.png)
පොහොසත් රටක් - ලස්සන ජීවිතයක්
2024-09-06 2001
කොපි සහ අපබ්‍රංශ
ප්‍රතිපත්ති ප්‍රකාශන:
(මහාචාර්ය මිල්ටන් රාජරත්න)
කොපි කිරීම
පළමුව, මෙම ප්‍රතිපත්ති ප්‍රකාශය සිංහලෙන් කියවීමෙන් පසු එහි ඉංග්‍රීසි පිටපත කියවීමට දොළක් උපන්නේය. ඒ මක්නිසාද යත් සිංහල පිටපතේ දැක්වෙන බොහෝ සංකල්ප ඉංග්‍රීසි බසින් ලියවුණු සංකල්පවල පරිවර්තන බැව් හැඟීගිය බැවිනි. ඉංග්‍රීසි පිටපත ඇතැයි පෙන්වන Tab එකක් NPP වෙබ් අඩවියේ ඇතත් ඉන් ඇතුළට ගිය පසු එය හිස්ය. ඉංග්‍රීසි පිටපතක් සොයාගැනීමට මා උනන්දු වූයේ අන් කිසිවකට නොව ප්‍රකාශනයේ එන නවීන අදහස් සහිත ඉංග්‍රීසි වැකි එලෙසම Google සෙවුම් යන්ත්‍රයට ඇතුළු කිරීමෙන් එම අදහස් කොපි කළ මූලාශ්‍ර සොයා ගැනීමටය. උපාධි නිබන්ධන, පර්යේෂණ පත්‍රිකා යනාදිය කොපිකර ඇත්දැයි බැලීමට මා අනුගමනය කරන සරළ ක්‍රමය මෙයයි (ඒ මක්නිසාද යත් එම පරීක්‍ෂණ සඳහා Plagiarism software යෙදවුම් ලබාදී නොමැති බැවිනි). එවැනි යෙදවුම් භාවිතයෙන් කොපි කිරීම අනාවරණය කරගැනීමට ඇති හැකියාව දැන දැනම කොපි කළ මූලාශ්‍ර වසං කිරීමට ඉංග්‍රීසි පිටපතක් අන්තර්ජාලයට නිකුත් නොකළේද යන සාධාරණ සැකය මතුවේ. එසේ නැතහොත් අන්තර්ජාලය “හොක් ගාලා යන” නිසා දෝ හෝයි සැක මතුවේ.
මෙම ප්‍රතිපත්ති ප්‍රකාශය තුළ දියුණු රටවල පරිහරණය කෙරෙන නවීන අදහස් සිය ගණනක් ඇතුළත් වන බැවින් එම අදහස් කොපි කරන්නට ඇතැයි යන මතය බැහැර කළ නොහැක. ලෝක බැංකු වාර්තා, ආසියානු සංවර්ධන බැංකු වාර්තා, එක්සත් ජාතීන්ගේ වාර්තා, තිරසාර සංවර්ධන වාර්තා, ලෝක පරිසර සංවිධාන වාර්තා, කාර්මික සංවර්ධන වාර්තා, තිරසාර සංවර්ධන වාර්තා, මානව සංවර්ධන වාර්තා, මානව අයිතිවාසිකම් පිළිබඳ වාර්තා මෙන්ම ලෝක රැඳිවියන්, දුගීන්, කාන්තාවන්, කම්කරුවන්, ළමුන්, සෞඛ්‍ය, විරැකියාව සහ ස්වාභාවික සම්පත් යනාදී ක්‍ෂේත්‍ර පිළිබඳ ගැටළු, විසඳුම්, හා උපාය යන අංශ අළලා කෙතෙකුත් ප්‍රකාශන ඉංග්‍රීසි බසින් පළවන අතර ඒ තුළ නවීන අදහස් අන්තර්ගත වේ. එවැනි කෘතීන්ගෙන් සංකල්ප උකහා ගැනීමේ වරදක් නැතත් ඒවාහි මූලාශ්‍ර සඟවා ඒවා පරිවර්තනය කොට සිය ඔරිජිනල් අදහස් ලෙස ප්‍රකාශ කිරීම නීති විරෝධී හා සදාචාර විරෝධී වන බැවින් ඊට රචනා චෞර්යය (Plagiarism) නම් හොරකම යැයි කියනු ලැබේ.
