Saturday 19th of September 2020

English Tamil
Advertiesment


දියර කිරි ප්‍රචලිත කිරීමේ ව්‍යාපෘතිය වංචා සහගතයි


2020-01-12 2234

අමාත්‍යාංශ ලේකම්වරිය නීති විරෝධීව තවත් කෝටි 131 ක අත්තිකාරමකුත් ගෙවලා

 

(පෝද්දල ජයන්ත)

රට තුළ 'දියර කිරි' ප්‍රචලිත කිරීම සදහා 2017 වර්ෂයේදී ග්‍රාමීය ආර්ථික කටයුතු අමාත්‍යාංශය විසින් දියත් කරන ලද ව්‍යාපෘතිය ඉතා වංචනික සහ අසාර්ථක ව්‍යාපෘතියක් බව දැන් තහවුරු වී තිබේ. ආනයනය කරන පිටි කිරි සදහා වාර්ෂිකව බිලියන ගණනක මුදලක් වැයවන අතර ඒවායේ ඇති සෞඛ්‍ය ආරක්ෂිත භාවයේ ගැටලු සහ පෝෂණ තත්ත්වයන් සළකා බලන විට රට තුළ දියර කිරි නිෂ්පාදනය ඉහළ නැංවීම කළ යුතුම කාර්යයක් වන්නේ ය. එහෙත් ඒ සදහා ඇති කරන ලද ව්‍යාපෘතිය නිසි අයුරින් ක්‍රියාත්මක නොකිරීම සහ වංචා සහගත වීම බරපතල ගැටලුවකි.

ඕස්ට්‍රේලියාවෙන් ගැබ්බර එළදෙනුන් ආනයනය කිරීම

ඉහත ව්‍යාපෘතිය නම් දියර කිරි නිෂ්පාදනය වැඩි දියුණු කිරීම සඳහා , රජය මැදිහත් වී ඕස්ට්‍රේලියාවෙන් ගැබ්බර එළදෙනුන් ආනයනය කොට නව ව්‍යවසායකයන් අතර බෙදා දීමයි. ග්‍රාමීය ආර්ථික කටයුතු අමාත්‍යාංශය විසින් මෙකී ගැබ්බර එළදෙනුන් ශ්‍රී ලංකාවට ආනයනය කිරීමේදී ලංකාවේ පාරිසරික වෙනස්විම්වලට ඔරොත්තු දීමේ හැකියාව නිසි අයුරින් සළකා බලා නැත. එය වඩාත්ම තහවුරු වී ඇත්තේ එකී එළදෙනුන් ලංකාවට ගෙන විත් ඉල්ලුම්කාර ව්‍යවසායකන් අතර බෙදා දී වැඩි කලක් ගතවන්නට පෙර සැළකිය යුතු දෙනුන් ප්‍රමාණයක් මරණයට පත්වීමයි. එකී දෙනුන් පමණක් නොව ඔවුන් ප්‍රසූත කළ පැටවුන්ද සැළකිය යුතු ප්‍රමාණයක් මරණයට පත්වී ඇත.

ව්‍යවසායකයන් වාණිජ බැංකුවලින් ගත් ණය ගෙවා ගත නොහැකිව අතරමං වීම

මේ ව්‍යාපෘතියට අදාළව ග්‍රාමීය ආර්ථික කටයුතු අමාත්‍යාංශය විසින් ඕස්ට්‍රේලියාවෙන් ආනයනය කළ ගැබ්බර දෙනුන් ව්‍යවසායකයන් විසින් මිලදී ගෙන ඇත්තේ තම දේපළ වාණිජ බැංකුවලට ඇපකර හැටියට තබමිනි. ඔවුන්ට ගැබ්බර දෙනුන් ලබා දීමේදී අමාත්‍යාංශ නිලධාරීන් සහතික වී ඇත්තේ එක් එළදෙනක ගෙන් දෛනිකව කිරි ලීටර් 16 ක් ප්‍රමාණයක් නිසැකවම ලබාගත හැකි බවයි. එහෙත් එකී ව්‍යවසාකයන් තරයේ ම ප්‍රකාශ කරන්නේ දිනකට කිරි ලීටර් 8 - 10 කට වඩා ලබාගත නොහැකි බවයි.

