Monday 6th of December 2021

English Tamil
Advertiesment


ඊළඟ COVID රැල්ල අත ළඟ..!


2021-10-29 5805

රටම අනතුරේ..!

 

ශ්‍රී ලංකා වෛද්‍ය සංගමය ජනපතිට ලියයි 

 

වෛද්‍ය නිර්දේශ මෙන්න..!

 

සංචරණ සීමා ඉවත්‌ කිරීම ආදී තත්ත්වයන්‌ යටතේ තවත්‌ COVID-19 රැල්ලක්‌ ඉතා ආසන්න කාලයක දී ශ්‍රී ලංකාවේ ඇති වීමේ දැඩි අවදානමක්‌ පවතින බව ශ්‍රී ලංකා වෛද්‍ය සංගමය පවසයි.

එම අවදානම වළක්වා ගැනීම සඳහා ශ්‍රී ලංකා වෛද්‍ය සංගමය මගින් ජනාධිපති ගෝඨාභය රාජපක්ෂ මහතා වෙත විශේෂ නිර්දේශ මාලාවක් ලිඛිතව ලබා දෙනු ලැබ ඇති අතර තවත්‌ COVID-19 රැල්ලක්‌ ඇති වීම වැළැක්වීම සඳහා සීමා කිරීම්‌ සහ නීති ක්‍රියාත්මක වන සන්දර්භය සලකා බැලීමේ දී මීට පෙර පැවති සෑම අවස්ථාවකටම වඩා මෙම අවස්ථාවේ දී නිශ්චිත පියවර ගනු ලැබීම ඉතා වැදගත්‌ වන බව ඔවුහු එමගින් අවධාරණය කර සිටිති.

ශ්‍රී ලනකාවේ යළිත් වතාවක් COVID-19 රැල්ලක්‌ ඇති වීම වැළක්වා ගැනීම සඳහා ශ්‍රී ලංකා වෛද්‍ය සංගමය මගින් ජනාධ්පතිවරයා වෙත නිර්දේශ කරනු ලැබූ පියවරයන් පහත දැක්වේ.

(01) ඉතා හොද අධීක්ෂණයක්‌ යටතේ වත්මන්‌ නීති සහ සීමා කිරීම්‌ දැඩි ලෙස බලාත්මක කිරිම.

සෞඛ්‍ය අමාත්‍යාංශය මගින්‌ COVID-19 පැතිරිම වැළැක්වීමේ අරමුණින්‌ පිළිගත හැකි සහ සාධාරණ මහජන සෞඛ්‍ය මාර්ගෝපදේශ සේම රෙගුලාසි නිකුත්‌ කර ඇතත්‌, මෙම ක්‍රියාමාර්ග ක්‍රියාවට නැංවීමේ දී අතිශයින්‌ ලිහිල්‌ ස්වභාවයක් පවතින අතර මහ ජනතාව එම රෙගුලාසිවලට අවනත නොවන බවත්‌ පෙනී ගොස්‌ තිබේ. බොහෝ දෙනෙක්‌ මුඛ ආවරණ පැළඳීම නිසි පරිදි සිදු නොකරන බව පෙනී ගොස්‌ ඇනි අතර කඩ සාප්පු, මහ ජන පොළ, පූජනීය ස්ථාන සහ අවමංගල්‍ය උත්සව වැනි පොදු ස්ථානවල සමාජ දුරස්ථභාවය නිසි පරිදි ක්‍රියාත්මක නොවේ.

මෙම රෙගුලාසි ක්‍රියාත්මක කිරීමට ප්‍රමාණවත්‌ පියවර ගන්නා ලෙස රජයෙන්‌ ඉල්ලා සිටින අතර සෞඛ්‍ය සේවා අධ්‍යක්ෂ ජනරාල්‌ නිකුත්‌ කර ඇති සෞඛ්‍ය රෙගුලාසි සම්පූර්ණයෙන්ම ක්‍රියාත්මක වන බවට සමීපව නිරීක්ෂණය කිරීම සහ සහතික කිරීම අත්‍යවශ්‍ය වේ.

(02) ප්‍රමුඛතා කණ්ඩායම්‌ සඳහා "ෆයිසර්" එන්නතෙහි තූන් වන මාත්‍රා හෙවත් "BOOSTER" මාත්‍රාව ලබා දීම.

ශ්‍රී ලංකාවේ "සයිනොෆාම්‌" එන්නත ලබා ගත්‌ වැඩිහිටියන්ගෙන්‌ 7%ක්‌ COVID-19 වෛරසයට එරෙහිව ප්‍රමාණවත්‌ ප්‍රතිශක්තියක්‌ වර්ධනය කර ගෙන නොමැති බව තහවුරු වී ඇත. පාසල්‌ නැවත විවෘත කිරීම සහ සංචරණ සීමාවන්‌ ඉවත්‌ කිරීම නිසා සිය මුණුපුරුමිණිපිරියන්‌ වෙත වැළඳී ඒ ඔස්සේ වෛරසය සම්ප්‍රේෂණය වීම වැනි කරුණු නිසා මෙම වැඩිහිටියන්ට COVID-19 ආසාදනය චීමේ අවදානම වත්මන්‌ තත්ත්වය මත දී සැලකිය යුතු ලෙස ඉහළ ගොස්‌ ඇත. මෙම වැඩිහිටි පිරිස අනෙකුත්‌ වයස්‌ කාණ්ඩවලට වඩා COVID-19 වෛරසය නිසා දරුණු ලෙසින්‌ රෝගී තත්ත්වයට සහ මරණයට ගොදුරු වේ.

