Monday 27th of September 2021

English Tamil
Advertiesment


වරාය ඇමතියා කටින් පිඹලා නිවපු එක්ස්ප්‍රස් පර්ල් ගින්නේ කතාව..!


2021-05-30 10500

ලොව වරාය දෙකක් ප්‍රතික්ෂේප කළ නැව කොළඹට කැඳ වූයේ ඇයි..? 

 

සිද්ධිය පිටු පස කැත සෙල්ලමක් සිදු වුණා ද..?

 

සාගර කලාපය ආරක්ෂා කරන සැලසුම් කිසිම රජයකට තිබුණේ නැහැ 

 

සාගරයෙන් ප්‍රයෝජන ගන්න දන්නෙත් නැහැ 

 

මුහුදේ නැවක ඇති වන ගින්නක් නිවා ගන්න බැරි රටක් මේ..!

 

ඉන්දියාව නැතිව කිසිවක් කර ගන්න බැහැ 

 

කළ යුත්තේ නාවික හමුදාව ශක්තිමත් කිරීමයි 

 

 

(චින්තන ධරමදාස)

 

පසුගිය මැයි 25 වෙනිදා රාත්‍රියේ මට මගේ ඇමරිකානු මිත්‍රයෙක් කතා කළා. මිනිහා නාවික ක්ෂෙත්‍රයට සම්බන්ධ පුද්ගලයෙක්. "මචං...බලපං දැන් නැව් ගිනි ගන්න එන්නෙත් ලංකාවට අයිති මුහුදට නේ. නැවක් ගිනි ගත්තාම..අනතුරකට ලක් වුණාම ගෙවන රක්ෂණ මුදල හරි විශාලයි මචං. ඒක නිසා පොඩ්ඩක් හොයලා බලපං ඕක පිටි පස්සේ මොකක් හරි කැත ගේම් එකක් තියෙයිද කියලා. මොකද මචං මෙහේ එහෙම ඔහොම නැවක් ගිලුණොත් හරි මුහුදු බත් වුණොත් හරි ඒකෙන් වෙන පරිසර විනාශයට ඒ සමාගමට මාර ගාණක් ගෙවන්න වෙනවා. සමහර වෙලාවට ඒක නිසා ඒ කොම්පැනිය බංකොලොත් වෙනවා. මොකද ඕකෙන් වායුගෝලයට, මුහුදට, සතුන්ට මාර ඩැමේජ් එකක් නේ වෙන්නේ. ඒවා මුං නම් සතේට ගණන් හදලා අය කර ගන්නවා. මම දන්නේ නැහැ ලංකාවේ තත්ත්වය." 

මේ වගේ කතා සාගරයක් ඔහු මට කිව්වා. ඇවන්ගාර්ඩ් පා වෙන අවි ගබඩාව ගැන ඉඳලා සෝමාලියානු මුහුදු කොල්ලකාරයෝ දක්වා දිග කතාවක් ඒක. එතනින් පස්සේ මට නිකමට මේ ගැන ටිකක් හොයන්න හිතුණා. මීගමුව වෙරළට ගොඩ ගහපු බඩු උස්ස ගෙන දුවන ලාංකිකයන් ගැන මාධ්‍ය වාර්තා නිසා වගේම, වරාය ඇමති රෝහිත අබේගුණවර්ධන ගොඩ ඉඳලා කටින් පිඹලා ගින්න නිවපු අපූරුව නිසාම, මේ නැව ගැන එහි ගින්න ගැන යමක් ලියන්න හිතුණා.

 

 

ඉන්දියාව කටාර් එන්න එපා කීව පර්ල්..!

 

එහෙම හිතමින් ඉන්න කොට තමයි splash247.com කියන සිංගප්පූරු වෙබ් අඩවිය "X-Press Pearl was denied entry in India and Qatar before catching fire off Colombo'' කියන සිරසින් පළ කරලා තිබුණ ලිපිය දැක්කේ. මේ ලිපියට අනුව මේ ගින්නට හේතු වුණා කියන ඇසිඩ් කාන්දුව නැවේ සේවකයින් දැන ගන්නේ ලංකා මුහුදු සීමාවට බොහෝ දුර අරාබි මුහුදේදී යි. 