රට පින්තුර
දෙවනුව, මෙම ප්‍රකාශනය තුළ පළ කොට තිබෙන දුසිම් ගණනක් වන පින්තූර පිළිබඳව ද ප්‍රශ්න පැනනැගේ. එකක් නම් ඒවා ලබාගෙන ඇත්තේ විදේශීය මූලාශ්‍රවලින් වීමයි. දෙවන ප්‍රශ්නය වන්නේ ඒවායෙහි මූලාශ්‍ර නොපෙන්වීමයි. තුන්වැනි ප්‍රශ්නය ඊට වඩා බැරෑරුම් ය. එනම් අප රටේ අනාගත දැක්ම ගැන ලියවෙන මෙම ප්‍රකාශනයේ ලංකාවේ පින්තූර දෙක තුනකට වඩා ඇතුළත් කොට නොතිබීමයි. මෙයද ඉහත කී රචනා චෞර්යය සනාත කරන සාක්‍ෂියකි. එනම් විදේශීය මූලාශ්‍රවලින් අදහස් කොපි කරන ගමන්ම පින්තූර ද කොපි කර ඇති බවයි. ඒ අනුව අපේ රටේ භූමියට හෝ මිනිසුන්ට හෝ අපේක්‍ෂාවන්ට නොගැලපෙන ආකාරයේ සහ පොළොවේ නොව අහසේ පැල කළ සංකල්ප මෙම ප්‍රකාශනය තුළ කොතෙකුත් දැකිය හැක. මෙම ප්‍රකාශනයේ අංශ 39ක් ඔස්සේ විස්තර කොට තිබෙන සංකල්ප නවීන විදේශීය සංකල්ප සිංහලයට පරිවර්තනය කිරීමේ සාක්ෂි එම ප්‍රකාශනය තුළින්ම විද්‍යමාන වන්නේ පරිවර්තකයා විසින්ම එම සංකල්පවල ඉංග්‍රීසි පද සිංහල පද සමග ඉදිරිපත් කොට තිබෙන බැවිනි. සෑම පිටුවකම මේ සඳහා සාක්ෂි සපයා ඇති බව මෙය කියවන විට දැකගත හැකිය. ඉන් අදහස් වන්නේ ලංකාවේ ප්‍රශ්න සිංහල භාෂාවෙන් කිව නොහැකි අතර ඉංග්‍රීසියෙන් වඩා හොඳින් කිව හැකිය යන්න නොවේද? ඒක හරි පුදුමයකි!
මුසාවාද:
තෙවැනුව, මෙම ප්‍රකාශනයේ එන 39 වැදෑරුම් අංශ අළලා විශාල රාජ්‍ය ආයතන සංඛ්‍යාවක් පිහිටුවීමට යෝජනා කොට තිබේ. එයින් ගම්‍ය වන්නේ සෑම කාර්යයකටම පාහේ රාජ්‍ය මැදිහත් වීම වැඩි කිරීමයි. එවිට නිළධාරීවාදය තව තවත් පෝෂණය වී මෙහෙයුම් සංකීර්ණ හා අකාර්යක්‍ෂම වේ. දැනට තිබෙන රාජ්‍ය ආයතන නිසා රාජ්‍ය අංශයේ කාර්යක්ෂමතාවට දැඩි බලපෑමක් එල්ලවී තිබෙන වටපිටාවක එය තව දුරටත් තීව්‍ර කිරීමෙන් රාජ්‍ය විදම ද අකාර්යක්‍ෂමතාව ද වැඩි නොවේද? කොමිෂන් සභා, කවුන්සිල්, මණ්ඩල, කාර්යාල, යන නම්වලින් අලුතින් පිටුවන රාජ්‍ය ආයතන දුසිම් ගණනක් මෙම ප්‍රකාශනයේ ඇතුළත්ය. ඔවුන් හඳුනාගන්නා සෑම ගැටළුවකටම රාජ්‍ය ආයතනය බැගින් පිහිටු වීම අමනෝඥ ක්‍රියාවක් පමණක් නොව ඒ සඳහා දැනට ශ්‍රී ලංකා රාජ්‍ය තුළ පවතින ආයතන, ක්‍රමවේද, අණපනත්, බලතල යනාදිය පිළිබදව ඔවුන්ගේ අල්ප වූ දැනුමද එමගින් ප්‍රදර්ශනය කිරීමක් ද වේ. එමෙන්ම එවැනි ආයත පිහිටුවීමට දැරිය යුතු වියදම් හා එම වියදම් පියවීම පිණිස ආදායම් සොයා ගන්නා ආකාරය එහි දක්වා නැත. එහෙයින් සෑම ගැටළුවකටම විසඳුම් ලෙස කාර්යක්ෂම ආයතන පද්ධතියක් පිහිටුවන බව කීම කෙප්පයක් මිස සත්‍යයක් විය නොහැක.
