Sunday 12th of July 2020

English Tamil
Advertiesment


සාගල රත්නායක දේශපාලනයෙන් විශ්‍රාම ගනී 


2020-03-20 7572

අපේක්ෂක සහ ජාතික ලැයිස්තුවල නම නොමැති හේතුව ඒකයි

 

මාතර නායකත්වයත් ගයාන් සංජීවට   

මාතර දිස්ත්‍රික් එක්සත් ජාතික පක්ෂ සංවිධානයේ සභාපති සහ හිටපු පාර්ලිමේන්තු මන්ත්‍රී සාගල රත්නායක මහතා දේශපාලනයෙන් විශ්‍රාම ගැනීමට තීරණය කර තිබෙන ඔහුගේ සමීපතමයින් පිරිසක් "lankanewsweek" සමග පැවසීය.

එක්සත් ජාතික පක්ෂය යටතේ "අලියා" ලකුණින් මාතර දිස්ත්‍රික්කයට තරඟ කිරීම සඳහා අදාළ නාම යෝජනා පත්‍රයට අවසන් මොහොත වන තුරුම අත්සන් තැබීමෙන් වැළකී සිටීමට සාගල රත්නායක මහතා පියවර ගෙන තිබූ අතර ඒ සඳහා ඔහු උනන්දු කරවීමට එක්සත් ජාතික පක්ෂ නායක රනිල් වික්‍රමසිංහ මහතා ද ක්‍රියා කර නොතිබිණ.

අපේක්ෂකයෙකු ලෙස මහ මැතිවරණයට තරඟ නොකරන සාගල රත්නායක මහතාගේ නම එක්සත් ජාතික පක්ෂ ජාතික ලැයිස්තුවට ද ඇතුළත් නොකර,මාතර දිස්ත්‍රික් එක්සත් ජාතික පක්ෂ කණ්ඩායම් නායකත්වය ද, නැගී එන තරුණ සහ දක්ෂ දේශපාලඥයෙකු වන ගයාන් සංජීව මහතාට ලබාදීමට එක්සත් ජාතික පක්ෂ නායක රනිල් වික්‍රමසිංහ මහතා පියවර ගෙන තිබෙන්නේ මේ පසුබිම යටතේය.

මේ අතර සාගල රත්නායක මහතා එදා සිටම දරන මාතර දිස්ත්‍රික් එක්සත් ජාතික පක්ෂ සංවිධානයේ සභාපති ධූරයෙන් ද ඔහු ඉතා ඉකමනින් ඉල්ලා අස් වනු ඇති අතර එම තනතුර ද ගයාන් සංජීව මහතාට ලබාදීමට නියමිත බව එක්සත් ජාතික පක්ෂ ආරංචි මාර්ග පවසයි.

ඒ අනුව එක්සත් ජාතික පක්ෂය "අලියා" ලකුණ යටතේ මාතර දිස්ත්‍රික්කයෙන් මහ මැතිවරණයට තරඟ කරනුයේ ගයාන් සංජීව මහතාගේ දිස්ත්‍රික් සහ කණ්ඩායම් නායකත්වය යටතේය.

 

දේශපාලනයෙන් විශ්‍රාම ගියත් සාගල රත්නායක මහතා,එක්සත් ජාතික පක්ෂයට සහ රනිල් වික්‍රමසිංහ මහතා ප්‍රධාන නායකයින්ට තිරය පිටුපස සිටිමින් සිය සහයෝගය තව දුරටත් ලබා දෙනු ඇතැයි "සිරිකොත" ආරංචි මාර්ග පවසයි.  

Advertiesment