Monday 26th of October 2020

English Tamil
Advertiesment


රාජ්‍ය විගණනය ගැන කරූගෙන් මහින්දට පාඩමක් 


2020-10-05 2434

20 වැනි ආණ්ඩු ක්‍රම ව්‍යවස්ථා සංශෝධනය මගින් රාජ්‍ය විගණනයට කිසිදු බලපෑමක් සිදු කිරීමට අදහස් නොකරන්නේ නම් කළ යුත්තේ එකී වගන්තිවලට සංශෝධන ඉදිරිපත් කිරීමෙන් වැළකීම හෝ විගණනය වඩාත් ශක්තිමත් කරන සංශෝධන ඉදිරිපත් කිරීම යැයි හිටපු කතානායක සහ සාධාරණ සමාජයක් සදහා වන ජාතික ව්‍යාපාරයේ සභාපති දේශබන්දු කරු ජයසූරිය මහතා විශේෂ නිවේදනයක් නිකුත් කරමින් කියා සිටියි. 

දේශබන්දු කරු ජයසූරිය මහතා මේ බව අවධාරණය කර සිටින්නේ, 20 වැනි සංශෝධනයෙන් විගණකාධිපතිවරයාගේ බලතල කප්පාදු වෙන බවට විපක්‍ෂය ගෙන යන ප්‍රචාර යන මාතෘකාව යටතේ අග්‍රාමාත්‍ය මහින්ද රාජපක්ෂ මහතා නිකුත් කර ඇති විශේෂ නිවේදනය සම්බන්ධයෙන් ප්‍රතිචාර දක්වමිනි. 

එම නිවේදනය මෙසේය.

ප්‍රජාතන්ත්‍රවාදය සුරැකීමට කැප වුණු සිවිල් සංවිධානයක් වශයෙන් අපගේ අදහස් ද ගරු අගමැතිතුමාගේ කාරුණික අවධානයට යොමු කරනු කැමැත්තෙමි.

අධිකරණ අමාත්‍යවරයා විසින් ගැසට් පත්‍රයේ පළ කරන ලද සහ ඔහු විසින් 2020 සැප්තැම්බර් 02 දින පාර්ලිමේන්තුවට ඉදිරිපත් කරන ලද විසි වන ආණ්ඩුක්‍ර ව්‍යවස්ථා සංශෝධන පනත් කෙටුම්පත සම්බන්ධව සමාජය තුළින්ද ආණ්ඩුපක්‍ෂයේ ඇතැම් පාර්ෂව තුළින්ද මතුව ඇති මූලික විරෝධයක් වන විගණකාධිපතිවරයාගේ බලතල අඩු කිරීම සම්බන්ධ චෝදනාවට ලබා දී ඇති පිළිතුර පිළිබදව අපගේ අවධානය යොමු කර ඇති අතර ඊට අදාළව පහත කරුණු කෙරෙහි ඔබගේ අවධානය යොමු කරමි.

මූලික වශයෙන්ම මාධ්‍ය නිවේදනයෙන් දක්වන්නේ විගණන සේවා කොමිෂන් සභාව අහෝසි කිරීම මගින් විගණනයට හානියක් සිදු නොවන බවය. විගණන සේවා කොමිෂන් සභාව මගින් සිදු කරන ලද්දේ විගණනය සිදු කරන නිළධාරීන් සදහා වෙනම සේවාවක් ස්ථාපනය කිරීම මගින් විගණනය ස්වාධින සේවාවක් බවට පත් කිරීමය. එකී කොමිෂන් සභාව අහෝසි කිරීම මගින් විගණනයේ ස්වාධිනත්වය ඉබේම අහෝසි වී යන අතර විගණකාධිපතිද ඇතුළුව විගණනයට සම්බන්ධ සියලුම දෙනා ජනාධිපති විසින් පත් කරන සහ ජනාධිපතිට අවශ්‍ය විටෙක් ඉවත් කළ හැකි (විසි වන සංශෝධනයට අනුව) රාජ්‍ය සේවා කොමිෂන් සභාව යටතට පත්වේ. එය රාජ්‍ය විගණනයට සිදු වන බරපතල අගතියකි.

ජනාධිපති කාර්යාලය සහ අග්‍රාමාත්‍ය කාර්යාලය විසි වන ව්‍යවස්ථා සංශෝධන කෙටුම්පත මගින් විගණකාධිපතිවරයාගේ විෂය පථයෙන් ඉවත් කර ඇති අතර එය සාධාරණී කරණය කරන අගමැතිතුමා පවසන්නේ එම ආයතන දෙක දෙපාර්තමේන්තු ලෙස සලකා විගණකාධිපතිට විගණනය කළ හැකි බවයි. නමුත් ආණ්ඩුක්‍රම ව්‍යවස්ථාවේ විගණකාධිපතිගේ විෂය පථයට ප්‍රකාශිතව ඇතුළත්ව තිබූ ආයතන දෙකක් සංශෝධනයක් මගින් ඉවත් කිරීමෙන් නීති සම්පාදකයන්ගේ අරමුණ එම ආයතන දෙක විගණකාධිපතිගේ විෂය පථයෙන් ඉවත් කිරීම බව පැහැදිළිව පෙනී යයි.