ආධුනික බව:
සිව්වැනුව, මෙම ප්‍රකාශනයේ පිටු 231 පුරාම ප්‍රදර්ශනය වන්නේ ආවේග අනුව ගොතන ලද හා ගොනු කරන ලද සිය ගණනක් වූ සැලසුම් සමූහයකි. ඒවා තාර්කික හා විචාරවත් භාවයෙන් ඌන වන අතර ආවේග හා ආසාවන් ගෙන් අනූන වේ. සංවර්ධිත රටවල සංචාරය කරන ආධුනිකයන් එහි දකින දකින සෑම දෙකටම ආසා කරයි. එවැනි දේ අපේ රටේ නෑ නේදැයි වික්ෂිප්තවෙයි. අපේ රටේ දේශපාලකයන්ගේ වැරැද්ද නේදැයි සිතයි. අපේ රටේ මිනිසුන් පවු නේදැයි සිතයි. අපටත් එවනි රටවල තත්වයට පත්විය නොහැකි දැයි සිතයි. මේ වනාහී ආධුනිකයන්ගේ ආවේග පමණි. එම ආවේග දේශපාලන පක්ෂයක ප්‍රතිපත්ති ලෙස ඉදිරිපත් කිරීම කොතරම් ප්‍රාථමිකද? සංවර්ධිත රටවල් අතීතයේ දරිද්‍රව සිට ඉහළ ආදායම් ලබන තත්වයට පත්වූයේ එම රටවල දේශපාලකයන්ගේ පිහිටෙන්ම පමණක් නොව ව්‍යවසායකත්වය, තාක්ෂණික සොයාගැනීම්, නව නිපැයුම්, වෙළඳාම මෙන්ම සේවක හා ජනතා විනය යනාදී අංශවල සහ ආයතන පද්ධතියෙහි හටගත් දියුණුව නිසාය. තවද අපේ රටේ ඒක පුද්ගල ආදායම ඩොලර් 4,000 මට්ටමේ පවතින බැවින් සමාජ සංවර්ධනය සැසඳිය යුත්තේ එම මට්ටමේ ආදායම් ලබන රටවල් සමග මිස ඩොලර් හැට හැත්තෑ දාහේ රටවල් සමග නොවන බව ඔවුන් වටහාගෙන නැත.
