Tuesday 19th of November 2019

English Tamil
Advertiesment


හිසට සෙවණයි - හිතට නිවනයි ඕනෑ නම් සජිත් දිනවනන්න


2019-10-31 1274

"නිවාස 386000ක් ආණ්ඩුව ජනතාවට දුන්නා"

"දස ලක්ෂයකට නිවාස ණය දුන්නා"

"හිටපු ජනා‍ධිපති ජේ.ආර්. ජයවර්ධන මහතා තමයි මේ රටට ඒකීයභාවය හදුන්වලා දුන්නේ. එ.ජා.ප.ය එය සුරක්ෂිත කරනවා"

 

" රාජපක්ෂ ආණ්ඩුව නැව් එන්නැති වරායවල් හැදුවා ගුවන්යානා එන්නේ නැති ගුවන් තොටුපළවල් හැදුවා" 

 

(සුජිත් මංගල ද සිල්වා)

" රාජපක්ෂ ආණ්ඩුව නැව් එන්නැති වරායවල් හැදුවා හම්බන්තොට. ගුවන්යානා එන්නේ නැති ගුවන් තොටුපළවල් හැදුවා මත්තල. ඒවා තුළින් තමයි රටේ ණය බර වැඩි වුණේ. 2015 අපට හැකිවුනා ආදායම වැඩි කරලා, වියදම අඩුකරලා, එක නගරයකට, එක දිස්ත්‍රික්කයකට සීමාවෙලා තිබුණ සංවර්ධනය සමස්ත දිවයින පුරාම ව්‍යාප්ත කරන්නට. අද අධිවේගී මාර්ග රට හැමතැනම තිබෙනවා. ඒ වගේම ගෙවල් ලක්ෂ 03 කට වඩා හදලා තිබෙනවා. තවත් ලක්ෂ 02ක් හදාගෙන යනවා. සමෘද්ධිය වැඩි කරලා තිබෙනවා. සෞඛ්‍ය ක්ෂේත්‍රයේත් විශාල වර්ධනයක් ඇතිකළා. ඉතාමත් හොද අධ්‍යාපන ක්‍රමයක් ඇති කරලා තිබෙනවා. අපි කිව්වොත් ඒ දේ කරන පක්ෂයක්. ඒ නිසා ගෙයින් ගෙට ගිහින් හදවතින් හදවතට කතා කරලා, පවුල් වාදය පසෙකට දාලා ප්‍රජාතන්ත්‍රවාදය ආරක්ෂා කරන්න කැපවෙමු. ඒ සදහා මේ වනවිට රටේ සෑම පක්ෂයක්ම අපි සමග එකුතු වෙලා තිබෙනවා. පොදුජන පෙරමුණ විතරයි අද අපි සමග නැත්තේ. ශ්‍රී ලංකා නිදහස් පක්ෂයේ පළාත් සභාවල සිටින මන්ත්‍රීවරු 2400 කින් 1200 කට වැඩි ප්‍රමාණයක් මේ වෙද්දි එක්සත් ජාතික පක්ෂයට එකතුවෙන්න කටයුතු කරලා අවසානයි" යැයි එක්සත් ජාතික පක්ෂ උප නායක, විදුලි බල බල ශක්ති සහ ව්‍යාපාර සංවර්ධන අමාත්‍ය රවි කරුණානායක මහතා අවධාරණය කරයි.

අමාත්‍යවරයා මෙම අදහස් පළකලේ, පසුගියදා කොළඹ 14, සිරිමාවෝ බන්ඩාරණායක මාවත අභිනවයෙන් ස්ථාපනය කරන ලද එක්සත් ජාතික පක්ෂ කාර්යාලය විවෘත කිරීමේ අවස්ථාවට සහභාගි වෙමිනි.

