඇති බව ධවල මන්දිරය නිකුත් කළ නිවේදනයක දැක්වේ.