තවද, "කොච්ෂීල්ඩ්‌" එන්නන ලබා ගත්‌ සෞඛ්‍ය සේවා වෘත්තිකයන්ට දෙවන එන්නත ලබා දී මාස හයක්‌ ගත වෙමින්‌ ඇති බැවින්‌ මාස හය ඉක්මවීමෙන්‌ පසු ඔවුන්ගේ ප්‍රතිශක්තිකරණ මට්ටම ක්‍රමයෙන්‌ අඬු වීමට පටන්‌ ගනී. මේ නිසා ඔවුන්‌ පහසුවෙන්‌ ම COVID-19 ආසාදනය වීමේ අවදානම බෙහෙවින් ඉහළ යනු ඇත. එබැවින්‌, වයස අවුරුදු 60 ට වැඩි පුද්ගලයින්‌, ප්‍රතිශක්තිකරණ ඌණතා සහිත අවුරුදු 60 ට අඩු රෝගීන්‌ සහ සියලුම සෞඛ්‍ය සේවා වෘත්තිකයන්‌හට "ෆයිසර්‌" එන්නතෙහි තෙවන මාත්‍රාව හෙවත් "බූස්ටර්‌" මාත්‍රාව ප්‍රමාදයකින්‌ තොරව ලබා දිය යුතුය. නුදුරු අනාගතයේදී තවත්‌ ආසාදන රැල්ලක්‌ ඇතිවීම වැලැක්වීම සඳහා මෙම ක්‍රියා මාර්ග ඉහළම ප්‍රමුඛතා කාර්යයක්‌ ලෙස සැලකිය යුතුය.

(03) අධි ව්‍යාප්ත වීම්‌ තත්වයන්‌ සහ සිදුවීම්‌ සීමා කරමින්‌ කටයුතු කිරිම.

පුද්ගලයන්‌ වැඩි වශයෙන්‌ ගැවසෙන සංවෘත පරිසරයන්‌ COVID-19 ආසාදනය සඳහා අධි ව්‍යාප්ත වීමේ තත්ත්වයන්‌ නිර්මාණය කරයි. එබැවින්‌ සංවෘත ස්ථානවල පැවැත් වෙන විවාහ උත්සව, ආගමික උත්සව, අවමංගල්‍ය උත්සව, සංගීත සංදර්ශන සහ සමාජ ශාලාවල රැස්වීම්‌ ආදියේ සංඛ්‍යාව සීමා කරමින්‌ පොදු උත්සවවලට අදාළ රෙගුලාසි සම්පූර්ණයෙන්ම ලිහිල්‌ කිරීම තවත්‌ කාලයක්‌ ප්‍රමාද කරන ලෙස අපි රජයෙන්‌ ඉතා ඕනෑකමින්‌ ඉල්ලා සිටින්නෙමු.

(04) පරීක්ෂණ සිදු කරමින්‌ COVID-19 වැළඳී ඇති පුද්ගලයන්‌ සම්බන්ධයෙන්‌ නිරන්තර අවදානයක්‌ පවත්වා ගැනීම.

මීළඟ ආසාදන රැල්ල වැලැක්වීමට නම්‌, ආසාදනවල වැඩිවීමක්‌ කලින්‌ හඳුනා ගැනීම අතිශයින්‌ වැදගත්‌ වනු ඇත. සුපරීක්ෂාකාරිව COVID-19 ආසාදනය වී ඇති මට්ටම නිරීක්ෂණය කිරීම රජයට ඉක්මන්‌ ක්‍රියාමාර්ග ගැනීමට අවස්ථාව උදා කරනු ඇත. එබැවින්‌ COVID-19 සම්බන්ධ නිරන්තරයෙන්‌ සිදු කරනු ලබන පරීක්ෂා කිරීම්‌ ක්‍රියාවලිය ශක්තිමත්‌ කිරීම ඉතා වැදගත්‌ වේ. එබැවින්‌ සෞඛ්‍ය අමාත්‍යාංශය ප්‍රජාව අතර COVID-19 සඳහා පරීක්ෂණ පවත්වා ගෙන යෑම ශක්තිමත්‌ ආකාරයෙන්‌ සිදු කරනු ඇතැයි විශ්වාස කරන අතර සියලුම ප්‍රධාන රෝහල්වල බාහිර රොගී අංශයන්හි "උග්‍ර ශ්වසන කලාප ආසාදන" (SARI) නිරීක්ෂණ පද්ධති ශක්තිමත්‌ කිරීම අත්‍යවශ්‍ය වනු ඇත.

Advertiesment