මේ කාන්දුවට හේතුව ඇසුරුම්කරණයේ දී සිද්ධ වුණ දුර්වලතාවයක්, නැති නම් වැරැද්දක් කියලා තමයි මේ වෙබ් අඩවියට අදහස් දක්වන "Tim Hartnoll" කියන්නේ. ඔහු තමයි "X-Press Feeders" කියන සමාගමේ විධායක සභාපති. ඔහු කියන විදිහට මේ ඇසිඩ් කාන්දුව දැන ගත්තට පස්සේ නැවේ කපිතාන් ඉන්දියාවේ බටහිර වෙරළේ තිබෙන හසිරා කියන වරායට සහ කටාර් රාජ්‍යයේ හමාඩ් කියන වරායට කතා කරලා තිබෙනවා. ඒ මේ ප්‍රශ්න ගත බහාලුම් ගොඩබාන්න. එහෙත් මේ ඉල්ලීම් දෙකටම ඉඩ ලැබිලා නැහැ කියලා තමයි මේ වෙබ් අඩවිය කියන්නේ. ඊටපස්සේ තමයි මේ නැව කොළඹ වරායට එන්නේ.

සිංගප්පූරු කොඩිය යටතේ යාත්‍රා කළ මේ නැව 2021 නිෂ්පාදනය කරපු අලුත්ම නැවක්. එක්ස්ප්‍රස් පර්ල් ගිනි ගන්න පටන් ගන්නේ පසුගිය මැයි 20 වෙනිදා. මේ ගින්නට හේතුව විදිහට අනුමාන කරන්නේ රසායනික ප්‍රතික්‍රියාවක්.  ඒ වෙන කොට මේ නැව කොළඹ වරායට ඇතුළු වෙන්න බලා ගෙන වරාය පිවිසුමේ ඉඳලා නාවික සැතපුම් 9.5ක දුරින් තමයි නැංඟුරම් ලා ගෙන ඉඳලා තිබෙන්නේ. වාර්තාවෙන විදිහට මැයි 15 වෙනිදා තමයි ඉන්දියාවේ හසිරා වරායේ ඉඳලා මේ නැව කොළඹ වරාය දෙසට එන්න පටන් අර ගෙන තිබෙන්නේ. 

නයිට්‍රික් අම්ලය මෙක්ට්‍රික් ටොන් 25ක් සහ වෙනත් රසායනික ද්‍රව්‍ය අඩංගු බහාලුම් 1486ක් මේ නැවේ තිබිලා තිබෙනවා. ඉහත වරායන් දෙක මේ බහාලුම් නැවෙන් ඉවත් කර ගන්න අවසර ලබා දුන්නා නම් මේ ව්‍යසනය වෙන්නේ නැහැ. නමුත් මේ ලිපිය ලියන මොහොත වන විට නැව පිපිරිලා අවසන්. මේ වෙන කොට නැවෙන් මුහුදට වැටුණ බහාලුම් සහ සුන්බුන් මීගමුව අවට මුහුදු වෙරළට ගොඩ ගසමින් තියෙනවා. මීගමුව අවට මුහුදු වෙරළේ පැහැය කළු පැහැයට හැරිලා. රජය අනතුරු ඇඟවීම් කරලා තියෙද්දිත් මිනිසුන් මුහුදු වෙරළට ගොඩ ගසා ගෙන එන බඩු එකතු කරනවා. අන්ත්‍රරායකර විෂ රසායන මේ හරහා මිනිස්සුන්ගේ ඇඟට ඇතුළු වෙන්න පුළුවන්. එය මාරාන්තික විය හැකියි. ඒත් මිනිස්සු බඩු එකතු කරනවා. එක ව්‍යසනයක් මදිවට තවත් එකක්. අලි මදිවට හරක් කිව්වලු.

