Sunday 5th of July 2020

English Tamil
Advertiesment


දින නියමයකින් තොරව මැතිවරණය කල් දැමීමට කොමිසමට බලයක් නැහැ


2020-04-18 3242

අනාගත උපකල්පන මත අනිවාර්ය නීති උල්ලංඝණය කරනු බැහැ 

 

මැතිවරණ කොමිසම ක්‍රියා කළ යුත්තේ උපකල්පන මත නොවේ- පාර්ලිමේන්තු මැතිවරණ පනත අනුවයි

 

වසංගතයෙන් අනාරක්ෂිත ලෝකයේ ශ්‍රී ලංකාව සුරක්ෂිතයි 

 

වසංගතයේ මර්දනයට අදාළ ශ්‍රී ලංකාවේ සාර්ථකත්වය ලොවම පිළි ගන්නවා 

 

දිස්ත්‍රික් 25න් 11ක එකම රෝගියෙකුවත් ඇත්තේ නැහැ 

 

විපක්ෂය අවස්ථාවාදීයි 

 

සජිත් ප්‍රේමදාස මුල සිටම කකුලෙන් ඇද්දා 

 

යහ පාලනය මැතිවරණ සිතියම හැකුළුව

 

මහින්දට එරෙහිව මහින්ද දුන් සැර උත්තරය මෙන්න 

 

 
(සුජිත් මංගල ද සිල්වා) 

 

අනාගතයේදී සිදු විය හැකි හෝ නොහැකි සිද්ධීන් සම්බන්ධ උපකල්පන මත පිහිටා අනිවාර්යෙන් පිළි පැදිය යුතු නීති රීති නොසලකා ක්‍රියා කිරීමට කිසිවෙකුට නොහැකි තත්ත්වය හමුවේ දින නියමයකින් තොරව මහ මැතිවරණය කල් තැබීමට මැතිවරණ කොමිෂන් සභාවට සහ එහි සභාපතිවරයාට කිසිදු නීතිමය බලයක් නැතැයි අග්‍රාමාත්‍ය මහින්ද රාජපක්ෂ මහතා අවධාරණය කර සිටියි.

ඒ අනුව 1981 අංක 1 දරණ පාර්ලිමේන්තු මැතිවරණ පනතේ 24 (3) වගන්තියට අනුව ජනාධිපතිවරයා නියම කළ දිනයට පාර්ලිමේන්තු මැතිවරණය පැවැත්වීමට නොහැකි නම්, ඒ සඳහා වෙනත් දිනයක් නියම කිරීමට මැතිවරණ කොමිසම නීතිමය වශයෙන් බැඳී සිටීන බව පෙන්වා දෙන මහින්ද රාජපක්ෂ මහතා එසේ දිනයක් නියම කළාට පසුව සාකච්ඡා කළ යුතු යම් යම් කරුණු කාරණා තිබේ නම් ඒ සඳහා යොමු විය හැකි යැයි ද කියා සිටියි.

අග්‍රාමාත්‍ය මහින්ද රාජපක්ෂ මහතා මේ බව අවධාරණය කර සිටින්නේ මාරාන්තික නව කොරෝනා වෛරස් වසංගතය සහ මේ වන විට කල් තබා තිබෙන මහ මැතිවරණය සම්බන්ධයෙන් සිය ස්ථාවරය පැහැදිළි කර විශේෂ නිවේදනයක් නිකුත් කරමිනි. 

අග්‍රාමාත්‍ය මහින්ද රාජපක්ෂ මහතා නිකුත් කර ඇති එම විශේෂ නිවේදනය සම්පූර්ණයෙන් මෙසේය.