මෙහිදී වැඩිදුරටත් අදහස් දැක්වූ අමාත්‍ය කරුණානායක මහතා..,

"මේ රටේ ජනතාවගේ අනාතගතය සුරක්ෂිත කරන්න තීරණයක් ගන්න පුළුවන් අවස්ථාවක් තමයි නොවැම්බර් 16 දා ඇති වෙන්නේ. ප්‍රජාතන්ත්‍රවාදය ආරක්ෂා කරනවාද, පවුල් වාදය ආරක්ෂා කරනවාද කියලා ජනතාව තීරණ කල යුතුයි. වසර 10 ක් තිස්සේ රාජපක්ෂ සමය තුළ මොනවගේ පාලනයක්ද තිබුණේ කියලා අපි කව්රුත් දන්නවා. 2015 ජනවාරි 08 දා ජනතා වරමෙන් නැවත ප්‍රජාතන්ත්‍රවාදයේ පිබිදීමක් ඇති කරන්න අපට පුළුවන් වුණා. ඒ නිසා තමයි මේ නොවැම්බර් 16 දා එක්සත් ජාතික පක්ෂයේ ජනාධීපතිවරයෙක් සහිත අපේම ආණ්ඩුවක් බිහි කරන්න හදන්නේ. කරන්න බැරිවුණ සංවර්ධනය නැවතත් ඒ තුළින් ඉටු කරන්නයි අපට අවශ්‍ය වන්නේ.

සමහර පිරිස් අන්තවාදය වපුරලා මේ රටේ ලොකු ප්‍රශ්න ඇති කරලා තිබෙනවා. අපි මේ තත්ත්වය පිටු දැකලා, සමානාත්මතාවය, ප්‍රජාතන්ත්‍රවාදය ආරක්ෂා කළ යුතුයි. අපේ ප්‍රතිවාදීන් කියනවා එක්සත් ජාතික පක්ෂය බලයට ආවොත් මේ රටේ ඒකීය භාවය නැතිවෙයි කියලා. කවුද මේ රටට ඒකීයභාවය හඳුන්වලා දුන්නේ. එක්සත් ජාතික පක්ෂයෙන් බිහිවූ ජනා‍ධිපති ජේ.ආර්. ජයවර්ධන මහතා තමයි මේ රටට ඒකීයභාවය හදුන්වලා දුන්නේ. වසර 05 ක් අපි ආණ්ඩු බලය ගෙනගියා. මේ කාලසීමාව තුල රටේ ඒකීයභාවය නැති වුණාද. එක්සත් ජාතික පක්ෂය තුළින් හදුන්වාදුන් මෙ ඒකීයභාවය, මෙතෙක් දුරට අපි රැකගෙන ආව ඒකීයභාවය, තවදුරටත් ආරක්ෂා කරන්න අපි කැපවෙලා ඉන්නවා.

සෑම දෙයක්ම ඉෂ්ට කරන්න බැරි වුණත් අපි හැකි අයුරින් ජනතා සේවයක් කළා. උතුරු කොළඹ ආසනයේ අපි ගෙවල් 10,000ක් හදලා දුන්නා. තවත් 25,000 ක් හදනවා. උතුරු කොළඹ ආසනයේ ගෙවල් අවශ්‍ය සෑම දෙනාටම ලබාදෙන්න අපි කටයුතු කරනවා. සජිත් ප්‍රේමදාස මහතාගේ පියා ඇති කළ නිවාස සංකල්පය, සජිත් ප්‍රේමදාස මැතිතුමාත් ඉදිරියට ගෙනියනවා. ඒ විතරක් නෙමෙයි, රටේ ආර්ථිකය ගැන අපි සලකා බැලිය යුතුයි. 2015 දී රාජපක්ෂ ආණ්ඩුව අපට බාරදුන්නේ, ණය ගෙවාගන්න බැරි, දණගස්වපු ආර්ථිකයක්. මේ වනවිට අපි පාරිභෝගික භාණ්ඩ රාශියක මිල අඩු කරලා දීලා තිබෙනවා. මේ තත්ත්වය ඉවසගන්න බැරි ප්‍රතිවිරුද්ධ කණ්ඩායම, ලොකු ලූණු මිල වැඩිවීම ගැන පමණක් කතා කරනවා. මිල අඩු කළ භාණ්ඩ ගැන කතා කරන්නේ නැහැ. මේ අය කරන්නේ ජනතාව නොමග හැරිමක්.