ඊටත් වඩා බරපතලම ගැටලුවවී ඇත්තේ ඔවුන් මිලදී ගත් දෙනනුන් ගෙන් ඇතැම් තැන්වල හරි අඩක්ම මිය යාම නිසා අපේක්ෂිත ආදායම කිසිසේත්ම ලබා ගත නොහැකි වීමයි. ඒ නිසාම ඔවුන් වාණිජ බැංකුවලින් ඉහළ පොළීයට ලබාගත් ණය වාරික ගෙවා ගැනීමට නොහැකි වී ඇත. අදාළ ණය වාරික නිසි ලෙස ගෙවීම් අතපසූ වූ බොහෝ පිරිස්වලට තමන් ඇපයට තැබූ දේපළ වෙන්දේසි කරන බව එකී වාණිජ බැංකුවලින් දැනුම් දී තිබේ. දැනටමත් ව්‍යවසායකයන් කිහිප දෙනකුගේ දේපළ වෙන්දේසි කර ඇත.

ගැබ්බර එළදෙනුන් ආනයනය කිරීමේදී වූ වංචාව ජනාධිපති කොමිසම හමුවට

හිටපු ජනාධිපති මෛත්‍රීපාල සිරිසේන මහතා විසින් ඊට පෙර රජයේ (2005 - 2014) බරපතල වංචා දූෂණ සෙවීමට පත්කළ විශේෂ ජනාධිපති විමර්ශන කොමිසෂන් සභාවට එම යහපාලන රජයේම (2017) සිදුවූ මෙකී වංචාවද ඉදිරිපත් වූ අතර අමාත්‍යාංශ ලේකම්වරියම මේ ව්‍යාපෘතිය මුළුමනින්ම අසාර්ථක බව පිළිගෙන තිබේ. එකී කොමිෂන් සභා වාර්තාව (ආයතන 34 ක ගනු දෙනු) පාර්ලිමේන්තුව වෙත ඉදිරිපත් වුවද අද බැදුම්කර ගනුදෙනු පිළිබඳ වෝහාරික විගණන වාර්තාව මෙන් පාර්ලිමේන්තුව තුළ සැගව ගොස් ඇත.

අසාර්ථක බව දැන දැනත් තවත් දෙනුන් 5000 ක් ආනයනය කිරීමට කෝටි 131 ක නීති විරෝධී අත්තිකාරම්

අමාත්‍යාංශ ලේකම්වරිය විශේෂ ජනාධිපති විමර්ශන කොමිසමේදී මේ ව්‍යාපෘතිය මුළුමණින්ම අසාර්ථක බව පිලිගෙන තිබියදීත් තවත් ගැබ්බර එළදෙනුන් 5000 ක් මෙරටට ආනයනය කිරීම සදහා ඕස්ට්‍රේලියාවේ අදාළ සමාගමට රූපියල් කෝටි 131 ක් මුදලක අත්තිකාරම් මුදලක් ගෙවා තිබේ. මෙකී මුදල උක්ත අයවැය ලේඛනය විසින් හෝ පරිපූරක ඇස්තමේන්තුවකින්වත් ලබාදී නැති පසුබිමක් තුළ නීති විරෝධීව අමාත්‍යාංශය සතු වෙනත් මුදල්වලින් ගෙවීම මුළුමනින්ම නීති විරෝධී ගෙවීමකි. මේ ලේකම්වරිය දැනට විශ්‍රාම ගෙන ඇතත් සිදුකර ඇති නීති විරෝධී ගෙවීම පිළිබද නීතිය අභියසට කැදවා දඩුවම් කළ යුතුය.

වාර්ෂිකව රටින් පිටතට ඇදී යන බිලියන ගණනක විදේශ විනිමය රට තුළ ඉතිරි කර ගැනීමේ ව්‍යාපෘති රටට අත්‍යාවශ්‍ය ය. එහෙත් නිසි සොයා බැලීමකින් විද්‍යාත්මක සැළසුමකින් තොරව ගසා කෑමේ අරමුණු ද පෙරදැරිව ඒවා සිදුකිරීමට යාම නිසා පවතින ලහදත් නැති කර ගැනීමකි. 'දියර කිරි' ප්‍රචලිත කිරීමේ ව්‍යාපෘතියද එවැන්නකි. ව්‍යාපෘතිය අසාර්ථක යැයි පවසා අත් පිසදා ගැනීමට ඊට වගකිව යුතු බලධාරීන්ට නිලධාරීන්ට කිසිසේත්ම ඉඩදිය යුතු නොවේ. ඔවුහු නීතිය හමුවට පමුණුවා රටේ මහජන මුදල් කාබාසිනියා කිරීමේ වරදට උපරිම දඩුවම් ලබාදිය යුතු ය.

 
 
 
-මූලාශ්‍ර-
'සිරස' විමර්ශන

 

Advertiesment