කොරෝනා වෛරස් වසංගතය ඇමරිකාව, ඉන්දියාව, බංග්ලාදේශය වැනි රටවලට බලපෑවේ එම රටවල් කාලයක් මුළුල්ලේ වේගවත් ආර්ථික වර්ධනයක් සාක්ෂාත් කර ගෙන, ශක්තිමත්ව සිටි අවස්ථාවකය. නමුත් ශ්‍රී ලංකාවට මේ උවදුරට මුහුණ දීමට සිදු වූයේ දරුණු ආර්ථික කඩා වැටීමක් මධ්‍යයේය. 2015 සිට 2019 දක්වා සිදු වූ අවපාලනය නිසා අපේ ණය බර 71% කින් වැඩි විය. රුපියලේ අගය 30% කින් කඩා වැටුණි. ආර්ථික වර්ධන වේගය 2.7% ක් දක්වා අඩුවිය. 2019 නොවැම්බරයේදී අපි ජනාධිපතිවරණය දිනා අලුත් ආණ්ඩුවක් පිහිටෙව්වද, අපට පාර්ලිමේන්තුවේ බහුතරයක් නොමැති වීම හේතුවෙන් පහුගිය ආණ්ඩුවේ බෙහෙත් හා පොහොර සැපයුම්කරුවන්ට හිඟ මුදල් ගෙවීම සඳහාවත් අතුරු සම්මත ගිණුමක් සම්මත කර ගැනීමට නොහැකි විය.

මේ අවස්ථාවේදී අස්වැසිල්ලට ඇත්තේ ව්‍යවස්තාවේ 150 (3) වගන්තිය යටතේ ජනාධිපතිවරයාට හිමි වෙන මුදල් බලතල පිළිබඳ විධිවිධාන පමණි. අපිට කොරෝනා වෛරස් වසංගතයට මුහුණ දීමට සිද්ධ වූයේ මේ සියලුම අවාසිදායක තත්ත්වයන් මධ්‍යයේය. පසුගිය මාර්තු 11 වැනිදා පළමු කොරෝනා රෝගියා හමුවීමත් සමගම, අපි රෝගය කල්තියා හඳුනා ගැනීම, රෝගීන් වෙන්කර ප්‍රතිකාර කිරීම, අවදානමට ලක්වූ පුද්ගලයන් නිරෝධායනයට ලක් කිරීම, රෝගීන් ඇසුරු කළ පුද්ගලයන් සොයා ගැනීම සහ සමාජ දුරස්ථ භාවය පවත්වා ගැනීම වැනි පාලන ක්‍රමවේදයන් හඳුන්වා දුන්නෙමු. මේ ආකාරයේ මෙහෙයුමක් අපගේ ජීවිත කාල තුළ කිසිදාක අපි අත්දැක නැත. රෝගය පැතිරීම වැළැක්වීමට සති ගණන් එක දිගට ඇඳිරිනීතිය පැනවීමටත් අපට සිදුවිය.

රට පුරාම තම නිවෙස්වලින් පිටවීමට නොහැකි ජනතාවට ආහාර, බෙහෙත් වැනි අත්‍යාවශ්‍ය ද්‍රව්‍ය ලබා ගැනීමට ක්‍රමවේදයක් සැලසිය යුතු විය. අඩු ආදායම්ලාභී පවුල්වලට ආධාර සැපයිය යුතු විය. රටේ නිෂ්පාදන ක්‍රියාවලිය පවත්වා ගෙන යෑම සඳහා වී ගොවීන්, එළවළු ගොවීන් හා ධීවරයන්ගේ නිෂ්පාදන මිලදී ගත යුතු විය. මේ සියලුම දේ එක විට ඉතා කෙටි කාලයක් තුළ සංවිධානය කර ගැනීමට හැකිවීම සැබැවින්ම කළමනාකරණයේ ප්‍රාතිහාර්යයකි. කොරෝනා වෛරස් වසංගතය පාලනය කිරීමේදී ශ්‍රී ලංකාව ලබා ගෙන ඇති සාර්ථකත්වය අද මුළු ලෝකයම පිළිගනී.

