Sunday 5th of July 2020

English Tamil
Advertiesment


පාර්ලිමේන්තුව කැඳවා අර්බුදයක් හදන්න සූදානම් නැහැ -කරූ-


2020-04-23 6150

ව්‍යවස්ථා අර්බුදයට අර්ථ නිරූපණයක් දිය හැක්කේ ශ්‍රේෂ්ඨාධිකරණයට විතරයි 

 

ඒකපාර්ශවික වැඩ නැහැ- ශ්‍රේෂ්ඨාධිකරණ තීන්දුවක් අනුව ක්‍රියා කරනවා

 

ව්‍යවස්ථා අර්බුදය වළක්වා ගැනීම සියලු දෙනාගේ වගකීමක් 

 

 
(සුජිත් මංගල ද සිල්වා)     

 

ඒකපාර්ශවිකව පාර්ලිමේන්තුව කැඳවා රට හමුවේ තවත් අර්බුදයක් ඇති කිරීමට තමා සූදානම් නැතැයි හිටපු කතානායක සහ ආණ්ඩුක්‍රම ව්‍යවස්ථා සභාවේ සභාපති දේශබන්දු කරු ජයසූරිය මහතා අවධාරණය කර සිටියි.

එමෙන්ම මෙවැනි ව්‍යවස්ථාමය ගැටලුවකදී ඒ සඳහා අර්ථ නිරූපණයක් ලබා දිය හැක්කේ ශ්‍රේෂ්ඨාධිකරණයට වන අතර, ශ්‍රේෂ්ඨාධිකරණය ඒ සම්බන්ධයෙන් ලබා දෙන තීන්දුවකදී ඒ අනුව කටයුතු කිරීමට තමා බැඳී සිටින බව පෙන්වා දුන් කරු ජයසූරිය මහතා වැඩි දුරටත් අවධාරණය කර සිටියේ  ලොවටම බලපාන දරුණු වසංගත තත්ත්වයක් පවතින මේ මොහොතේ ව්‍යවස්ථාමය අර්බුදයක් ඇතිවීම වළක්වා ගැනීම සඳහා සියලු දේශපාලන පක්ෂ නායකයින් සහ පාර්ශවයන් වග බලා ගත යුතු බවය.

දේශබන්දු කරු ජයසූරිය මහතා මේ අදහස් පළ කර සිටියේ කතානායක නිල නිවසේදී  බදාදා (23) පෙරවරුවේ පැවැති ආණ්ඩුක්‍රම ව්‍යවස්ථා සභා රැස්වීමේදී  රටේ උද්ගත වී ඇති තත්ත්වය සම්බන්ධයෙන් සිය ස්ථාවරය පැහැදිළි කරමිනි.

කතානායක නිල නිවසේදී රැස් වී ආණ්ඩුක්‍රම ව්‍යවස්ථා සභාව කළ සාකච්ඡාවට අදාළ කරුණු සහ එහිදී ගත් තීන්දු තීරණ සම්බන්ධයෙන් පාර්ලිමේන්තුවේ සන්නිවේදන දෙපාර්තමේන්තුව නිකුත් කර ඇති නිවේදනය මෙසේය. 

ආණ්ඩුක්‍රම ව්‍යවස්ථා සභාව බදාදා (23) පෙරවරුවේ එහි සභාපති සහ හිටපු කථානායක කරු ජයසූරිය මහතාගේ ප්‍රධානත්වයෙන් කතානායක නිල නිවසේදී පැවති අතර අග්‍රාමාත්‍ය ගරු මහින්ද රාජපක්ෂ, හිටපු විපක්ෂ නායක ගරු සජිත් ප්‍රේමදාස යන මහත්වරුන්ද හිටපු පාර්ලිමේන්තු මන්ත්‍රිවරුන් වන ගරු ආර්. සම්බන්ධන් මහතා, ගරු මහින්ද සමරසිංහ මහතා, ගරු බිමල් රත්නායක මහතා සහ ගරු තලතා අතුකෝරළ මහත්මියද ඊට සහභාගී වූහ. ඔවුනට අමතරව සිවිල් සංවිධාන නියෝජිතයන් වන ජාවෙඩ් යූසුෆ් සහ නාගනාදන් සෙල්වකුමාරන් යන මහත්වරුන් ද ආණ්ඩුක්‍රම ව්‍යවස්ථා සභාවේ මහලේකම් සහ පාර්ලිමේන්තුවේ මහලේකම් ධම්මික දසනායක මහතා හා නියෝජ්‍ය මහලේකම් නීල් ඉද්දවල මහතාද ඊට එක්ව සිටියහ.

සාකච්චාව ආරම්භයේදී ආණ්ඩුක්‍රම ව්‍යවස්ථා සභාවේ සාමාජිකයෝ සියලුම ස්වාධීන කොමිෂන් සභාවල ප්‍රගතිය සමාලෝචනයට ලක් කළහ. ස්වාධීන කොමිෂන් සභා විසින් ආණ්ඩුක්‍රම ව්‍යවස්ථා සභාවට එවා තිබූ කාර්ය සාධන වාර්තා මෙහිදී අවධානයට ලක් විය. 

ස්වාධීන මැතිවරණ කොමිෂන් සභාව විසින් ආණ්ඩුක්‍රම ව්‍යවස්ථා සභාව වෙත එවා තිබූ ලිපි 02ක් ද මෙහිදී අවධානයට ලක් විය.

