ජනාධිපති රනිල් වික්‍රමසිංහ මහතා හරීන් සහ මනූෂ හමුවෙයි.

 
හරීන් ප්‍රනාන්දු සහ මනූෂ නානායක්කාර සමගි ජන බලවේගයෙන් නෙරපා හැරීමේ තීරණය නීත්‍යානුකූල බවට දුන් ශ්‍රේෂ්ඨාධිකරණ තීන්දුවෙන් මොහොතකට පසු, ජනාධිපති රනිල් වික්‍රමසිංහ මහතා හරීන් ප්‍රනාන්දු සහ මනූෂ නානායක්කාර යන මහත් වරුන් හමුවී ඔවුන් දෙදෙනාගේ සහයෝගයට ස්තූතිය පළ කර 'කලබල වෙන්න එපා' යනුවෙන් පවසා ඇත.

 තවද සජිත් ප්‍රේමදාස අත්හැර රටට වඩාත්ම අවශ්‍ය මොහොතක රට වෙනුවෙන් වැඩ කිරීමට තීරණය කළ බැවින් තමන් ‘ඔළුව කෙලින් තියන්’ ඉවත්ව යන බව තීන්දුව ලැබුණු විගස මන්ත්‍රී ධුර අහිමිව ඇමැති ධුරවලින් ඉවත්වීමට සිදුවූ හිටපු ඇමැතිවරුන් දෙදෙනා ජනාධිපතිවරයාට දැනුම් දුන් බවට වාර්තා වේ.

 ඔවුන් දෙදෙනාට අමාත්‍ය ධුරවලින් ඉවත් වීමට සිදුවීම සම්බන්ධයෙන් කණස්සල්ලට පත්ව සිටින ජනාධිපති වික්‍රමසිංහ, මහතා ඔවුන්ගේ වෙහෙස මහන්සි වී වැඩ කිරීම අගය කරන බවත් තමන් සමඟ රැඳී සිටින ලෙස ඔවුන්ගෙන් ඉල්ලා සිටින බවත් පවසා තිබේ.

 එහිදී ඔවුන් දෙදෙනාම ජනාධිපතිවරයා සමඟ සිටිමින් රනිල් වික්‍රමසිංහගේ මැතිවරණ ව්‍යාපාරයට සම්බන්ධ වීමට ප්‍රතිඥා දී ඇත.

"ජනාධිපතිතුමා මට එතුමාගේ රැලි 100 මෙහෙයවීමේ කාර්යය භාර දීලා තියෙනවා. ඒ නිසා මම ඒකට සම්පූර්ණයෙන්ම සම්බන්ධ වෙනවා. එතුමා දිනුවොත් මම ආසනයකට තරග කරනවද කියලා මම පසුව තීරණය කරනවා,"හරීන් ප්‍රනාන්දු මාධ්‍ය වෙත පවසා තිබුණි
 
එසේම මනූෂ නානායක්කාර මහතා ද ජනාධිපතිවරයාගේ ප්‍රචාරක ව්‍යාපාරයට සම්බන්ධ වනු ඇත.හරීන් සහ මනූෂ පාර්ලිමේන්තු මන්ත්‍රී ධුරවලින් නෙරපා හැරීමෙන් පසු සංචාරක, තරුණ හා ක්‍රීඩා අමාත්‍යාංශ ජනාධිපතිවරයා යටතට පත්වන බවත් , ඉඩම් සහ විදේශ රැකියා අමාත්‍යාංශ අග්‍රාමාත්‍ය දිනේෂ් ගුණවර්ධන මහතාගේ විෂය පථයට එකතු වනු ඇත.

නමුත් සංචාරක ව්‍යාපාරයේ උච්චතම අවස්ථාව හේතුවෙන් සංචාරක රාජ්‍ය අමාත්‍යවරයෙකු දිවුරුම් දීමට නියමිතව ඇත.