ජනාධිපතිවරයා මේ සම්බන්ධයෙන් අද්විතීය නායකත්වයක් සපයා ඇත. අපේ රජයේ වෛද්‍යවරුන්, හෙදියන් ඇතුළු සෞඛ්‍ය කාර්ය මණ්ඩල මුළු  ලෝකයේම අවධානය දිනා ගෙන ඇත. රෝගීන් ඇසුරු කළ පුද්ගලයන් සොයා ගැනීමේදී අපේ බුද්ධි අංශ පෙන්වා ඇති දක්ෂකම හා කැපවීම නිසාත්, නිරෝධායනය ක්‍රියාවලිය පවත්වා ගෙන යාමේදී ත්‍රිවිධ හමුදාව පෙන්වා ඇති කාර්යක්ෂමතාවය නිසාත් රෝගය පැතිරීම පාලනය වී ඇත. 

පොලීසිය ඇතුළු සෑම තරාතිරමකම රජයේ සේවකයන් කොරෝනා මර්දන ව්‍යාපාරයේ සාර්ථකත්වයට දායක වී ඇත. අද කොරෝනා වෛරසය නිසා අනාරක්ෂිත වී ඇති ලෝකය තුළ අපේ රට වඩාත්ම සුරක්ෂිත ස්ථානයකි. අපිට මේ තත්ත්වයට ඒමට පුළුවන් වූයේ විනාශ කරන ලද ආර්ථිකයකුත්, පුළුවන් හැම අවස්ථාවකදීම ආණ්ඩුවේ කකුලෙන් අදින, රටට ආදරයක් නැති අවස්ථාවාදී විපක්ෂයකුත් මේ රටේ තිබියදීය.

නිරෝධායනයට යෑම ප්‍රතික්ෂේප කළ අය දිරි ගැන්වීම තුළින් විපක්ෂනායකවරයා මුල් අවස්ථාවේ සිටම කොරෝනා වෛරස් මර්දන ව්‍යාපෘතිය කඩාකප්පල් කිරීමට උත්සාහ දැරීය. ඉන්පසු, පාර්ලිමේන්තුව විසුරුවා හැර තිබෙන අවස්ථාවක රජයේ මුදල් වැය කිරීමට ජනාධිපතිවරයාට බලය නැතැයි කියමින් ඔවුන් සෞඛ්‍ය සේවය ඇතුළු සියලු රජයේ සේවාවන් කඩාකප්පල් කිරීමට උත්සාහ දැරුවේය. නව පාර්ලිමේන්තුව ජූනි දෙවැනිදාට කලින් හමුවිය යුතු බවත්, පාර්ලිමේන්තු මැතිවරණය ඊට කලින් පැවැත්වීමට නොහැකි බවත්, එම නිසා පාර්ලිමේන්තුව විසුරුවා හරිමින් නිකුත් කළ ගැසට් පත්‍රය අහෝසි කළ යුතු බව අද ඔවුන් පවසා සිටී.

යහපාලන ආණ්ඩුව අවුරුදු තුනකින් පළාත් පාලන ඡන්දය කල් දැමූ ආකාරය අපට මතකය. ඒ ඡන්දය උසාවියට ගොස් දින නියමයක් නැතිව කල් දමා ගැනීමට ඔවුන් ගත් උත්සාහය ව්‍යාර්ථ වූයේ නඩු නැති පළාත් පාලන ආයතනවලට හෝ ඡන්දය පවත්වන බව මැතිවරණ කොමිසම ප්‍රකාශ කළ නිසා පමණි. 2017 දී පළාත් සභා විසුරුවා හැරීමට දින කිහිපයක් තිබියදී, පළාත් සභා ඡන්දය පැවැත්වීම වැළැක්වීමට යහපාලන ආණ්ඩුව පළාත් සභා ඡන්ද ක්‍රමය වෙනස් කළේය. ඒ සංශෝධන පනත සම්මත කිරීමට පාර්ලිමේන්තුවේ තුනෙන් දෙකේ බලයක් අවශ්‍ය බව නීතිපතිවරයා ප්‍රකාශ කළ විට ඔවුන් පාර්ලිමේන්තුවේ කොරිඩෝවේ දැමූ "ඩීල්" තුළින් ඡන්ද වෙනුවෙන් ප්‍රතිපත්තිය පාවා දී අවශ්‍ය බහුතරය ලබා ගත්තේය .

