Thursday 12th of December 2019

English Tamil
Advertiesment


දූෂණය පිටු දැක රට ගොඩනැගීම ජනපතිගේ ඒකායන අරමුණයි-මහින්ද අමරවීර-


2019-11-25 2191

"ලං.වි.ම. කියන්නේ රටේ ප්‍රධාන ආයතනයක් වගේම, රටට විශාල බලපෑමක් කළ හැකි ආයතනයක්..!"

 

"විදුලිබල මණ්ඩලය අක්‍රීය වුණොත්,රටම අක්‍රීය වේවි..!"

 

"ආයතනය වගේම රට ගොඩගන්න නම්, වංචාව, දුෂණය පිටුදැකලා, වඩාත් විනිවිදබාවයෙන් කටයුතු කළ යුතුයි"

(සුජිත් මංගල ද සිල්වා) 

"ශ්‍රී ලංකා විදුලිබල මණ්ඩලය කියන්නේ මේ රටේ ඉතාමත් වැදගත් ආයතනයක්. ඒ වගේම රටට විශාල බලපෑමක් කළහැකි ආයතනයක්. ඒ නිසා අපි මෙම ආයතනය රැක ගැනීමට කටයුතු කළ යුතුයි. මේවන විට රටේ ජනතාව අතර මතයක් පවතිනවා මෙම ආයතනය තුළ අක්‍රමිකතා සහ දූෂණ පවතින බවට. ඒ ප්‍රචාරයන්ගේ සත්‍ය අසත්‍යතාවය කෙසේ වෙතත්, ආයතනය රැක ගැනීමට අපි ක්‍රියාත්මක විය යුතුයි. වෙනත් ආයතනවල වෘත්තීය සමිති සමග සාකච්ඡා පැවැත්වීම තරමක් අසීරුයි. නමුත් මෙම ආයතනයේ වෘත්තීය සමිති විසින් රටේ, මෙන්ම ආයතනයේ පැවැත්මට අදාළ වැදගත් කරුණු රාශියක් මට ඉදිරිපත් කළා. මම තව දුරටත් සේවක පිරිස් වෙතින් ඉල්ලා සිටින්නේ ආයතනය රැක ගන්න හැකි ආකාරයේ යෝජනාවන් මෙන්ම දූෂණ අක්‍රමිකතා තිබෙනවානම් ඒවා පිටුදකින්න, අවම කරගන්න හැකි ක්‍රම වේදයන් තිබෙනවානම් ඒවා ඉදිරිපත් කරන්න කියලයි. ලංවිම අක්‍රීය වුණොත්, මුළු රටම අක්‍රීය වේවි. අන්න ඒ තත්ත්වය අවබෝධ කරගෙන අපි කටයුතු කළ යුතුයි "යැයි මගී ප්‍රවාහන කළමනාකරණ, විදුලිබල හා බලශක්ති අමාත්‍ය මහින්ද අමරවීර මහතා අවධාරණය කරයි.

නව අමාත්‍ය මණ්ඩලයේ මගී ප්‍රවාහන කළමනාකරණ, විදුලිබල හා බලශක්ති අමාත්‍යවරයා ලෙස දිවුරුම් දීමෙන් අනතුරුව, අමාත්‍යවරයා සිය ප්‍රථම නිල නිරීක්ෂණ චාරිකාව සඳුදා(25) දින පෙරවරුවේ සිදු කරන ලදී. මෙහිදී ශ්‍රී ලංකා විදුලිබල මණ්ඩලයේ ප්‍රධාන කාර්යාලයේ සියලු අංශ වෙත පැම්ණි අතර සේවක පිරිස් මෙන්ම වෘත්තීය සමිති නියෝජිතයන්ද හමුවි ආයතනයේ පවතින තත්ත්වය පිළිබඳව අමාත්‍යවරයා සාකච්ඡා කළේය.

මෙහිදී ලංවීම වෘත්තීය සමිති සහ සේවක පිරිස් අමතමින් අදහස් දැක්වූ අමාත්‍ය මහින්ද අමරවීර මහතා ....,

"කලාපයේ වැඩිම විදුලි බිලක් සහිත රටවල් අතරට අද අපේ රට එකතු වෙලා සිටින්නේ. ඒ නිසා විදේශ ආයෝජන විශාල වශයෙන් අවම වෙලා තිබෙනවා. ඒ තත්ත්වය මත විදුලි බිල අවම කර ගැනීමට අපි කටයුතු කළ යුතුයි. ඔබ වෙනුවෙන් ඔබේ ආයතනයේ උන්නතිය වෙනුවෙන් මම ඕනැම වෙලාවක කැප වෙලා සිටිනවා. ඒ නිසා ඕනෑම ගැටළුවක් තිබෙනවානම්, ඕනැම වේලාවක ඒ පිළිබදව මාව දැනුවත් කරන්න. විශාල ප්‍රශ්ණ සහිත අමාත්‍යාංශවල තමයි මම මීට පෙර කටයුතු කළේ. නමුත් කිසිම ආරවුලක් සිදු වුණේ නැහැ. මේ අමාත්‍යාංශයත් ඒ ආකාරයෙන් සාර්ථකව කර ගෙන යන්න මම ඔබලාගේ සහයෝගය බලාපොරොත්තු වෙනවා.

නව ජනාධිපතිතුමා නව ආකාරයෙන් සිතා කටයුතු කරන කෙනෙක්. එතුමා පූර්ණ කැප කිරීමක් තුළින් තමයි රට ඉදිරියට ගෙන යන්න හදන්නේ. එතුමා සියලු වියදම් අවම කරලා, නාස්තිය පිටු දැකලා තමයි පාලන කටයුතු මෙහෙයවන්න සැලසුම් කරන්නේ. ඒ ආකාරයෙන්ම තමයි අපිටත් කටයුතු කරන්න සිදු වෙන්නේ. එහෙම නොවුණොත් රට ඉතාමත් අසීරු තත්ත්වයකට පත්වෙන බව පැහැදිළියි. මේ තත්ත්වයෙන් රට ගොඩ ගන්න ජනාධිපති තුමාට, අගමැති තුමාට වගේම අමාත්‍ය මණ්ඩලයට පමණක් බැහැ. සෑම කෙනෙක්ම දැඩි කැපවීමකින්, රට වෙනුවෙන් කටයුතු කිරීමෙන් තමයි අපිට මේ අභාග්‍ය සම්පන්න තත්ත්වයෙන් ගොඩ එන්න හැකි වන්නේ. ආයතනය වගේම රට ගොඩ ගන්න නම්, වංචාව, දුෂණය පිටු දැකලා, ඊට එරෙහිව අවශ්‍ය පියවර අනුගමනය කරමින් වඩාත් විනිවිදභාවයෙන් කටයුතු කළ යුතුයි" යැයි පැවසිය.

 

Advertiesment