මේ රට සිංහල බෞද්ධ රටක්. නමුත් අද සියළු ජාතීන්ට, සියළු ආගමිකයන්ට සහයෝගයෙන් ජීවත් වියහැකි තත්ත්වයක් ඇති කරලා තිබෙනවා. ත්‍රිවිධ හමුදාව සහ පොලීසියට අපට විශේෂ සහායක් ලබාදුන් අන්තවාදය මැඩපවත්වන්න. එදා රාජපක්ෂ පාලන සමයේ ත්‍රිවිධ හමුදාව සහ පොලීසිය කටයුතු කළේ රාජපකෂ ආණ්ඩුවේ අණ පරිදියි. නමුත් දැන් ඔවුන්, ඔවුන්ගේ සැබෑ නිල බලය පාවිච්චි කරලා කටයුතු කරනවා ආණ්ඩුවේ ඇගිලි ගැසීම් වලින් තොරව. ඒ වගේම රජයේ සේවයේ, ත්‍රිවිධ හමුදාවේ, පොලීසියේ වැටුප් වැඩිකළා අපි බලයට පත්වෙලා දින 35 ක් ඇතුළත. මේවා කියන්නේ පම්පෝරි ගහන්න නෙමෙයි. කයිවාරු ගහන අයට අපි කරපු දේවල් මතක් කරලා දෙන්නයි.

ඔවුන් මේ දිනවල මාධ්‍ය ඔස්සේ නොයෙක් ප්‍රචාර ගෙනයනවා. එක්සත් ජාතික පක්ෂය බලයට ආවොත් ත්‍රස්තවාදය ඇති වෙනවා, ඒකීයභාවය නැතිවෙනවා කියලා, බෝම්බ පුපුරනවා කියලා. ඔවුන් තමයි තැන්තැන්වල පිපිරිම් ඇති කරන්නේ. ඒ කරලා කියනවා බෝම්බ පුපුරනවා කියලා. පාස්කු ඉරිදා ප්‍රහාරයක් ඇතිවුණා. නමුත් පැය 24 ක් ඇතුලත අපේ පොලීසියට සහ ත්‍රිවිධ හමුදාවට හැකිවුණා, නම් කරලා තිබුණ ත්‍රස්තවාදීන් 78 කුගෙන් 65 ක් අල්ලගන්න. ලෝකේ එකම රටක්වත් නැතිව ඇති මේ ආකාරයට පොලීසිය සහ ත්‍රිවිධ හමුදාව ක්‍රියාත්මක වුණ අවස්ථාවක්. අපි කිසිම ආකාරයකට මේ රටේ සහජීවනය නැති වෙන්න ඉඩ දෙන්නේ නැහැ. ඒකීයභාවය පළුදු කරන්න ඉඩ දෙන්නේ නැහැ. මේ රටේ ජාතික ආරක්ෂාව ආරක්ෂා කරන එක තමයි වැදගත්ම දේ. ඒ දේ කරන්න සුදුසුම පුද්ගලයා තමයි, ෆීල්ඩ් මාෂල් සරත් ෆොන්සේකා මැතිතුමා. වසර 30 කට පස්සේ ත්‍රස්තවාදය නැති කරලා, රණවිරුවන්ට නායක්වය දීලා ජයග්‍රහණය ලබාගන්න ක්‍රියාකළේ. ඒ දේ ගෝඨාභය මහතාත් පිළිගත්තා. ඒ දේ නිසා තමයි අපේ නව ආණ්ඩුවේ ආරක්ෂක අමාත්‍ය ධුරය අප එතුමාට දෙන්න තීරණය කළේ යැයි පැවසීය.

 

 

Advertiesment