Wednesday 21st of April 2021

English Tamil
Advertiesment


තිසුරි සුරාජ් ගැන කතා කරයි


2020-02-23 1799

නිළියක වීමට කිසිවිටෙක සිහින නොදුටු තිසුරි යුවනිකා අද ටෙලිනාට්‍ය කලාවෙහි දිදුලන තාරකාවක වී සිටින්නේ ඈද නොසිතූ ලෙසිනි.

ජනප්‍රියත්වය පමණක් නොව, චරිතාංග දක්‍ෂ රංගවේදිනියක ලෙසද තිසුරි ප්‍රේක්‍ෂක සිත් තුළ තැබූ මතක සටහන් සදා සොඳුරු විය.

තෙවරක්ම ඈ හොඳම නිළි සම්මානයට පාත්‍ර වූයේද පාඨක සිතට තිළිණ කළ ඒ සුන්දර රංග විලාසය නිසාය. තිසුරි ගැන අටුවා ටීකා තව කියන්නට අවැසි නැත. ඉතින්… ඇගේම මුවින් ඒ ගැන අසන්නට හදවතින් අප කළ ආරාධනය තිසුරි පිළිගත්තේද ඉතාම නිහතමානී ලෙසය.

ඈ අප හා ….යේ දොඩමලු වූ සොඳුරු මොහොතයි මේ ගෙවෙන්නේ.

මේ දිනවල ඔබ විවිධ චරිත නිරූපණයන්හි නියැළෙනවා?

ඔව්… ලංසුපතිනියෝ, ‘වලාකුළු දොරින් ගලන්න සහ ඔබ නිසා’ ටෙලිනාට්‍ය තුන එකිනෙකට වෙනස් චරිත මතයි ගලා යන්නෙ.

‘ඔබ නිසා’ රඟපෑම නිසා ඔබ ප්‍රේක්‍ෂකයන්ගේ දෝෂ දර්ශනයට බඳුන් වුණා කියලා ආරංචියි?

ඔව්. මට සමීප මට ඇලුම් කරන බොහෝ රසිකයන් මගෙන් ඇසුවා. ‘ඔබ නිසා’ ටෙලිනාට්‍යය තෝරාගත්තේ ඇයි කියලා.

ඒ දොස් පැවරීම ඔබ දකින්නේ කොයි විදියටද?

රසිකයන් මට එයට දොස් කිව්වේ මා වෙත ඔවුන් දක්වපු ඇල්ම සහ අවධානය නිසයි. ඔවුන් ‘තිසුරි යුවනිකා’ යන රංගවේදිනිය ලෙසින් මා ගැන දක්වන ඒ හිතවත් බවට මම තදින් ගරු කරනවා. ඒ අතර, මම ඔවුනට මෙසේ කරුණු කාරණාවන් පැහැදිලි කර සිටිනවා, ‘ඔබ නිසා’ කියන්නේද යම් නිර්මාණයක්, සෑම චරිතයකටම ඇතුළු වී එහි ස්වභාවය උරගා බැලීම රංගවේදිනියකට එක්තරා ආකාරයක අත්දැකීමක් වෙනවා. හොඳ චරිත එහෙමත් නැත්නම් අහිංසක චරිත විතරක් නෙවෙයි. එයට එහායින් තිබෙන ඉන් ඔබ්බට ගිය චරිතද සමහර අවස්ථාවල භාර ගැනීමට සිදුවෙනවා. අන්න එවැනි මතයක් තුළ ඉඳගෙනයි මම ‘ඔබ නිසා’ නිර්මාණයට දායක වුණේ. අනෙක විවිධ චරිත රඟපෑවට මම දැඩි උනන්දුවක් දක්වනවා.

ඒ නිසාද ලංසුපතිනියෝහි පික්පොකට් කාරිය වුණේ?

අන්න හරි. ලංසු පතිනියෝ තිර පිටපත දෙන්නට කලින්ම ශිවගුරුනාදන් අංකල් මට කිව්වා, තිසුරි මේක නම් ටිකක් අමුතු චරිතයක්. සල්ලි හොරකම් කරන කපටි අම්මණ්ඩියකුටයි ඔයාට රඟපාන්න වෙන්නෙ කියලා.

නමුත් ඔබ ලංසුපතිනියෝහි හේමන්තිට හරි කදිමට පණ දුන්නා. එහෙම නේද?

ප්‍රතිචාර ලැබෙන්නේ නම් ඒ විදියට තමයි. කොහොමත් ලංසුපතිනියෝ ටෙලිනාට්‍යයේ මම රඟපෑවේ පුදුමාකාර ආරක්‍ෂාවකින්. ඒ වගේම ඒ චරිතය ගැන මම අධ්‍යයනය කළෙත් ලොකු උනන්දුවකින්. හේමන්තිගේ චරිතයට ප්‍රවිෂ්ට වුණෙත්, කැපවීම කියන හැඟීම තුළයි.

මේ චරිතය ඔබට ලැබුණේ ශිව ගුරුනාදන් මහතාගේ තෝරා ගැනීම තුළයි?