UNP ප්‍රතිපත්ති:
පස්වැනුව, මෙම ප්‍රතිපත්ති ප්‍රකාශනයේ සමාජවාදී ප්‍රපත්ති දැකිය නොහැකි අතර UNP ප්‍රතිපත්ති සමූහයක් දක්නට ලැබේ. එනම් පෞද්ගලික ව්‍යවසාය ක්‍රමය, පෞද්ගලික ධනය, පෞද්ගලික ඉඩම් හිමිකම, නීල හරිත සංවර්ධන ප්‍රතිපත්ති යනාදී සෑම සියලු ප්‍රතිපත්තියක්ම මෙහි වෙනත් ආකාරයෙන් දක්වා තිබේ. බොහෝ විට මෙය NPP ප්‍රතිපත්තිද එසේ නැතිනම් UNP ප්‍රතිපත්තිද යන්න පවා නොවැටහෙන තරමට කොපියක් බව පෙනේ. එමෙන්ම නොමිලේ දෙන දේ පිළිබඳ පොරොන්දු, රැකියා පොරොන්දු, සිහින ලෝකවල ඇවිද්දවන සුන්දර පොරොන්දු අතින් බලන විට සමගි ජනබලයේ වේදිකාවල දුන් පොරොන්දුවලට බෙහෙවින් සමාන පෙරොන්දු සමූහයක් මෙහි ද ඇතුළත් වේ. එසේ නම් ජාතික ජන බලවේගය UNP හා SJB ආකෘතියේම පක්ෂයක් බව මේ මගින් විද්‍යමාන වෙයි. එහෙත් එම පක්ෂයට නායකත්වය දෙන්නේ JVP ය නිසා එහි යටි අරමුණ වන්නේ විජේවීරගේ ප්‍රතිපත්ති මත කොමියුනිස්ට් ආණ්ඩුවක් පිහිටුවීමයි. ඒ බව නොකියා බලය ලබාගැනීමේ අටියෙන් සමාජ ප්‍රජාතන්ත්‍රවාදී ප්‍රතිපත්තියක් එළි දැක්වීම වංචනික ක්‍රියාවක් නොවේද?
වචන සෙට් එකක්:
හයවැනුව, ඔවුන්ගේ 39 වැදෑරුම් ප්‍රතිපත්ති තුළ එකිනෙකට නොගැලපෙන අතාර්කික ලෙස පෙළ ගස්වා තිබෙන වචන සෙට් එකක් දැකිය හැක. ඉන් බොහෝ ඒවා ජාත්‍යන්තර ප්‍රකාශනවල හුදු කොපි බව පෙනෙන බැවින් ද ශ්‍රී ලංකා සමාජයට නුහුරු බැවින් ද ඒවායෙහි අර්ථයක් තේරුම් ගැනීම දුෂ්කරය. මෙවැනි දේ ලියනුයේ සිතාමතා ජනතාවට සුරංගනා ලෝක මවා පෑමටය. මේ සඳහා නිදසුන් ඔවුන්ගේ ප්‍රකාශනයෙන් උපුටා දැක්විය හැක.
පළමු අරමුණ වන පරිසමාප්ත ජීවිතයකට නිදර්ශන ලෙස ශිෂ්ට සම්පන්න පුරවැසියෙක්, සනීපාරක්ෂක ජීවිතයක්, ජයග්‍රාහී ජනතාවක්, උදාර සංස්කෘතික ජීවිතයක්, සහකම්පනීය ජනතාවක්, සං‍රක්ෂිත ඉතිහාසයක්, උරුම නව්‍යකරණයක්, සදාහරිත ජීවිතයක්, සමබර තොරතුරු සමාජයක් යනාදිය පෙන්වා දිය හැක. දෙවන අරමුණ වන ගෞරවනීය ජීවිතයක් යන්නට නිදර්ශන ලෙස සුපෝෂිත ජාතියක්, සාධාරණ මිනිස් අනන්‍යතාවක්, සංස්කෘතිකවත් නිවහල් චින්තනයක්, නිරාබාධිත සමාජ ජීවිතයක්, යුක්ති සහගත සම ප්‍රවේශයක් යනාදිය පෙන්වා දිය හැක. තුන්වන අරමුණ වන නවීන ජීවිතයක් යන්නට අදාළ නිදර්ශන ලෙස ප්‍රජාතාන්ත්‍රික ආර්ථිකයක්, ව්‍යසායකත්ව ප්‍රවේශයක්, ගුණාත්මක මත්ස්‍ය සම්පතක්, ජීවධරණී ප්‍රවේශයක්, කාර්යක්ෂම ගමනාන්තයක්, තිරසර සමුද්‍ර සම්පතක්, සන්නිවේදන තාක්ෂණ විප්ලවයක්, ඒකාබද්ධ පරිහරණ සැලසුමක්, විද්‍යාත්මක ඉදිකිරීම් ක්ෂේත්‍රයක් යනාදිය පෙන්වා දිය හැක. හතරවන අරමුණ වන අභිමානවත් ජීවිතයකට අදාළ නිදර්ශන ලෙස නොසැලෙන රටක්, නව ආණ්ඩුක්‍රම ව්‍යවස්ථාවක්, සම ප්‍රවේශී අධිකරණ පද්ධතියක්, තෘප්තිමත් වෘත්තීයභාවයක්, යුක්තිගරුක රැඳවුම් දිවියක්, ස්වෛරී රාජ්‍යයක්, ශ්‍රී ලාංකේය ජාතියක්, විශ්වීය පුරවැසියෙක් යන ඒවා පෙන්වා දිය හැක.