රජයට අයත් සමාගම් විගණකාධිපතිගේ විෂය පථයෙන් ඉවත් කිරීම පිළිබදව කරුණු දක්වන ගරු අගමැතිතුමා ප්‍රකාශ කරන්නේ එම සමාගම්වල විගණනය භාර පුද්ගලික සමාගම්වල විගණනය විගණකාධිපතිගේ අධීක්‍ෂණය යටතේ සිදු කළ යුතු බවට නියෝග කිරීමට විගණකාධිපතිට බලය ඇති බවයි. රාජ්‍ය සමාගම් විගණකාධිපතිගේ විගණනයට දක්වන ලද අඩු සහයෝගය සහ පාර්ලිමේන්තුවේ පොදු ව්‍යාපාර කාරක සභාවට උත්තර දීමට දක්වන ලද අඩු උනන්දුව සලකන කළ ආණ්ඩුක්‍රම ව්‍යවස්ථාව තුළ ලිඛිතව සදහන් කිරීමකින් තොරව රාජ්‍ය සමාගම් විගණකාධිපතිගේ විෂය පථයට ඇතුළත් කළ නොහැක. එසේම විගණකාධිපතිගේ විෂය පථයට යටත්ව පැවති රාජ්‍ය සමාගම් සංශෝධනය මගින් ඉවත් කරන්නේ නම් එහි අර්ථය වන්නේ ව්‍යවස්ථා සම්පාදකයින්ගේ අරමුණ එය විගණකාධිපතිගේ විෂය පථයෙන් ඉවත් කිරීම බවයි. මේ නිසා අගමැතිතුමා පවසන පරිදී රාජ්‍ය සමාගම්වලින් 50% ක් නොව 100%ක් ම රාජ්‍ය විගණනයෙන් ඉවත්වේ.

විගණකාධිපති පත් කිරීම පිළිබදව සදහන් වන ව්‍යවස්ථාවේ  “සුදුසුකම්ලත් විගණනවරයකු” යන්න ඉවත් කිරීම මගින් ප්‍රායෝගිකව වෙනසක් සිදු නොවන බව ගරු අගමැතිතුමා ප්‍රකාශ කළද විගණකාධිපති ලෙස සුදුසුකම්ලත් විගණනකවරයකු හැර වෙනත් තැනැත්තෙක් පත් කිරීමට අදහසක් නොමැති නම් එම ප්‍රතිපාදනය ඉවත් කිරීමට මෙම සංශෝධනය මගින් අදහස් කරන්නේ කුමක්  නිසාද යන ප්‍රශ්නය මතුවේ.

20 වන ආණ්ඩුක්‍රම ව්‍යවස්ථා සංශෝධනය මගින් සිදු කිරීමට උත්සාහ කරනු ලබන්නේ 19 වන සංශෝධනය මගින් ආණ්ඩුක්‍රම ව්‍යවස්ථාවට සිදු කරන ලද සංශෝධන ඉවත් කර 19 වන සංශෝධනයට පෙර පැවති තත්ත්වයට ආණ්ඩුක්‍රම ව්‍යවස්ථාව ගෙන ඒම බවට ගරු අගමැතිතුමා සදහන් කරයි. මෙම 20 වන ව්‍යවස්ථා සංශෝධනය මගින් විගණනයට කිසිදු බලපෑමක් සිදු කිරීමට අදහසක් නොමැති නම් කළ යුතු හොදම දෙය වන්නේ එකී වගන්තිවලට සංශෝධන ගෙන ඒමෙන් වැළකීම හෝ විගණනය වඩාත් ශක්තිමත් කරන සංශෝධන ගෙන ඒමයි.

දැනටමත් නීතිපතිතුමා විසින් 20වන සංශෝධනයේ කාරක සභා අවස්ථාවේදී ඉදිරිපත් කරන බවට වූ යෝජනාවලියක් ගරු ශ්‍රේෂ්ඨාධිකරණයට ඉදිරිපත් කර ඇත. එකී ලියවිල්ල සහ ගරු අගමැතිතුමාගේ මෙම මාධ්‍ය නිවේදනය අතර බරපතල පරස්පරතාවක් පවතී. එබැවින් 20 වන ව්‍යවස්ථා සංශෝධනය පිළිබද කාරක සභා අවස්ථාවේදී රාජ්‍ය විගණනය සම්බන්ධව ධනාත්මක සංශෝධන මෙම කෙටුම්පතට ඇතුළත් විය හැකි යැයි කිසිසේත් විශ්වාස කළ නොහැකිය.

කෙසේ හෝ ජාතික වැදගත්කමින් යුත් කරුණක් ගැන ගරු අගමැතිතුමාගේ අවධානය යොමු කිරීම අගය කරන අතර සාම්ප්‍රදායානුකූලව මෙම පනත නියම වශයෙන් ඉදිරිපත් කළ යුත්තේ අමාත්‍යවරයෙකු විසින් නොව, ගරු අගමැතිතුමන් විසින් බවද කාරුණිකව පෙන්වා දෙනු කැමැත්තෙමි.  

 

Advertiesment