මැතිවරණ කාලසීමාවේදී පොලිස් දෙපාර්තමේන්තුව තුළ සිදු කරන පොලිස් නිලධාරීන්ගේ ස්ථාන මාරුවීම් සහ පත්වීම් ලබාදිම් පොලිස් කොමිෂන් සභාව විසින් මැතිවරණ කොමිසමේ එකඟත්වය ඇතිව සිදු කළ යුතු බව එක් ලිපියක සඳහන් විය.

මේ අවස්ථාවේදී අදහස් දැක්වූ ආණ්ඩුක්‍රම ව්‍යවස්ථා සභාවේ සාමාජිකයන් කිහිපදෙනෙක්, මේ වන විට සිදු කර ඇති පොලිස් ස්ථාන මාරුකිරීම් පිළිබඳව කරුණු මතු කළහ.ඒ අනුව මේ පිළිබඳ පොලිස් කොමිෂන් සභාවේ අවධානය යොමු කරවීමට මෙහිදී තීරණය කරන ලදී. 

එමෙන්ම හානි පූර්ණය සම්බන්ධව වන කාර්යාලයේ පවතින පුරප්පාඩු සම්බන්ධයෙන් මෙහිදී අවධානය යොමු කෙරුණු අතර එම කාර්යාලයේ කටයුතු විධිමත්ව පවත්වා ගෙන යාමට හැකි වන ලෙස එම පුරප්පාඩු මීළඟ රැස්වීමේදී සම්පූර්ණ කිරීමටද මෙහිදී තීරණය විය. 

ඉන්පසුව කෝවිඩ් 19 වසංගතය මෙරට පවතින තත්ත්වය සහ එය වැළැක්වීමට රජය ගෙන ඇති පියවර මෙන්ම ජන ජීවිතය යථා තත්ත්වයට පත් කිරීමට අනුගමනය කරමින් තිබෙන පියවර ද ගරු මහින්ද රාජපක්ෂ මහතා විසින් දීර්ඝව පැහැදිලි කරන ලදී.

කෝවිඩ් 19 වසංගතය හමුවේ මැද පෙරදිග රටවල සේවය කරනු ලබන ශ්‍රී ලාංකික ශ්‍රමිකයන්ගේ ගැටලු සොයා බලා එම ගැටලු නිරාකරණය කිරීමට පියවර ගනිමින් සිටින බව ආණ්ඩුක්‍රම ව්‍යවස්ථා සභාවට අග්‍රාමාත්‍යවරයා දැනුම් දුන්නේය. එමෙන්ම විදේශ රටවල අධ්‍යාපනය සඳහා ගොස් සිටින සිසුන් නැවත මෙරටට ගෙන්වා ගැනීමට ගනු ලබන පියවර ද මෙහිදී සාකච්ඡාවට ලක් විය. 

මේ අතර කෝවිඩ් 19 වසංගතය සමඟ රට තුළ ඇති වී තිබෙන ජාතික ව්‍යසනය විසඳීමට පටු දේශපාලන වාසි නොතකා සියලු දේශපාලන පක්ෂ භේදයකින් තොරව කටයුතු කිරීමේ වැදගත්කම මෙහිදී කරු ජයසූරිය මහතා අවධාරණය කළේය.

එමෙන්ම මෙම ව්‍යසනයට මුහුණ දීමේදී විධායකය පසුගිය පාර්ලිමේන්තුවේ පක්ෂ නායකයන්ගේද අදහස් ලබා ගනිමින් කටයුතු කිරීම සුදුසු වන බව ආණ්ඩුක්‍රම ව්‍යවස්ථා සභාවේ සාමාජිකයන් කිහිපදෙනෙක්ම අදහස් දක්වමින් කියා සිටියහ.

පාර්ලිමේන්තුව නැවත කැඳවීම සම්බන්ධයෙන් ජනමාධ්‍ය තුළ පවතින කතාබහ පිළිබඳව අදහස් දැක්වූ ආණ්ඩු ක්‍රම ව්‍යවස්ථා සභාවේ සභාපති කරු ජයසූරිය මහතා, පාර්ලිමේන්තුව තමන් විසින් කැඳවා තවත් අර්බුදයක් ඇති කිරීමේ අදහසක් නොමැති බව සඳහන් කළේය.

මෙවැනි ව්‍යවස්ථාමය ගැටලුවකදී අර්ථ නිරූපණයක් ලබා දිය හැක්කේ ශ්‍රේෂ්ඨාධිකරණයට බවත් ශ්‍රේෂ්ඨාධිකරණය ඒ සම්බන්ධයෙන් ලබා දෙන තීන්දුවකදී ඒ අනුව කටයුතු කිරීමට තමන් බැඳී සිටින බවත් ජයසූරිය මහතා පැවසුවේය.

එමෙන්ම ලොවටම බලපාන දරුණු වසංගත තත්ත්වයක් පවතින මේ මොහොතේ ව්‍යවස්ථාමය අර්බුදයක් ඇති කර නොගන්නා ලෙස තමන් සියලු පක්ෂ නායකයන්ගෙන් සහ පාර්ශවයන්ගෙන් ඉල්ලා සිටින බවද ඒ මහතා සඳහන් කළේය.
 

Advertiesment