අපබ්‍රංශ:
ප්‍රතිපත්ති ප්‍රකාශනයක් යනු ජන සමාජයයේ ප්‍රශ්න හා ගැටළු පිළිබිඹු කෙරෙන හා ඒවාට ප්‍රායෝගික හා තාර්කික විසඳුම් හා උපාය යෝජනා කරනු ලබන පොදු ජනයාට තේරුම් ගැනීමට පහසු ලියවිල්ලක් විය යුතුය. එහෙත් ලාංකික පුරවැසියාට NPP ප්‍රකාශනයේ අරමුණු, ප්‍රතිපත්ති, උපාය, හෝ ඉලක්ක තේරුම් ගැනීමට පශ්චාද් උපාධියක්වත් සම්පූර්ණ කළ යුතුව ඇත. එහි දැක්වෙන පද ඉංග්‍රීසියෙන් Jargon යනුවෙන් හැඳින්විය හැකි අතර ඊට පරියාය වචන වන්නේ ප්‍රභාශාව, අණ්ඩර දෙමළ, හා අපබ්‍රංශ යනාදිය යි. එවැනි බසක් තේරුම් ගැනීමට පරණවිතාන ගෙන්වාගත යුතු යැයි කතාවක් ගෙතී ඇත්තේ ඒ තරමටම තේරුම් ගැනීම දුෂ්කර වන බැවිනි. තේරුම් ගැනීමට අපහසු ලෙස ලිවීම ලේඛක ප්‍රයෝගයකි. යමක් හරිහැටි නොතේරෙන විට ද බොරුවෙන් පාඨකයා නොමග යැවීමට ද මෙවැනි ලේඛන ශෛලියක් යොදා ගැනීම එම ප්‍රයෝගය යි. ඒ අනුව NPP ප්‍රතිපත්ති ප්‍රකාශනය සාමාන්‍ය ඡන්ද දායකයාට කියවා තේරුම් ගත නොහැකි ලෙස ප්‍රයෝගකාරී ලෙස අපබ්‍රංශයෙන් ලියූවක් බව පෙනේ.