සත්තකින්ම ඔහු ගැන කතා කළ යුතුමයි. හැමදාමත් මම ශිව ගුරුනාදන් අංකල්ට ස්තුති කරනවා. ඉතා හොඳ මට්ටමේ චරිත නිරූපණයක් තුළ මගේ රංගන කාර්යය ඉදිරියට ගෙන යෑමට ප්‍රේක්‍ෂක සිත් තුළ මා ගැන මතකය නිදන්ගත කරවීමට ඔහු දුන් සහයෝගය ඉහළයි. ප්‍රධානම වශයෙන් මතක් කරනවා නම් හුස්ම වැටෙන මල් ඊෂානි, පැණි කුරුල්ලෝහි ධනුකි සහ ලංසුපතිනියෝහි හේමන්ති යන චරිත ගැන මම වඩා සතුටු වන බව කිව යුතුයි.

ඉතා කෙටි කාලයක් තුළ හොඳම නිළිය ලෙස තුන්පාරක්ම සම්මාන ගත්තේ ඒ හින්දාම වෙන්නැති?

ඔව්… අහංකාරකමකට නෙවෙයි කියන්නේ හරිම අහිංසක විදියට මම උද්දාමයට පත්වෙනවා. මිණි ගං දෑල, සුළඟ මත මොහොතක් සහ බොරලු පාර වෙනුවෙන් සම්මාන ලැබීම ගැන.

චරිත තෝරා ගැනීමේදී සැමියාගෙන් යම් බලපෑම් ඇති වෙනවාද?

කවදාවත්ම නැහැ. සුරාජ් මාව හොඳින්ම තේරුම් ගත්ත හරිම හොඳ කෙනෙක්. හැබැයි චරිත තෝරා ගැනීම ගැන මා තුළ හැමදාමත් යම් සීමා මායිම් තිබුණා. අදටත් ඒ සීමාවන් එලෙසමයි. ඒ වගේම චරිතයකට ආරාධනා ලැබුණාම එය හොඳින් අධ්‍යයනය කිරීමටත්, ඒ ගැන මගේ අම්මා, තාත්තා සහ ස්වාමියා එක්ක සාකච්ඡා කිරීමටත් මම පුරුදුව සිටිනවා.

කවදාවත්ම යම් චරිතයක් රිජෙක්ට් කරන්න කියලා සුරාජ් බලපෑම් කරලා නැද්ද?

අයියෝ නැහැ. යම් අදහසක් ඉදිරිපත් කරනවා මිසක සුරාජ් මට බලපෑම් කරන්නේ නැහැ. හැබැයි ඔහු මම තරුණ නළුවන් සමඟ පෙම් චරිත රඟපානවට නම් ටිකක් විතර ඊර්ෂ්‍යයි. ඒ ඊර්ෂ්‍යාවට ඇත්තටම මමත් කැමැතියි.

දීගෙක ගියත් ඔබ තවමත් හැමදේම කරන්නෙ අම්මගෙන් අහලලු?

ඔව් අනේ… කොහේ හරි ගමනක් ගිහින් ආවම අම්මා මං වොෂ් එකක් දාගෙන එන්නම් කියන පුරුද්ද තවම මං ළඟ තියෙනවා. ඒ විතරක් නෙවෙයි, ෆ්‍රිජ් එකේ චොක්ලට් එකක් තිබුණත් අම්මා මම චොක්ලට් කෑල්ලක් කන්නද? කියලත් අහනවා. ළඟකට ගියත් අම්මගෙන් අහලයි යන්නේ.

තාත්තා ගැනත් මොනවා හරි කියමු නේද?

තාත්තා ගැනත් කියන්නට තියෙන දේවල් බොහොමයි. ඒ කරුණාවන්ත ආදරය ගැන පොතක් ලියන්න පුළුවන් මට.

අම්මා ගැන හයිලයිට් කළේ කාන්තාව දෙවැනි කරන්න නෙවෙයි. හොඳ දුවක ලෝකයට තිළිණ කිරීමේ වගකීම වැඩිපුර තියෙන්නේ අම්මා කෙනකුට. ඒ නිසයි මම අම්මා ගැන කිව්වේ.

අම්මාගෙන්, තාත්තාගෙන් ලද ආදරය සුරාජ්ගෙන් ඒ ආකාරයටම ලැබෙනවද?

එය අංග සම්පූර්ණවම මට ලැබෙන බව සතුටින් කියනවා. මගේ අම්මා මට සවන් දුන් ආකාරයටම ඔහුද මට සවන් දෙන එක තමයි මා දකින ඔහුගේ හොඳම ගතිගුණය. ෂූටින් ගිහින් ආවම වුණත් මම හැමදේම සුරාජ්ට කියනව. තොරතෝංචියක් නැතිව මම කියවන කියවිල්ලට ඔහු සවන් දෙන්නේ හරි සතුටින්. ඇත්තටම මගේ අම්මා තාත්තා වාගෙම ඔහු මාව තේරුම් අරගෙන ඉන්න එකම මට ලොකු සතුටක්.

ඔබ හරිම වාසනාවන්තයි එහෙම නේද තිසුරි?

ඔව්… ඇත්තටම මම වාසනාවන්තයි. මට ආදරය කරන හොඳ මවුපියන් ලබන්න, හොඳ සැමියෙක් ලබන්න, ප්‍රේක්‍ෂකයන්ගේ ආකර්ෂණය දිනාගන්න ඇත්තටම වාසනාව කියන එක තියෙන්නම ඕනෑ තමයි. ඉතින් මම අද ඉන්නේ ඒ සියල්ල සම්පූර්ණ වූ තැන බව මම කියන්නෙ හරිම නිහතමානීවයි.

 

 

-මව්රට-
Advertiesment