ඒ අපකීර්තිමත් ගනුදෙනුවේ ප්‍රතිඵලයක් හැටියට 2017 අගෝස්තු 25 වැනිදා සම්මත කළ පළාත් පාලන මැතිවරණ සංශෝධන පනතේ සමානුපාතික නියෝජිත ප්‍රතිශතය 40% ක් වන අතර, ඊට මාසයකට පසු සම්මත කරනු ලැබූ පළාත් සභා මැතිවරණ සංශෝධන පනතේ සමානුපාතික නියෝජිත ප්‍රතිශතය 50% ක් වේ. ශ්‍රේෂ්ඨාධිකරණයට පෙත්සමක් ඉදිරිපත් කොට ප්‍රකාශයට පත් කර තිබුණු පාර්ලිමේන්තු මැතිවරණයක් අවලංගු කර ගත් දේශපාලන පක්ෂ සිටින ලෝකේ එකම ප්‍රජාතන්ත්‍රවාදී රට වෙන්නෙත් ශ්‍රී ලංකාවය. වත්මන් පාර්ලිමේන්තු මැතිවරණය කල් දමා ගැනීමට මේ ගෙන යන උත්සාහය ඒ අපකීර්තිමත් යටගියාවේම දිගුවකි.

කුමන අවස්ථාවකදී හෝ සාමාන්‍ය ජන ජීවිතය මේ රටේ නැවත ආරම්භ විය යුතුය. අපේ පරිපාලන දිස්ත්‍රික්ක 25න්, එකොළහක එකම කෙරෝනා වෛරස් ආසාදිතයෙක් වත් නැත. තවත් දිස්ත්‍රික්ක හතක ආසාදිතයන් හමුවී ඇත්තේ එක්කෙනෙකු හෝ දෙදෙනෙකි. තවත් දිස්ත්‍රික්ක දෙකක රෝගීන් පස් දෙනෙකුත් හත් දෙනෙකුත් අතර ගණනක් සොයා ගෙන ඇත. රෝගීන් සැළකිය යුතු ගණනක් සොයා ගෙන ඇත්තේ දිස්ත්‍රික්ක පහක පමණි.

පසුගිය මාර්තු දෙවැනිදා ජනාධිපතිවරයා පාර්ලිමේන්තුව විසුරුවා හරිමින් මැතිවරණය පවත්වන දිනය අප්‍රේල් 25 හැටියටත්, අලුත් පාර්ලිමේන්තුව මුල් වරට හමු වෙන දිනය මැයි 14 වැනිදා හැටියටත් නියම කළේය. ඊට දින දහයකට පසු පළමු කොරෝනා රෝගියා සොයා ගත් අවස්ථාවේදී මැතිවරණය පවත්වන දිනය කල් දැමීමට ජනාධිපතිවරයාට බලය නොතිබුණි. 

1981 අංක 1 දරණ පාර්ලිමේන්තු මැතිවරණ පනතේ 24 (3) වගන්තියට අනුව ජනාධිපතිවරයා නියම කළ දිනයට පාර්ලිමේන්තු මැතිවරණය පැවැත්වීමට නොහැකි නම්, ඒ සඳහා වෙනත් දිනයක් නියම කිරීමට මැතිවරණ කොමිසම බැඳී සිටී. දිනයක් නියම නොකොට පාර්ලිමේන්තු මැතිවරණය කල් දැමීමට මැතිවරණ කොමිසමට බලයක් නැත.

සති ගණනක් හෝ මාස ගණනක් ඉදිරියට අනාගතයේ විය හැකි හෝ නොහැකි දේවල් පිළිබඳව ඇති කර ගන්නා උපකල්පන මත අනිවාර්යෙන්ම පිළිපැදිය යුතු නීතිමය ප්‍රතිපාදන නොසළකා හැරිය නොහැක. මැතිවරණ කොමිසම මුලින්ම 24 (3) වගන්තිය යටතේ ඔවුන් වෙත පැවරී ඇති කාර්‍යභාර්ය නීතියට අනුකූළව ඉටු කර, ඉන් පසුව සාකච්ඡා කළ යුතු කාරණයක් ඇත්නම් ඒ වෙත යොමු විය යුතුය.

Advertiesment