කේයස් ලියූ ‘උගත්කම’:
NPP ප්‍රතිපත්ති ප්‍රකාශනය කියවූ මට කුඩා කල ඉගෙනගත් පාඩමක් මතකයට නැගුණි. එළු සකු මගධ පොත් කට පාඩමට දත්, පණ පිටින් ඇවිදින පුස්තකාලයක් වැනි උගතෙකු ලියූ පොතක් කිසිවෙකුට තේරුම් ගත නොහැකි වූයෙන් එය ලියූ කෙනාම තැන් තැන්වලට යමින් එය කියවා බලෙන් අසන්නට සැලස්වූවත් මිනිසුන්ට එය නොතේරීම නිසා හිරිහැරයක් වී එම තැනැත්තා දකින විට පළාගිය අයුරුත් අවසානයේ දී ඔහු “අම්බලමට හිඟන්නෝ රැස්වෙති රෑට, නරකද එතන තෝරාගත්තම මීට” යනුවෙන් සිතා හිඟන්නෙකු මෙන් රාත්‍රියේ අම්බලමට ගොස් එහි රාත්‍රිය ගත කළ හින්ගන්නන් ඉදිරියේ දී පොත කියවූ බවත් එවිට හිඟන්නන් ද අම්බලමෙන් පිටව හිස් ලූ ලූ අත පළා ගිය බවත් සාගර පළන්සූරිය (කේයස්) ලියූ ‘උගත්කම’ නම් කෘතියෙහි දැක්වේ. විශාල මහන්සියක් යොදවා, විද්වත් මණ්ඩල 39ක දායකත්වයෙන් ලියන ලදුව මහත් වියදමක් දරා උදාර ලෙස ජනගත කරන ලද NPP ප්‍රතිපත්ති ප්‍රකාශනය කියවා තේරුම් ගැනීමට නොහැකි ලියවිල්ලක් වීම පාඩුවකි. කේයස්ගේ කෘතියෙහි පෙන්වා දුන් ඉරණම NPP ප්‍රතිපත්ති ප්‍රකාශනයට අත් නොවේවායි පතමු.
වැල්පාලම මගහැරීම:
NPP ප්‍රතිපත්ති ප්‍රකාශනයේ ජනාධිපතිවරයෙකුට කළ හැකි කාර්යයන්ට වඩා පාර්ලිමේන්තුවෙන් කළ හැකි හා කළ යුතු කාර්යයන් එහි බහුල ලෙස ඇතුළත් කොට තිබීම මගින් පෙනෙන්නේ ඔවුන් මෙවර ඉදිරිපත් වන්නේ ජනාධිපතිවරණයකට බව තේරුම් ගෙන නොමැති බවයි. මෙවැනි ගැටළු රැසකින් සම්න්විත වන NPP ප්‍රතිපත්ති ප්‍රකාශනය දැක්මක් අන්තර්ගත නොවන එහෙත් සිත්ගන්න සුළු ලියවිල්ලක් පමණක් බව නිගමනය කළ හැක. එබැවින් ඡන්ද දායකයා උනන්දු විය යුත්තේ නොතේරෙන ලියවිලිවලට හෝ සුරංගනා කතාවලට කතිරය ගැසීමට නොව තේරුම් ගත හැකි, සරළ, යතාර්ථවාදී ලියවිල්ලකින් පෙන්වා දෙන යෝජනාවලට කතිරය ගැසීමටයි.
අපබ්‍රංශ කතා සහ සුරංගනා ලෝකවලට වශී වී ඡන්දය දීමෙන් වැඩි කල් නොයා අපායක් බඳු රටක් ඉබේ හැදෙන බව ඡන්ද දායකයා තේරුම් ගැනීම වැදගත්ය. සියලු ප්‍රශ්න එකවර විසඳීමට වඩා මේ අවස්ථාවේ අවශ්‍ය වන්නේ දැනට මුහුණ දී සිටින මූලික ප්‍රශ්නය වන ආර්ථික බංකොලොත් භාවය පිළිබඳ ප්‍රශ්නය කෙරෙහි නිසි අවධානය යොමු කිරීමයි. NPP ප්‍රතිපත්ති ප්‍රකාශනයේ මේ සම්බන්ධ කිසිදු ප්‍රායෝගික උපායමාර්ගයක් නිර්දේශ කොට නොමැති අතර වැල්වටාරම් කියා වැල්පාලමට ගොඩවීමෙන් වැළකී සිටීමේ උප්පරවැට්ටියක් යොදා ඇති බව පෙනේ. එසේ නම් ආර්ථික බංකොලොත් භාවය ගැන තිරසාර හෝ ප්‍රායෝගික පිළිවෙතක් යෝජනා නොකොට වැල්පාලම මගහරින ප්‍රතිපත්තියකට අනුමැතිය දිය යුතු නැත.
.jpg)
Lanka Newsweek © 2024