මේ වෙන කොට නැවේ කාර්ය මණ්ඩලයේ 25 දෙනා නිරුපද්‍රිතව බේර ගෙන තියෙනවා. කාර්ය මණ්ඩලයේ දෙදෙනෙක් කොළඹ ජාතික රෝහලට ඇතුළු කළා කියලා වාර්තා වෙනවා. ඒ සුළු තුවාල නිසා. මේ දෙන්නගෙන් එක්කෙනෙකුට කොවිඩ් පොසිටිව් කියලත් කිය වෙනවා. සෙසු කාර්ය මණ්ඩල සාමාජිකයින් 23 දෙනා කොළඹ නිරෝධායන මධ්‍යස්ථානයකට යොමු කරලා තිබෙනවා කියලා වාර්තාවක් නිකුත් කරමින් නැව් සමාගම කියනවා. නැවේ කප්පිත්තා ඇතුළු පිරිස බේර ගත්තට මුහුදු පරිසරය නම් බේරා ගැනීම ලේසි වෙන එකක් නැහැ.  හලාවත ඉඳලා පාන්දුරේට යනකම් වෙරළ තීරයට වගේම මුහුදටත් මේක දැවැන්ත විදිහට බලපායි කියලා තමයි පරිසරවේදීන් කියන්නේ. දැනටත් තෙල් පාවී ඒම වැළක්වීමට පා වෙන දැල් ඇතිරුවා කියලා රජය කියනවා. 

ඒත් දැන් වෙන්න ඕනෑ හානියෙන් 90%ක් සිද්ධ වෙලා ඉවරයි. පරිසරවේදීන් කියන්නේ පොසිල ඉන්ධන මුහුදට එකතුවීම තමයි බරපතළම කියලා. නයිට්‍රික් අම්ලයට අමතරව කෝස්ට්‍රික්සෝඩා, ආලේපන වර්ග, මෙතනෝල්, වයිනයිල් ඇසිටේට් වගේ රසායනික ද්‍රව්‍ය මේ නැවේ තිබිලා තිබෙනවා. ඒත් තෙල් කාන්දුව තමයි වඩාත්ම භයානක. ඒ මොකද අනෙකුත් රසායනික ප්‍රතික්‍රියා කිරීම නිසා හෝ තනුකවීම හින්දා හෝ නැති වෙලා යන්න පුළුවන්. හැබැයි තෙල් එහෙම නෑ. ඒක ජලය මතු පිට තරලයක් වගේ රැඳෙනවා. ඒක මුහුදු ජීවීන්ගේ ජීවිතවලට විශාල ප්‍රශ්නයක් වෙන්න පුළුවන් දැනටමත්. මේ හානියට වන්දි අය කර ගන්නවා කියලා රජය කියනවා. ඒත් ඉතිං මුහුදට, සාගර පරිසර පද්ධතියට, වෙරළට වුණ පාරිසරික හානිය නැවත යථාවත් වෙන්න කොච්චර කාලයක් යයිද..? පවතින නිරිත දිග මෝසම් සුළං සක්‍රීය වීම අස්සේ මේ තත්ත්වය තවත් දරුණු වෙන්න පුළුවන්.

නැව් සමාගම කියනවා නැව බේරා ගැනීම සඳහා කළ හැකි හැම දෙයක්ම කළා කියලා. ඒ ඉන්දියාවේ වෙරළ ආරක්ෂකයින්, ලංකාවේ නාවික හමුදාව, ගුවන් හමුදාව, කොළඹ වරාය මේ සියල්ලන්ම එකතු වෙලා. එහෙත් අයහපත් කාලගුණය ගින්න මැඬලීමට ඉඩ දුන්නේ නැහැ. ලංකාවෙ අපි අපිට හිමි වෙලා තියෙන විශාල සාගර කලාපය ගැන මාර ලස්සන කතා ගොතනවා. කයිවාරු ගහනවා. ඒත් කිසිම රජයකට මේ සාගර කලාපය ආරක්ෂා කර ගන්න ගමන් එහි තිබෙන සම්පත්වලින් රටට ප්‍රයෝජනය ගන්නේ කොහොමද කියන එක ගැන අදහසක් තිබුණේ නැහැ. අපි අද විශාල යුද්ධ හමුදාවක් නඩත්තු කරනවා. ඇත්තට හරි නම් වෙන්න ඕනෑ අපේ නාවික හමුදාව ශක්තිමත් කිරීමයි. අද අපිට මුහුදේ නැවක සිද්ධ වෙන ගින්නක් මැඬලන්න ඉන්දියාව නැතුව ඔවුන්ගේ තාක්ෂණය නැතුව බැහැ. අපි කවද්ද මේ ශක්තිය ලබා ගන්නේ. මෙවැනි ව්‍යසනවලින් අපි දැන්වත් පාඩම් ඉගෙන ගත යුතුයි.

 

 

https://www.aithiya.lk/express-pearl-ship-fire-rohitha.../

Advertiesment