රවීට එරෙහිව බැඳුම්කර චෝදනා එල්ල කරනු බැහැ

අභියාචනා අධිකරණයෙන් රීට් ආඥාවක්

ශ්‍රී ලංකා මහ බැංකුවේ බැඳුම්කර වෙන්දේසි දෙකකදී රජයේ මුදල් සාපරාදි සාවද්‍ය පරිහරණය කළේ යැයි චෝදනා කරමින් හිටපු මුදල් අමති රවී කරුණානායක මහතාට එරෙහිව කොළඹ ත්‍රිපුද්ගල මහාධිකරණ දෙකක් හමුවේ ගොනු කළ නඩු දෙක පවරා පවත්වා ගෙන යාමට නොහැකි බවට තීන්දු කරමින් නීතිපතිවරයාට රිට් ආඥාවක් අභියාචනාධිකරණය අඟහරුවාදා (28) නිකුත් කළේය.  

රවි කරුණානායක මහතා විසින් මහාධිකරණ නඩු දෙක අභියෝගයට ලක් කරමින් ඉදිරිපත් කළ රිට් පෙත්සම් දෙකක තීන්දුව ලබා දෙමින් අභියාචනාධිකරණ විනිසුරු සෝභිත රාජකරුණා සහ ධම්මික ගනේපොල යන මහත්වරුන්ගෙන්  සමන්විත අභියාචනාධිකරණ විනිසුරු මඩුල්ලක් මෙම තීරණය ලබා දුන්නේය.

2016 වසරේ මාර්තු මස 29 වනදා සහ 31 වන දා ශ්‍රී ලංකා මහ බැංකුව විසින්  සිදු කළ බැඳුම්කර වෙන්දේසි දෙකකදී රුපියල් බිලියන 50 කට අධික රජයේ මුදල් සාවද්‍ය ලෙස පරිහරණය කළේ යැයි චෝදනා කරමින් හිටපු මුදල් අමාත්‍ය රවි කරුණානායක මහතා ඇතුළු එකොළොස් දෙනෙකුට  එරෙහිව නීතිපතිවරයා විසින් අධිචෝදනා 23ක් යටතේ  කොළඹ ත්‍රිපුද්ගල මහාධිකරණ විනිසුරු මඩුල්ල  හමුවේ නඩු පවරා තිබිණි.

අදාළ නඩු දෙක විභාග කළ ත්‍රි පුද්ගල මහාධිකරණය පොදු දේපළ පනත යටතේ පවරා පවත්වා ගෙන යෑමට නොහැකි බව සඳහන් කරමින් රවි කරුණානායක මහතා ඇතුළු විත්තිකරුවන් වූ අධි චෝදනා 13ක් නිදහස් කිරීමට 2022 මාර්තු 4 වැනි දින නියෝග කළේය.

ඉන් අනතුරුව හිටපු මුදල් ඇමතිවරයා තමන්ට එරෙහිව චෝදනා ගොනු කර තිබෙන ආකාරය නීතියට පටහැනි බවත් එබැවින් තමන්ට එරෙහි චෝදනා පවරා පවත්වා ගෙන යාමට නොහැකි බව තීන්දු කොට එම නඩුවලින් තමන්ව ඉවත් කිරීමේ නියෝග නිකුත් කරන ලෙස ඉල්ලා  මෙම පෙත්සම් අභියාචනාධිකරණයට ඉදිරිපත් කළේය.

එම පෙත්සම් දීර්ඝ ලෙස විභාග කළ අභියාචනාධිකරණය රවී කරුණානායක මහතාට එරෙහිව කොළඹ මහාධිකරණය හමුවේ ගොනු කර තිබෙන චෝදනා පවත්වා ගෙන යාමට නොහැකි බව තීරණය කරමින් නීතිපතිවරයා වෙත රිට් ආඥාවක් නිකුත් කළේය.

2016 වසරේ මාර්තු මස 29 වනදා ශ්‍රී ලංකා මහ බැංකුව විසින් සිදු කළ බැඳුම්කර වෙන්දේසියේදී රුපියල් බිලියන 36.8 98 ක් වටිනා භාණ්ඩාගාර බැඳුම්කර සම්බන්ධයෙන් සාපරාධී විශ්වාසය කඩ කළේ යැයි චෝදනා කරමින් පර්පචුවෙල් ට්‍රෙෂරීස් සමාගම, හිටපු මුදල් අමාත්‍ය රවි කරුණානායක, හිටපු මහ බැංකු අධිපති අර්ජුන් මහේන්ද්‍රන්, අදාළ සමාගම අධ්‍යක්ෂවරුන් වන අර්ජුන් ඇලෝසියස්, ජෙෆ්රි ඇලෝසියස් සහ කසුන් පලිසෙන ඇතුළු විත්තිකරුවන් එකොළොස් දෙනෙකුට එරෙහිව නීතිපතිවරයා විසින් පොදු දේපළ පනත ඇතුළු අධි චෝදනා 32ක් යටතේ මෙම නඩුව ගොනු කර ඇත.

හිටපු මහ බැංකු අධිපති අර්ජුන මහේන්ද්‍ර සහ ගාර්ධි පුංචිහේවා යන විත්තිකරුවන් විදෙස් ගතව ඇති බැවින් ඔවුන් නොමැතිව නඩුව විභාග කෙරේ. දෙවන මහ බැංකුව බැඳුම්කර වෙන්දේසියේදී රුපියල් බිලියන 15 ක පාඩුවක් සිදු කිරීමට එරෙහිව නඩු පවරා  තිබිණි.